"ދަ ގާޑަންސް" ނިންމަން ޖާހަށް ފަހުގެ ނޯޓިސް އެޗްޑީސީން ދީފި
ޖާހު އިންވެސްޓްމަންޓް ޕްރައިވެޓް ލިމިޓެޑުން ހުޅުމާލޭގައި ތަރައްގީ ކުރަމުން އަންނަ "ދަ ގާޑަންސް" ޕްރޮޖެކްޓުގެ މަސައްކަތް ނިންމަން އެ ކުންފުންޏަށް ފަހުގެ ނޯޓިސް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދީފި އެވެ.
އެޗްޑީސީން މިއަދު ނެރުނު ބަޔާނެއްގައި ބުނީ ޖާހުގެ ފަރާތުން ހުޅުމާލޭގައި 2017 ވަނަ އަހަރު ތަރައްގީކުރަން ފެށި "ދަ ގާޑަންސް" ޕްރޮޖެކްޓް ނިންމުމަށް އެކި ފަހަރު މަތިން އެ ކުންފުންޏަށް މުއްދަތު އިތުރުކޮށްދެވިފައިވާ ކަމަށެވެ.
އެހެންނަމަވެސް އަދާ ހަމައަށް ޖާހުގެ ފަރާތުން އެ ޕްރޮޖެކްޓް ނިންމާފައި ނުވުމުގެ ސަބަބުން، އެ ކުންފުންޏާއި އެޗްޑީސީ އާ ދެމެދު ސޮއިކުރެވިފައިވާ އެއްބަސްވުން ބާތިލުކުރުމުގެ އެންމެފަހު މަރުހަލާގެ ދަށުން ދެވޭ ގާނޫނީ ނޯޓިސް ދިނުމަށް އެ ކުންފުނީގެ ބޯޑުން ވަނީ ނިންމާފަ އެވެ. އެ ނޯޓިސް މިއަދު ޖާހަށް ފޮނުވާފައިވާ ކަމަށް އެޗްޑީސީން ބުންޏެވެ.
ޖާހުން ތަރައްގީ ކުރަމުން އަންނަ "ދަ ގާޑަންސް" އިމާރާތް
އެޗްޑީސީން ބުނީ ނޯޓިސްގައި ބަޔާންކުރާ މުއްދަތު ކަމަށްވާ 45 ދުވަހުގެ ތެރޭގައި ޖާހުގެ ފަރާތުން މި ޕްރޮޖެކްޓުގެ ނުނިމި ހުރި މަސައްކަތްތައް ނުނިންމާ ހާލަތުގައި އެއްބަސްވުން ބާތިލުކޮށް، ޕްރޮޖެކްޓް ޖާހުގެ އަތުން ނެގުމަށް އެ ކުންފުނީގެ ބޯޑުން ނިންމާފައިވާ ކަމަށެވެ.
އެ ކުންފުނިން މި ފިޔަވަޅު އަޅާފައި ވަނީ ޖާހަށް އެޕާޓްމަންޓް ގަތުމަށް ފައިސާ ދައްކާފައިވާ ފަރާތްތަކަށް، ވީ އެންމެ އަވަސް މުއްދަތެއްގައި އެޕާޓްމަންޓުތައް ހަވާލުކުރެވޭނެ މަގުފަހި ކުރުމުގެ ބޭނުމުގައި ކަން އެޗްޑީސީން ވަނީ ފާހަގަކޮށްފަ އެވެ.
