ބޮޑު ބޯޓުގެ ދަތުރުތަކާ އެކު ފަތުރުވެރިކަން އިތުރު ހަރުފަތަކަށް ދާނެ: ފައިސަލް
ގައުމީ އެއާލައިން، މޯލްޑިވިއަންގެ ވައިޑް-ބޮޑީ އެއާކްރާފްޓް (އެއާބަސް އޭ-330) ގެ ދަތުރުތަކާ އެކު ފަތުރުވެރި ކަމަށް ކުރިއެރުންތައް ލިބި އެހެން ހަރުފަތަކަށް ސިނާއަތް ގެންދެވޭނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ޗައިނާގެ ޗެންޑޫ ސިޓީ އާއި ރާއްޖެ އާ ދެމެދު ފެށި ސީދާ ވައިގެ ދަތުރުފަތުރުގެ ފުރަތަމަ ފްލައިޓް ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ޖައްސާފައި ވަނީ މިއަދު ހެނދުނު އެވެ. އެ ފްލައިޓުން ޖުމްލަ 192 މީހަކު އައިސްފައިވާއިރު، އޭގެ ތެރޭގައި 172 ފަތުރުވެރިން ހިމެނެ އެވެ.
މޯލްޑިވިއަނުން ގެނައި ފުރަތަމަ ވައިޑް-ބޮޑީ އެއާކްރާފްޓުގެ ދަތުރުތައް ފެށުމާ ގުޅިގެން، ވީއައިއޭގައި މަރުހަބާ ކިޔުމުގެ ހާއްސަ ރަސްމިއްޔާތެއް ވަނީ ބާއްވާފަ އެވެ.
ރަސްމިއްޔާތަށް ފަހު ދައުލަތުގެ މީޑިއާއަށް މައުލޫމާތު ދެއްވަމުން ފައިސަލް ވިދާޅުވީ ދުނިޔޭގެ އެހެން އެއާލައިންތައް ހުރި ހިސާބަށް ރާއްޖެ ގައުމީ އެއާލައިން، މޯލްޑިވިއަން ގެންދިއުމަށް ސަރުކާރުން މުހިންމު މަސައްކަތްތަކެއް ކުރަމުންދާ ކަމަށެވެ.
"އަޅުގަނޑުމެން އެންމެން ގުޅިގެން ޓީމެއްގެ ގޮތުގައި މި ކުރެވޭ މަސައްކަތުގެ ނަތީޖާއަކަށް ވެގެންދާނީ ދިވެހިރާއްޖޭގެ ތާރީހުގައި ފަތުރުވެރިކަން ނުގެންދެވޭ ހިސާބަށް އެހެން ހަރުފަތަކަށް ގެންދެވުން،"
ގައުމީ އެއާލައިންގެ ބޯޓެއް ޗައިނާގެ ފަތުރުވެރިންނާ އެކު ރާއްޖެއަށް އައުމަކީ ޓޫރިޒަމް މިނިސްޓަރުގެ ހައިސިއްޔަތުން އުފާކުރައްވާ ކަމެއް ކަމުގައި ފާހަގަކުރެއްވި އެވެ. މިކަމަކީ ފަތުރުވެރިކަމުގެ ސިނާއަތަށް ލިބުނު ކުރިއެރުމެއްގެ ގޮތުގައި ސިފަކުރެއްވި އެވެ.
ފައިސަލް ވިދާޅުވި ގޮތުގައި މި ދަތުރުތައް ފެށިފައި ވަނީ ރައީސް ޑރ. މުހައްމަދު މުއިއްޒުގެ އިސްނެންގެވުމުގެ ދަށުން ޓްރާންސްޕޯޓް މިނިސްޓްރީ އާއި މޯލްޑިވިއަނުން ކުރި ބުރަ މަސައްކަތްތަކެއްގެ ނަތީޖާއެއްގެ ގޮތުން ކަމުގަ އެވެ. އެކަމުން ދައްކުވައިދެނީ ފަތުރުވެރިކަމުގެ ސިނާއަތް ކުރިއަރުވައި އެހެން ހަރުފަތަކަށް ގެންދިއުމަށް ރައީސް ދެއްވާ ސަމާލުކަން ކަމުގަ އެވެ.
"މި ފްލައިޓް 75 ޕަސެންޓް ވަރަކަށް ފުލްކޮށް މި އޮތީ. ވަރަށް ރަނގަޅު ކާމިޔާބީއެއް މިއީ. ބެއިޖިންއަށް އޮތް ފްލައިޓް މޯލްޑިވިއަނުން އަޅުގަނޑަށް މައުލޫމާތުދޭ ގޮތުގައި އޯލްމޯސްޓް ފުލް ފްލައިޓެއް ކަމަށް ވަނީ،"
ފައިސަލް ވަނީ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން ރައީސްގެ ސިޔާސަތުތަކަށް ތާއީދުކޮށްދެއްވަން އެދިވަޑައިގެންފަ އެވެ. ގުޅިގެން ކުރެވޭ މަސައްކަތުން ފަތުރުވެރި ކަމަށް ކުރިއެރުން ހޯދޭނެ ކަމަށާއި ވަޒީފާގެ އިތުރު ފުރުސަތުތައް ތަނަވަސްކުރެވި، ކަމުގެ ފައިދާ ސިނާއަތަށާއި އާންމުންނަށް ކުރާނެ ކަމަށް ވިދާޅުވި އެވެ.
ވައިޑް-ބޮޑީ އެއާކްރާފްޓުގެ ފުރަތަމަ ދަތުރަށް މަރުހަބާ ކިޔުމަށް ބޭއްވި ރަސްމިއްޔާތުގައި ފައިސަލްގެ އިތުރުން އިކޮނޮމިކް މިނިސްޓަރު މުހައްމަދު ސައީދު އަދި ޓްރާންސްޕޯޓް މިނިސްޓަރު މުހައްމަދު އަމީން ބައިވެރިވެ ވަޑައިގެންނެވި އެވެ. އޭގެ އިތުރުން މޯލްޑިވިއަން އާއި އައިލެންޑް އޭވިއޭޝަން އަދި ކަމާ ގުޅުންހުރި އެހެން އިދާރާތަކުގެ އިސްބޭފުޅުން ބައިވެރިވެ ވަޑައިގެންފައިވެ އެވެ.
މި އާ ވައިގެ ދަތުރުތަކުގައި ހަފުތާއަކު 3 ފްލައިޓް ދަތުރު ކުރާނެ އެވެ. ވައިޑް-ބޮޑީ އެއާކްރާފްޓުގެ ދަތުރުތައް ޗެންގްޑޫގެ އިތުރުން ޗައިނާގެ އެހެން ސިޓީތައް ކަމަށްވާ ބެއިޖިން އަދި ޝަންގްހާއިއަށް ވެސް ފަށާނެ އެވެ.
ޗައިނާގެ ޗެންގްޑޫއަށް ދެކޮޅު ޓިކެޓުގެ އަގަކީ 688 އެމެރިކާ ޑޮލަރެވެ. ބެއިޖިން ދެކޮޅު ޓިކެޓުގެ އަގު 788 އެމެރިކާ ޑޮލަރަށް އަރާއިރު، ޝެންހާއީ ދެކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.
މޯލްޑިވިއަންގެ އާ މަތިންދާބޯޓު ރާއްޖެއަށް ގެނެސްފައި ވަނީ މި މަހުގެ 6 ވަނަ ދުވަހު އެވެ.
އެ ބޯޓަކީ 264 މީހުންގެ ޖާގައިގެ މަތިންދާ ބޯޓެކެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ވެސް ހިމެނޭ ގޮތަށް ފަރުމާކޮށްފައިވާ ބޯޓުގައި 18 ބިޒްނަސް ސީޓާއި 36 ޕްރިމިއަމް އިކޮނޮމީ ސީޓުގެ އިތުރުން 210 އިކޮނޮމީ ސީޓު ހިމެނެ އެވެ. ބޯޓުގައި ކާގޯ އުފުލޭ ކެޕޭސިޓީއަކީ 10 ޓަނެވެ.
ވައިޑް-ބޮޑީ އެއާކްރާފްޓާ އެކު މޯލްޑިވިއަންގެ ފްލީޓުގައި ހިމެނޭ ބޯޓުތަކުގެ އަދަދު ވަނީ 25 އަށް އިތުރުވެފަ އެވެ. ޗައިނާ އާ ދެމެދު ފެށި ދަތުރުތަކާ އެކު މޯލްޑިވިއަނުން ދަތުރުކުރާ މަންޒިލްތަކުގެ އަދަދު 22 އަށް ވަނީ އިތުރުވެފަ އެވެ.
Ads by STO
