ގައުމީ ތަރައްގީގެ ޕްލޭން އެކުލަވާލަން ޕްލޭނިން ސްޕެޝަލިސްޓެއް ހޯދަނީ
ގައުމީ ތަރައްގީގެ ޕްލޭން އެކުލަވާލުމުގެ މަސައްކަތް ރާވައި ހިންގުމަށް ނޭޝަނަލް ޕްލޭނިން ސްޕެޝަލިސްޓެއް ހޯދަން ފިނޭންސް އެންޑް ޕްލޭނިން މިނިސްޓްރީން އިއުލާނުކޮށްފި އެވެ.
ރާއްޖޭގެ ތަރައްގީ ދެމެހެއްޓެނިވި ތަރައްގީގެ ވިސްނުމުން ހުރިހާ ރައްޔިތުން ޝާމިލުވެގެން 20 އަހަރު ދުވަހުގެ ތަރައްގީގެ ޕްލޭނެއް އެކުލަވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
އެ މަސައްކަތް ފެށުމަށް ނިންމަވާފައިވާކަން ރައީސް ހާމަކުރެއްވީ ހުސްވި އަހަރުގެ ސެޕްޓެމްބަރު މަހުގެ 17 ވަނަ ދުވަހު އެވެ. ތަރައްގީގެ ޕްލޭން އެކުލަވާލުމުގެ މަޝްވަރާ ރަސްމީކޮށް އިފުތިތާހުކޮށްފައި ވަނީ ނޮވެމްބަރު މަހުގެ 6 ވަނަ ދުވަހު ބޭއްވި ހާއްސަ ރަސްމިއްޔާތެއްގަ އެވެ.
ޕްލޭނިން މިނިސްޓްރީން މިއަދުކުރި އިއުލާނެއްގައި ބުނީ އެ މަގާމަށް މީހަކު ހޯދަނީ އެ މިނިސްޓްރީން ކުރުމަށް ހަމަޖެހިފައިވާ 20 އަހަރުގެ ގައުމީ ތަރައްގީގެ ޕްލޭން އެކުލަވާލުމުގެ އަމަލީ މަސައްކަތްތައް އިސްކޮށް ހިންގުމަށާއި ކޯޑިނޭޓްކުރުމަށް ކަމަށެވެ.
ޕްލޭނިން ސްޕެޝަލިސްޓްގެ ވަޒީފާއަށް ޝައުގުވެރިވާ ފަރާތްތަކުން އަންނަ ބުރާސްފަތި ދުވަހުގެ މެންދުރުފަހު 1:00 ގެ ކުރިން "އެކްސްޕްރެޝަން އޮފް އިންޓަރެސްޓް" އީމެއިލް މެދުވެރިކޮށް [email protected] އަށް ފޮނުވަން ވަނީ އެދިފަ އެވެ. އެ ލިޔުމާ އެކު، ކަމާ ގުޅުންހުރި ލިޔެކިޔުންތައް ހުށަހެޅުމަށް ވެސް އިއުލާނުގައިވެ އެވެ.
މި މަސައްކަތާ ގުޅޭ މައުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާމްސް އޮފް ރިފަރެންސް (ޓީއޯއާރް) މިނިސްޓްރީގެ ވެބްސައިޓުގައި ޝާއިއު ކުރެވިފައިވާނެ ކަމަށް އިއުލާނުގައިވެ އެވެ. މަސައްކަތާ ބެހޭ އިތުރު މައުލޫމާތު ބޭނުންވާ ނަމަ، ރެކްރޫޓްމަންޓަށް މެއިލް ކުރުމުން ލިބޭނެ ކަމަށް ޕްލޭނިން މިނިސްޓްރީން ބުންޏެވެ.
ޕްލޭނާ ގުޅޭގޮތުން ރައީސް ވިދާޅުވެފައި ވަނީ 2040 ވަނަ އަހަރު އަންނައިރު، ރާއްޖެއަކީ "ޑިވެލޮޮޕްޑް ނޭޝަންގެ ސްޓޭޓަސް" ލިބިފައިވާ ގައުމަކަށް ހެދުމުގެ ތަސައްވުރު ހާސިލު ކުރެވޭނީ ގިނަ ކަންތައްތަކެއް ހާސިލު ކުރެވިގެން ކަމަށެވެ. ތަރައްގީގެ ޕްލޭން ރާވައި ފުރިހަމައަށް ތަންފީޒު ކުރެވިއްޖެ ނަމަ، ފުރިހަމައަށް ތަރައްގީވެފައިވާ ގައުމެއްގެ ގޮތުގައި ގިންތިކުރެވިގެންދާނެ ކަމަށެވެ. އެކަން ކުރެވޭނީ އެކުވެރިކަމާ އެކީގައި ގައުމީ ވިސްނުމެއްގައި އެންމެން މަސައްކަތްކޮށްގެން ކަމުގައި ފާހަގަކުރެއްވި އެވެ.
ތަރައްގީގެ ޕްލޭން އެކުލަވާލުމުގެ މަސައްކަތުގައި ޔޫއެންޑީޕީންނާއި އޮސްޓްރޭލިއާ ސަރުކާރުގެ އެހީތެރިކަން ލިބޭ ކަމަށާއި އަދި ބޭރުގެ ތަޖުރިބާކާރުން ބައިވެރިކުރަން ހަަމަޖެހިފައިވާ ކަމުގައި ރައީސް ވިދާޅުވެފައިވެ އެވެ. އެހެންނަމަވެސް އެއީ ދިވެހިންގެ ތަރައްގީގެ މާސްޓަ ޕްލޭން ކަަމަށް ވާތީ މަސައްކަތުގައި އިސްކޮށް ހަރަކާތްތެރިވާނީ ދިވެހިން ކަމުގައި ވިދާޅުވި އެވެ.
އަމާޒަކީ އެއް އަހަރު ދުވަހުގެ ތެރޭގައި ގައުމީ ތަރައްގީގެ ޕްލޭން އެކުލަވާލުމުގެ މަސައްކަތް ނިންމުން ކަމުގައި އެމަނިކުފާނު ވިދާޅުވި އެވެ. އެންމެންގެ ބައިވެރިވުން ހިމެނޭހެން، ރަނގަޅަށް ކޮށްފި ނަމަ އެކަން ހާސިލު ކުރެވޭނެ ކަމަށާއި މި އަހަރުގެ ނޮވެމްބަރު މަހުގެ ކުރީކޮޅު މަސައްކަތް ނިންމައި އަމަލުކުރަން ފެށުމަކީ އަމާޒެއް ކަމުގައި ވެސް ޕްލޭން އެކުލަވާލުމުގެ މަޝްވަރާ ރަސްމީކޮށް އިފުތިތާހުކުރަން ބޭއްވި ރަސްމިއްޔާތުގައި ރައީސް ފާހަގަކުރައްވާފައިވެ އެވެ.
ގައުމީ ތަރައްގީގެ ޕްލޭން އެކުލަވާލުމުގެ ބާރު ރައީސުލްޖުމްހޫރިއްޔާއަށް ލިބިވަޑައިގަންނަވާ ގޮތަށް ގާނޫނު އަސާސީއަށް ވަނީ އިސްލާހު ވެސް ގެނެސްފަ އެވެ.
