އެމްއެމްއޭގެ "ފަވަރަ" އާ އިތުރު ތިން ފަރާތަކުން ގުޅިއްޖެ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ގާއިމުކޮށްފައިވާ އިންސްޓަންޓް ޕޭމަންޓް ސިސްޓަމް – "ފަވަރަ" އިން ހިދުމަތް ދިނުމަށް އިތުރު ތިން ފަރާތަކުން ބައިވެރިވެއްޖެ އެވެ.
ސިސްޓަމްގައި އަލަށް ބައިވެރިވެ ފަވަރައިގެ ހިދުމަތް ދޭން ފަށާފައިވާ ފަރާތްތަކަކީ ހަބީބް ބޭންކް ލިމިޓެޑް (އެޗްބީއެލް) އާއި ކޮމާޝަލް ބޭންކް އޮފް މޯލްޑިވްސް ޕްރައިވެޓް ލިމިޓެޑް (ސީބީއެމް) ގެ އިތުރުން ދިރާގު ފިންޓެކް ޕްރައިވެޓް ލިމިޓެޑް (ދިރާގު ފިންޓެކް) އެވެ.
އެމްއެމްއޭއިން އިއްޔެ ނެރުނު ނޫސް ބަޔާނުގައި ބުނީ ދިރާގު ފިންޓެކްއަކީ ބޭންކު ނޫން ޕޭމަންޓް ހިދުމަތްދޭ ފަރާތްތަކުގެ ތެރެއިން ފަވަރަ އާ ގުޅޭ ފުރަތަމަ ފަރާތް ކަމަށެވެ. މި ތިން ފަރާތުން ވެސް ފަވަރަ އާ ގުޅުމަށް ވާން ޖެހޭ އެންމެފަހުގެ ތައްޔާރީތައްވެ، ޕައިލަޓް ޓެސްޓިންގެ މަރުހަލާ ފުރިހަމަކޮށްފައިވާ ކަމަށެވެ.
ސިސްޓަމާ ގުޅުމާ އެކު މި ތިން ފަރާތުގެ ހިދުމަތްތައް ބޭނުންކުރާ ހުރިހާ ކަސްޓަމަރުންނަށް ފަވަރަ ޓްރާންސްފާ، ފަވަރަ ރިކުއެސްޓް، ފަވަރަ އައިޑީ އަދި ފަވަރަ ރީކޯލް ހިމެނޭހެން، ފަވަރައިގެ ހުރިހާ ހިދުމަތްތައް ލިބޭނެ ކަމަށް އެމްއެމްއޭއިން ބުންޏެވެ.
އެ އޮތޯރިޓީން ބުނި ގޮތުގައި ފަވަރަ އާ އަލަށް ގުޅުނު އެޗްބީއެލް އަދި ސީބީއެމް އާއެކު ރާއްޖޭގައި ބޭންކިންގެ ހިދުމަތް ދެމުންގެންދާ ހުރިހާ ބޭންކުތަކެއް މިހާރު ވަނީ ސިސްޓަމްގައި ބައިވެރިވެފައި ކަމުގަ އެވެ. އެ އާއެކު އެއް ބޭންކުން އަނެއް ބޭންކަށް ކުރާ މުއާމަލާތްތައް ފަސޭހަކަމާ އެކު ވަގުތުން މިހާރު ކުރެވޭނެކަން ފާހަގަކުރި އެވެ.
ކުރިއަށް އޮތްތަނުގައި ޕޭމަންޓް ހިދުމަތްދޭ އެހެނިހެން ފަރާތްތަކުން ވެސް ސިސްޓަމާ ގުޅުމުގެ މަސައްކަތްތައް މިހާރު ވެސް ކުރެވެމުންދާ ކަމަށް އެމްއެމްއޭގެ ބަޔާނުގައިވެ އެވެ.
Ads by STO
