ކޮވިޑް ޖެހި، ސަލާމަތް ނުވާނެ ކަމަށް އަނބިމީހާ ގާތުގައި ބުނެ ލޯބިވެރިޔާ ގޮވައިގެން އުޅުނު މީހެއް އަތުލައިގަނެފި
މުމްބާއީ،އިންޑިއާ: ކޮވިޑް ޖެހިފައިވާ ކަމަށާއި އަދި ސަލާމަތްވާނެ ކަމުގެ އުއްމީދެއް ނެތްކަމަށް އަނބިމީހާ ގާތުގައި ބުނެ ، ލޯބިވެރިޔާއާ އެކީ ފިލައިގެން އުޅުނު އިންޑިއާ މީހަކު ހޯދާ އަނބުރާ ގެއަށް ގެނެސްފިއެވެ.
އިންޑިއާގެ މީޑިއާތައް ބުނާ ގޮތުގައި ޖޫން 24 ވަނަ ދުވަހު މަނީޝް މިޝްރާ ކިޔާ މީހަކު އަނބިމީހާއަށް ގުޅާ އޭނާ އަށް ވަނީ ކޮވިޑް ޖެހިފައި ކަމަށާއި ސަލާމަތްވާނެ ކަމުގެ އުއްމީދެއް ނެތް ކަމަށް ބުނެފައި ފޯން އޮފް ކޮށްލިއެވެ. އަދި އެ ދުވަހު ގެއަށް ނައުމުން ޖެހިގެން އައި ދުވަހު އާއިލާ އިން ވަނީ ފުލުހުންނަށް އެ މައުލޫމާތު ދީ ރިޕޯޓް ކޮށްފައެވެ.
ފުލުހުން ވެސް އޭނާއާ ގުޅުމަށް ކުރި މަސައްކަތް ނާކާމިޔާބު ވުމުން އޭނާ އެންމެ ފަހުން ފޯން ބޭނުން ކުރި ސަރަހައްދު ދެނެގަނެ އެ ސަރަޙައްދަށް ދިޔައެވެ. އެ ސަރަހައްދުން އޭނާގެ ސައިކަލާއިި ހެލްމެޓް ފެނުމުން ، މި މައްސަލައިގައި އޮޅުވާލުމެއް އުޅޭ ކަމަށް ފުލުހުން ދެނެގަތެވެ. އެންމެ ފަހުން ފުލުހުންގެ އޮޕަރޭޝަން ފުޅާކޮށް އޭނާގެ ތަފްސީލް ފުލުހުންގެ އެހެން ސްޓޭޝަންތަކަށް ވެސް އެންގިއެވެ. މި ހޯދުންތަކުގެ ތެރޭގައި މަދްޔަ ޕްރަދޭޝްގެ އިންޑޯ އިން އޭނާ ވަނީ ލޯބިވެރިޔާއާއެކު ކާރުގައި ދަނިކޮށް ފެނިފައެވެ. އަދި މިދިޔަ ހަފްތާގައި އޭނާ އަތުލައިގަނެ އަނބުރާ މުމްބާއީއަށް ވަނީ ގެނެސްފައެވެ.
