އައިލެންޑް އޭވިއޭޝަނުގެ ޗެއާމަނަކަށް ޝަފީއު އައްޔަންކޮށްފި
ގައުމީ އެއާލައިން، މޯލްޑިވިއަން ހިންގާ ކުންފުނި އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) ގެ ބޯޑުގެ ޗެއާމަނަކަށް އެ ކުންފުނީގެ ޗެއާމަންކަން މީގެކުރިން ވެސް ކުރައްވާފައިވާ އަހްމަދު ޝަފީއު އައްޔަންކޮށްފި އެވެ.
އައިލެންޑް އޭވިއޭޝަނުގެ ޗެއާމަނަކަަށް އައްޔަންކުރެއްވިއިރު، ޝަފީއުއަކީ ހަޔާ އެޑިއުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރެއް ވެސް މެ އެވެ. އޭނާ އެ މަގާމަށް އައްޔަންކުރައްވާފައި ވަނީ 2023 ވަނަ އަހަރުގެ ނޮވެމްބަރު މަހުގެ 22 ވަނަ ދުވަހު އެވެ.
އައިލެންޑް އޭވިއޭޝަނުން މިއަދު ހެނދުނު "އެކްސް" ގައި ކުރި ޕޯސްޓެއްގައި ވަނީ ޝަފީއު އެ ކުންފުނީގެ ބޯޑުގެ ޗެއާމަނަކަށް އައްޔަންކޮށްފައިވާކަން ހާމަކޮށްފަ އެވެ.
އައިލެންޑް އޭވިއޭޝަނުގެ މެނޭޖިން ޑިރެކްޓަރަކީ އިބްރާހިމް އިޔާސް އެވެ. އޭނާގެ އިތުރުން ކުންފުނީގެ ބޯޑުގައި ތިއްބަވަނީ ޑެޕިއުޓީ މެނޭޖިން ޑިރެކްޓަރު އަލީ ސަލީމާއި އަބްދުﷲ ސައީދާއި މުހައްމަދު ހައްސާންގެ އިތުރުން އަހްމަދު އަބޫބަކުރެވެ.
އައިލެންޑް އޭވިއޭޝަނުގެ ޗެއާމަންކަން މީގެކުރިން ވެސް ޝަފީއު އަދާކުރައްވާފައިވެ އެވެ. އެ މަގާމު އޭނާ އަދާކުރެއްވީ ކުރީގެ ރައީސް އަބްދުﷲ ޔާމީނުގެ ވެރިކަމުގައި 2015 ވަނަ އަހަރުން ފެށިގެން 2018 ވަނަ އަހަރުގެ ޑިސެމްބަރު މަހަށެވެ.
ޝަފީއު ވަނީ މީގެކުރިން ވެސް ސަރުކާރުގެ މަގާމުތަކާއި ކުންފުނިތަކާއި އަމިއްލަ ބައެއް ތަންތަނުގައި ވެސް އިސް މަގާމުތަކެއް އަދާކުރައްވާފަ އެވެ.
އޭނާ ވަނީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ފިޝަރީޒް އެންޑް އެގްރިކަލްޗާ މިނިސްޓަރުކަން ކުރައްވާފަ އެވެ. އަދި އެ ވެރިކަމުގައި މަތީ ތައުލީމާ ބެހޭ މަޖިލިހުގެ މެމްބަރުކަން ކުރައްވާފައިވެ އެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރުކަމާއި އެ މިނިސްޓްރީގެ ޑިރެކްޓަ ޖެނެރަލްގެ މަގާމު ވެސް އަދާކުރައްވާފައިވެ އެވެ. ޑިރެކްޓަ ޖެނެރަލްގެ މަގާމު އަށް އަހަރު ދުވަހު ފުރުއްވި އެވެ.
ޝަފީއު ގެންދަވަނީ އައިލެންޑާސް އެޑިއުކޭޝަންގެ ސީއީއޯކަން ވެސް އަދާކުރައްވަމުންނެވެ. ބިލަބޮންގް ހައި އިންޓަނޭޝަނަލް ސްކޫލާއި ކެންގަރޫ ކިޑްސް އިންޓަނޭޝަނަލް ޕްރީ ސްކޫލާއި ފިންލެންޑް އިންޓަނޭޝަނަލް ސްކޫލުގެ އިތުރުން އަމީރު އަހްމަދު ޕްރީ ސްކޫލު ހިންގާ ކުންފުނީގެ ސީއީއޯއަކަށް އޭނާ ހަމަޖައްސާފައި ވަނީ 2022 ވަނަ އަހަރުގެ އޮގަސްޓް މަހު އެވެ.
ސޮސައިޓީ ފޯ ހެލްތު އެޑިއުކޭޝަން (ޝީ) ގެ ސީއީއޯކަން 2019 ވަނަ އަހަރުގެ ޖެނުއަރީ މަހުން ފެށިގެން 2021 ވަނަ އަހަރުގެ މާޗް މަހަށް އޭނާ އަދާކުރައްވާފައިވެ އެވެ. އޭގެ އިތުރުން ސައިރެކްސް ކޮލެޖުގެ އެގްޒެކެޓިވް ޑިރެކްޓަރުގެ މަގާމު ވެސް ވަނީ އަދާކުރައްވާފަ އެވެ.
