ކުރަމްގައި ދިމާވި ހަމަލާގައި މަރުވި މީހުންގެ އަދަދު 8 އަކަށް އިތުރުވެއްޖެ
ޕާކިސްތާނުގެ ކުރަމް ސަރަހައްދުގައި ހިނގި ހަމަލާއެއްގައި މަރުވި މީހުންގެ އަދަދު 8 އަކަށް އިތުރުވެއްޖެ އެވެ.
މި ހަމަލާ ދިން ފަރާތްތަކުން އަމާޒުކޮށްފައިވަނީ އެ ސަރަޙައްދުގައި ދަތުރުކުރަމުންދިޔަ ކޮންވޯއިއަކަށެވެ.
ޕާކިސްތާނުގެ ސަލާމަތީ ބާރުތަކުން ބުނީ މި ހަމަލާ ހިނގާފައިވަނީ ކުރަމް ސަރަހައްދުގެ ސެންޓްރަލް ކުރަމްގައި ހުރި ބަގްޒައި ޗެކްޕޯސްޓް ކައިރިން ދަތުރުކުރަމުންދިޔަ ކޮންވޯއިއަކަށް ކަމަށެވެ.
މި ހަމަލާގައި ފުރަތަމަ މަރުވެފައިވަނީ 6 މީހުންނެވެ. ނަމަވެސް ފަހުން އިތުރު ދެ މީހަކު ހޮސްޕިޓަލުގައި ފަރުވާ ދެމުން ދަނިކޮށް މަރުވެފައިވާކަމަށް ޕާކިސްތާނުގެ ސަލާމަތީ ބާރުން ބުނެ އެވެ.
މި ހަމަލާގައި އަނިޔާވި 7 މީހުންގެ ތެރެއިން 3 މީހުންގެ ހާލަތު ވަރަށް ބޮޑަށް ސީރިއަސްކަމަށް ޑޮކްޓަރުން ބުނެފައިވެ އެވެ. އަދި އިތުރު 4 މީހުންގެ ހާލަތު ރަނގަޅުވަމުން އަންނަ ކަމަށްވެސް ބުނެފައިވެ އެވެ.
މި ހަމަލާއާ ގުޅިގެން އަދި އެއްވެސް ފަރާތަކުން ޒިންމާ ނަގާފައި ނުވާ ކަމަށް ޕާކިސްތާނުގެ ސަލާމަތީ ބާރުތަކުން ބުންޏެވެ. އަދި މި ހަމަލާގައި ބައިވެރިވި ފަރާތްތައް ހޯދުމަށް ސަލާމަތީ ބާރުތަކުން މަސައްކަތް ފަށާފައިވާ ކަމަށްވެސް އެ ފަރާތުން މައުލޫމާތުދެ އެވެ.
މި ހަމަލާއަކީ ޕާކިސްތާނުގެ ސަރުކާރާއި ޓެހްރީކް-އެ-ޓާލިބާން ޕާކިސްތާން (ޓީޓީޕީ) އާ ދެމެދު ހިނގަމުންދާ ހަނގުރާމައިގެ ތެރެއިން ހިނގާފައިވާ އަނެއް ހަމަލާ ކަމަށް ބެލެވެ އެވެ. މި ސަރަހައްދަކީ ކުރިންވެސް މިފަދަ ހަމަލާތައް އަމާޒުވެފައިވާ ސަރަހައްދެއް ކަމަށް ޕާކިސްތާނުގެ މީޑިއާތަކުން ފާހަގަކޮށްފައިވެ އެވެ.
