އެމްޑީޕީގެ ވެރިކަމާ އެއް އިރެއްގައި ވެސް ދެކޮޅު ނޫން ކަމަށް ވިދާޅުވެ، އަމްރު ވިދާޅުވީ އެމްޑީޕީއާއި ޑިމޮކްރެޓްސް އެކުގައި މަސައްކަތް ކުރުން މުހިންމު ކަމަށް
މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ގެ ވެރިކަމާ އެއްވެސް އިރެއްގައި ދެކޮޅު ނޫން ކަމަށް، ޑިމޮކްރެޓްގެ ޓިކެޓްގައި މިދިޔަ ރިޔާސީ އިންތިޚާބުގައި ރަނިންމޭޓް ކަމަށް ވާދަ ކުރެއްވި އެސްޓިއޯގެ އެމްޑީ ހުސައިން އަމްރު ވިދާޅުވެއްޖެ އެވެ.
އަމްރު ވަނީ މިފަހުން ޑިމޮކްރެޓްްސް ދޫކުރައްވާ އެމްޑީޕީއަށް އަލުން ގުޅިވަޑައިގެންފައެވެ.
މިކަމާ ގުޅޭ ގޮތުން "ދެން" ގެ ހަވާސާއިން ބޭރު ޕްރޮގްރާމްގައި ވާހަކަދައްކަވަމުން އަމްރު ވިދާޅުވީ އެއްވެސް އިރަކު އެމްޑީޕީގެ އަސާސްތަކާއި، އުސޫލުތަކާ، ސިޔާސަތުތަކަށް ދެކޮޅު ނޫން ކަމަށެވެ.
އެމްޑީޕީއަށް އަލުން އަމްރު ގުޅިވަޑައިގެންނެވި ސަބަބު ހާމަކުރަމުން އަމްރު ވިދާޅުވީ އެއީ މި ވަގުތު ސިޔާސީ މަސައްކަތްތަކެއް ކުރެވޭނީ އެމްޑީޕީއާ ގުޅިވަޑައިގެންކަމަށް އެމަނިކުފާނަށް ގަބޫލުކުރެވޭ ކަމަށެވެ. ނަމަވެސް މިހާރުވެސް ޑިމޮކްރެޓްސްއަކީ ކުރިމަގު އޮތް ޕާޓީއެއް ކަަމަށް ޤަބޫލު ކުރައްވާ ކަމަށް ވިދާޅުވިއެވެ.
ޑިމޮކްރެޓްސްއިން ރިޔާސީ އިންތިޚާބާ ދިމާކޮށް، އޭރު އޮތް އެމްޑީޕީ ސަރުކާރަށް ފާޑު ކިޔުމާއި ގުޅޭ ގޮތުން ސުވާލު ކުރުމުން އަމްރު ވިދާޅުވީ، ޑިމޮކްރެޓްސް އިން އޭރު ކުރީ ވޯޓް ހޯދުމަށް ކުރި މަސައްކަތެއް ކަމަށާއި، ފާޅުގައި އެމަނިކުފާނު އެމްޑީޕީގެ ސަރުކާރާ ދެކޮޅަށް މަސައްކަތް ނުކުރައްވާ ކަމަށެވެ އަދި އެމްޑީޕީގެ ސިޔާސަތުތަކަށް އަބަދު ވެސް ތާއީދު ކުރައްވާ ކަމަށް ވިދާޅުވިއެވެ.
"އެއްވެސް އިރެއްގައި އަޅުގަނޑު ރައީސް ސޯލިހްގެ ވެރިކަމާ ދެކޮޅަށް ނުވަތަ ރައީސް ސޯލިހުގެ ވެރިކަން ބަދަލުކުރަން ވާހަކައެއް ދެއްކީއެއް ނޫން. 2023 ގެ ރިޔާސީ އިންތިހާބު ޑިމޮކްރެޓްސްއަށް ކާމިޔާބު ކުރަން ވާހަކަ ދެއްކީ"
އަމްރު ވިދާޅުވީ، 20 އަހަރު މަސައްކަތްކުރި، އެމްޑީޕީން ވަކިވާން އޭރު ނިންމި ނިންމެވުމަކީ އުދަނގޫ ނިންމެވުމެއް ކަމަށެވެ.
މީގެ އިތުރުން އަމްރު ވިދާޅުވީ މިހާރު އޮތް ހާލަތު ރަނގަޅުކުރެވޭނީ ދެ ޕާޓީ އެކުގައި މަސައްކަތްކޮށްގެން ކަމަށް ރައްޔިތުން ވެސް ގަބޫލުކުރާ ކަމަށެވެ. އަދި މި ވަގުތު ފެނިގެންދަނީ އެއް ޕާޓީއެއް އަނެއް ޕާޓީއާ ނުލާ މަސައްކަތްކުރަން އުދަނގޫވެގެންދާ މަންޒަރު ކަމަށް އަމްރު ވިދާޅުވި އެވެ.
"ކޮންމެވެސް ހިސާބަކުން އެބަޖެހޭ އެކީގައި މަސައްކަތްކޮށް މި ރާއްޖެ އަނެއްކާވެސް ކުރިއަށް އަޅުގަނޑުމެންނަށް ދެވޭނެ ގޮތްތަކެއް ހޯދަން. އެއީ ކަންނޭންގެ އެކަން ކުރެވޭނެ ގޮތަކީ"
އަމްރު އެމްޑީޕީއާ ގުޅިފައިވަނީ މީގެ ދެތިން މަސް ކުރިންނެވެ. އަމްރުއާއެކު ޑިމޮކްރެޓްސްގެ އިސް ބައެއް ލީޑަރުން ވެސް އެމްޑީޕީއާ ގުޅުނެވެ.
Ads by STO
