Tuesday, 17 November 2026
Advertisement
Ooredoo — Article-Top (leaderboard)
ސަރުކާރު

ސެޕްޓެމްބަރަށް ސްކޫލުތަކުގެ ހުރިހާ ކްލާސްރޫމްތަކެއްގައި އޭސީ ހަރުކޮށް ނިންމަނީ

ސެޕްޓެމްބަރަށް ސްކޫލުތަކުގެ ހުރިހާ ކްލާސްރޫމްތަކެއްގައި އޭސީ ހަރުކޮށް ނިންމަނީ
ސްކޫލުތަކުގެ ކްލާސްރޫމްތައް ފިނިކުރުމަށް ކުރިއަށްގެންދާ "ކޫލް ސްކޫލް" މަޝްރޫއުގެ ދަށުން ސެޕްޓެމްބަރު މަސް ފެށެންވާއިރަށް ހުރިހާ ކްލާސްރޫމުތަކެއްގައި އޭސީ ހަރުކޮށް ނިންމުމަކީ އަމާޒެއް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. ސަރުކާރުގެ ހުރިހާ ސްކޫލެއްގެ ކްލާސްރޫމްތައް ފިނިކުރުމަށް "ކޫލް ސްކޫލް" މަޝްރޫއު ފަށާފައި ވަނީ ނިމިދިޔަ އަހަރުގެ ޖޫން މަހުގެ ދެ ވަނަ ދުވަހު އެވެ. މަޝްރޫއު ރަސްމީކޮށް އިފުތިތާހުކުރީ މާފުށި ސްކޫލުގައި ބޭއްވި ހާއްސަ ރަސްމިއްޔާތެއްގަ އެވެ. މަޝްރޫއު ކުރިއަށް ގެންދަން ނިންމާފައި ވަނީ ސަރުކާރާއި ކޮމިއުނިޓީގެ އެހީތެރިކަމާ އެކު އެވެ. އެޑިއުކޭޝަން މިނިސްޓްރީން ބުނެފައިވާ ގޮތުގައި މަޝްރޫއުގެ ފޭސް 2 ގައި ސްކޫލުތަކުގައި ސޯލާ ޕެނަލް ހަރުކުރުމަށް ނިންމާފައިވާ ކަމުގަ އެވެ. އެކަމުގެ ސަބަބުން ސްކޫލުތަކުގައި ބޭނުންކުރާ ކަރަންޓުގެ 30 އިންސައްތަ ސޯލާ ހަކަތައަށް ބަދަލުކުރެވި، ކަރަންޓަށް ކުރާ ހޭދަ ކުޑަކުރެވޭނެ ކަމުގަ އެވެ. އަމާޒު ހިފާފައި ވަނީ މަޝްރޫއުގެ ދަށުން ދެ އަހަރު ދުވަހުގެ ތެރޭގައި ސަރުކާރުގެ ހުރިހާ ސްކޫލުތަކެއް އޭސީ ކުރުމަށް ކަމަށް ވެސް އޭރު ފާހަގަކޮށްފައިވެ އެވެ. މާޅޮސްމަޑުލު އުތުރުބުރީގެ ރަށްތަކަށް އިއްޔެ ފެއްޓެވި ދަތުރުފުޅުގައި މިއަދު ހެނދުނު އެ އަތޮޅު ހުޅުދުއްފާރަށް ވަޑައިގެން ރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ހޫނުގަދަ ރަށްރަށުގައި ސްކޫލުތައް އެއާކޯން ކުރެވި ފިނި ކުރުމަކީ މުހިންމު ކަމެއް ކަމަށް ދެކިވަޑައިގަންނަވާ ކަމަށެވެ. ދަރިވަރުންނާއި ބެލެނިވެރިންގެ އެ ކަންބޮޑުވުންތަކަށް ހައްލު ހޯދައިދިނުމުގެ ގޮތުން ސަރުކާރުން ހާއްސަ މަޝްރޫއެއް ފަށާފައިވާކަން ފާހަގަކުރެއްވި އެވެ. އެ މަޝްރޫއުގެ ދަށުން ފުރަތަމަ އިސްކަންދޭނީ ހުރިހާ ސްކޫލުތަކެއްގެ ކްލާސްރޫމްތައް ފިނިކުރަން އޭސީ ހަރުކުރުމަށް ކަމަށް ރައީސް ވިދާޅުވި އެވެ. އެއަށް ފަހުގައި ސްކޫލުގެ އިދާރީ މަސައްކަތްތައް ހިނގާ ތަންތަނުގައި ވެސް އޭސީ ހަރުކުރާނެ ކަމަށެވެ. އެމަނިކުފާނު ވިދާޅުވި ގޮތުގައި އޭސީ ހަރުކުރުމާއި އެ ތަކެއްޗަށް ބޭނުންވާ ހަކަތަ، ފޯރުކޮށްދެވޭނީ އިއާދަކުރަނިވި ހަކަތައިގެ ތެރެއިން ސޯލާ ޕަވަ ބޭނުންކޮށްގެން ކަމުގަ އެވެ. މަޝްރޫއަށް ބޭނުންވާ ކަންކަން ހަމަޖެހި، ވަރަށް ރަނގަޅު ހިސާބަކަށް މަސައްކަތްތައް ގެންދެވިފައިވާކަން ފާހަގަކުރެއްވި އެވެ. އެގޮތުން މި އަހަރުގެ ބާކީ އޮތް މަސްތަކުގެ ތެރޭގައި ރާއްޖޭގެ މީހުން ދިރިއުޅޭ ރަށްތަކުގައި ހުރި ހުރިހާ ސްކޫލެއްގެ ހުރިހާ ކްލާސް ރޫމްތަކެއް އިއާދަކުރަނިވި ހަކަތައިގެ ބޭނުންކޮށް އޭސީކޮށްދީ، ފިނިކޮށްދޭނެ ކަމަށް ވިދާޅުވި އެވެ.
"އަމާޒު ކުރަނީ ވީހާވެސް އަވަހަކަށް ސެޕްޓެމްބަރު މަހާ ހަމައަށް ދާންވާއިރަށް ވެސް ނިންމާލެވޭތޯ. އެއީ ހައެއްކަ މަސް ދުވަސް، އަށެއްކަ މަސް ދުވަސް ބޭނުންވާނެ މުޅި ރާއްޖެ އެއްކޮށް ނިންމާލަން،"
ރައީސް ވިދާޅުވީ އެ އަމާޒަށް ވާސިލުވުމަށް މަސައްކަތްތައް ކުރަމުން އަންނަ ކަމަށެވެ. "ކޫލް ސްކޫލް" މަޝްރޫއަކީ ދަރިވަރުންނާއި މުދައްރިސުން ކްލާސްރޫމްގައި ތިބޭއިރު، އިހުސާސްކުރެވޭ ހޫނުމިނުގެ ދަރަޖަ މަތިވެ، އެކަމުގެ ސަބަބުން ތަހައްމަލު ކުރަން ޖެހޭ އުނދަގޫތަކަށް ދާއިމީ ހައްލެއް ހޯދައިދިނުމަށް، ރައީސްގެ އިރުޝާދާ އެކު ކުރިއަށްގެންދާ މަޝްރޫއެކެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.