ހުސްވި އަހަރުގެ ފަހު ކުއާޓަރުގައި އެސްޓީއޯއަށް 3.8 ބިލިއަނުގެ އާމްދަނީއެެއް
ހުސްވި އަހަރުގެ ފަހު ކުއާޓަރުގައި އެ ކުންފުންޏަށް ޖުމްލަ އާމްދަނީގެ ގޮތުގައި 3.8 ބިލިއަން ރުފިޔާ ލިބިފައިވާ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ހާމަކޮށްފި އެވެ.
ނިމުނު އަހަރުގެ ހަތަރު ވަނަ ކުއާޓަރުގެ ހިސާބުތައް އެސްޓީއޯގެ ވެބްސައިޓުގައި އިއްޔެ ވަނީ އާންމުކޮށްފަ އެވެ.
އެ ކުންފުންޏަށް ހަތަރު ވަނަ ކުއާޓަރުގައި ޖުމްލަ އާމްދަނީގެ ގޮތުގައި ލިބުނީ 3.8 ބިލިއަން ރުފިޔާ އެވެ. އެއީ އަހަރުގެ ތިން ވަނަ ކުއާޓަރާ އަޅާބަލާއިރު ހަތް އިންސައްތައިގެ ކުރިއެރުމެކެވެ.
އެސްޓީއޯއިން ބުނީ ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ އެ ކުންފުނިން ކުރަމުންގެންދާ ވިޔަފާރިތައް ރަނގަޅުވެ، އާމްދަނީ އިތުރުވެފައިވުން ކަމަށެވެ. އެ އާއެކު ކުރީ ކުއާޓަރާ އަޅާބަލާއިރު އަށް އިންސައްތައިން ޖުމްލަ ފައިދާ އިތުރުވެ، 637 މިލިއަން ރުފިޔާ ޖުމްލަ ފައިދާގެ ގޮތުގައި ލިބިފައިވާ ކަމަށެވެ.
ހުސްވި އަހަރު ޖުމްލަ އާމްދަނީގެ ގޮތުގައި 15 ބިލިއަން ރުފިޔާ އެ ކުންފުންޏަށް ލިބިފައިވެ އެވެ. އެއީ 2023 ވަނަ އަހަރާ އަޅާބަލާއިރު، ހަ އިންސައްތައިގެ ދަށްވުމެކެވެ. އާމްދަނީ ދަށްވުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގަށް އައި ބަދަލާ އެކު، އެ ކުންފުނިން ވިއްކަމުން ދިޔަ ތެލުގެ އަގަށް ހެޔޮ ބަދަލުތަކެއް ގެނެވި ތިން ފަހަރެއްގެ މަތިން ތެލުގެ އަގު ދަށްކުރުމާ އެކު، ތެލުގެ ވިޔަފާރިން ލިބުނު އާމްދަނީ ދަށްވެފައިވުން ކަމަށް އެސްޓީއޯއިން ފާހަގަކުރެ އެވެ.
އާމްދަނީ ދަށްވުމާ އެކު، ޖުމްލަ ފައިދާގެ ގޮތުގައި ނިމުނު އަހަރު ލިބިފައި ވަނީ 2.4 ބިލިއަން ރުފިޔާ އެވެ. އެއީ އޭގެ ކުރީ އަހަރާ އަޅާބަލާއިރު 12 އިންސައްތައިގެ ދަށްވުމެކެވެ.
ފާއިތުވި އަހަރު އެސްޓީއޯއިން ވަނީ ކުންފުނީގެ ހިންގުމުގެ ހަރަދު 2023 ވަނަ އަހަރާ އަޅާބަލައި އަށް އިންސައްތަ ދަށްކޮށްފަ އެވެ. އެހެންނަމަވެސް ޖުމްލަ ފައިދާ ދަށްވުމާ އެކު ހިންގުމުގެ ފައިދާ ދަށްވެ، ހިންގުމުގެ ފައިދާގެ ގޮތުގައި އެ ކުންފުންޏަށް ލިބުނީ 1.1 ބިލިއަން ރުފިޔާ އެވެ.
ހަތަރު ވަނަ ކުއާޓަރުގެ ޖުމްލަ ފައިދާ ރަނގަޅުވުމުން، ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެސްޓީއޯއަށް ނިމުނު އަހަރު 218 މިލިއަން ރުފިޔާ ލިބިފައިވެ އެވެ.
ޓެކުހަށް ކެނޑުމުގެ ކުރިން ސާފު ފައިދާއަކީ 812 މިލިއަން ރުފިޔާ އެވެ. އެއީ 2023 ވަނަ އަހަރާ އަޅާބަލާއިރު 12 އިންސައްތައިގެ ދަށްވުމެކެވެ.
އެސްޓީއޯއިން ބުނި ގޮތުގައި ސާފު ފައިދާ ދަށްވުމުގެ މައިގަނޑު ސަބަބަކީ ތެލުގެ އަގުތަކަށް ގެނެވުނު ބަދަލާ އެކު ޖުމްލަ ފައިދާ ދަށްވެފައިވުން ކަމަށެވެ. ޓެކުހަށް ކެނޑުމަށްފަހު، ހުސްވި އަހަރު ސާފު ފައިދާގެ ގޮތުގައި އެ ކުންފުންޏަށް ލިބިފައި ވަނީ 717 މިލިއަން ރުފިޔާ އެވެ.
Ads by STO
