ރައީސް، ފުޓްބޯލް ފޮ ޕީސްގެ އިސްވެރިންނާ ބައްދަލުކުރައްވައިފި
ރައީސް ޑރ. މުހައްމަދު މުއިއްޒު، އިނގިރޭސިވިލާތަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ފުޓްބޯލް ފޮ ޕީސްގެ އިސް އޮފިޝަލުންނާ ބައްދަލުކުރައްވައިފި އެވެ.
ފުޓްބޯލް ފޮ ޕީސްގެ ފަރާތުން ރައީސަށް މަރުހަބާ ވިދާޅުވީ އެ ޖަމިއްޔާގެ ކޯ-ފައުންޑަރު، ކާޝިފް ސިއްދީގީ އާއި ބްރެޑްފަޑް ސިޓީ އޮފް ކަލްޗާ 2025 ގެ ސީއީއޯ، ޝާހްނާޒް ގުލްޒާރެވެ.
ރައީސް އޮފީހުން ބުނީ އެ ބައްދަލުކުރެއްވުމުގައި ޔުނިވާސިޓީ ޕީސް ސެންޓަރުގައި ފުޓްބޯލް ފޮ ޕީސްއިން ހިންގާ ޕްރޮގްރާމުތަކުގެ މައުލޫމާތު ރައީސަށް އަރުވާފައިވާ ކަމަށެވެ. އަދި އެމަނިކުފާނު ވަނީ އެ ސެންޓަރުގެ ފުޓުބޯޅަ ދަނޑުތައް ބައްލަވާލައްވައި، އެވަގުތު ފަރިތަކުރުންތަކުގައި ބައިވެރިވަމުން ދިޔަ ޒުވާނުންނާ ބައްދަލުކުރައްވާފައި ކަމަށެވެ.
ފުޓްބޯލް ފޮ ޕީސްއަކީ 2013 ވަނަ އަހަރު އުފެދުނު ޖަމިއްޔާއެކެވެ. އެ ޖަމިއްޔާއަކީ ފުޓުބޯޅައިގެ ޒަރިއްޔާއިން އިޖުތިމާއީ މައްސަލަތައް ހައްލުކުރަން ޒުވާނުން ބާރުވެރިކުރުވުމަށް އދ. ގެ އޮފީސް ފޮ ސްޕޯޓްސް ފޮ ޑިވެލޮޕްމަންޓް އެންޑް ޕީސްގެ އެހީތެރިކަމާ އެކު ހިންގާ ބައިނަލްއަގުވާމީ ޖަމިއްޔާއެކެވެ. ސުލްހަ ކުރިއެރުވުމާއި ޝާމިލު އިޖުތިމާއީ ވެއްޓަކަށް ތާއީދުކުރާ ސްޕޯޓްސް ޑިޕްލޮމެސީ އާއި ދޭސީ ޕްރޮގްރާމްތަކުގެ ތެރެއިން އެކި ފަންތީގެ މީހުން ގުޅިގެން މަސައްކަތް ކުރުމަށް އެ ޖަމިއްޔާއިން އެހީތެރިވެދެ އެވެ.
އަޅާނުލެވި، އެކަހެރިވެފައިވާ ޒުވާން މުޖުތަމައުތައް ބާރުވެރިކުރުވައި ޓީމެއްގެ ގޮތުގައި މަސައްކަތް ކުރަން ދަސްކޮށްދިނުމާއި ކޮންފްލިކްޓް ރިޒޮލިއުޝަން ނުވަތަ ދިމާވާ މައްސަލަތަކަށް ސުލްހަވެރި ގޮތެއްގައި ހައްލު ހޯދޭނެ އުކުޅުތައް އެ ހަރަކާތުގެ ދަށުން ދަސްކޮށްދެ އެވެ. އަދި އެ ޕްރޮގްރާމުގެ ދަށުން ކުރިއަށް ގެންދާ ޗެރިޓީ މެޗުތަކާއި ތަމްރީނު ޕްރޮގްރާމުތަކުގެ ސަބަބުން ކުޑަކުދިންނާއި ކޯޗުންނާއި ޓީމް މެނޭޖަރުންނަށް ބޭނުންވާ ހުނަރުތައް ލިބި، އޭގެ ފައިދާ ބައިނަލްއަގުވާމީ މުޖުތަމައަށް ވެސް ލިބިދެ އެވެ.
