2000 ވަނަ އަހަރުން ފެށިގެން އުފަންވެފައިވާ ކުދިން ސިނގިރޭޓު ބުއިން މަނާކުރަނީ
ޒުވާން ޖީލު ދުންފަތާ ދުރުކުރުމަށް އެކަށައަޅުއްވާފައިވާ ޖެނެރޭޝަނަލް ބޭންގައި ހިމެނޭ ރައީސް ޑޮކްޓަރ މުހައްމަދު މުއިއްޒުގެ ހުށައެޅުއްވުންތައް އާންމުކޮށް ހިއްސާކުރައްވައިފި އެވެ.
އެކަމާމެދު އެމަނިކުފާނުގެ ވިސްނުންފުޅު ގެންގުޅުއްވާ ގޮތް ރައްޔިތުންނާ ހިއްސާކުރައްވާފައި ވަނީ ރައްޔިތުންނާ ވީހާވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ހިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓުގެ ދެ ވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސްގެ ވާހަކަފުޅުގައި އެކަމާ ގުޅޭ ކެބިނެޓް ކަރުދާހެއް، ދިރާސާ ކުރައްވައިގެން ތައްޔާރުކުރެއްވުމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް އާ ހަވާލުކުރައްވާފައިވާކަން ހާމަކުރެއްވި އެވެ. އަދި އެ ކަރުދާސް ތައްޔާރުކުރުމުގައި ކަމާ ގުޅޭ ފަރާތްތަކުގެ ތެރޭގައި ހިމެނިވަޑައިގަންނަވާ ޑޮކްޓަރުންނާއި އަދި އެނޫން ވެސް ފަރާތްތަކުގެ މަޝްވަރާ ހޯއްދަވަން އިރުޝާދު ދެއްވާފައިވާނެކަން ހާމަކުރެއްވި އެވެ.
ރައީސްގެ ވާހަކަފުޅުގައި ޖެނެރޭޝަނަލް ބޭން، ކަނޑައެޅުއްވުމުގައި އެމަނިކުފާނު ހުށަހަޅުއްވާ ގޮތްތައް ހިއްސާކުރެއްވި އެވެ. އެގޮތުން ހުށަހަޅުއްވާ ގޮތްތަކަކީ:
- 2007 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
ރައީސް ވަނީ މި ތިން ގޮތް ހުށަހެޅުއްވުމުގެ ފަހަތުގައިވާ ސަބަބު ވެސް ހާމަކުރައްވާފަ އެވެ. އެގޮތުން 18 އަހަރާއި 25 އަހަރާ ދެމެދުގެ އުމުރުފުރާގެ މީހުން ނުވަތަ ޒުވާނުން އެކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެ ކަމުގައި ފާހަގަކުރެއްވި އެވެ.
