Monday, 16 November 2026
Advertisement
STO — McCoy (leaderboard)
ސަރުކާރު

މުޖުތަމައުން ފެންނަ ނޭދެވޭ އަމަލުތަކުގެ ޒިންމާ ނަގަން ޖެހޭނީ "ބިރަކާ ނުލާ މަޖާކުރަން" ހިތްވަރުދިން މީހުން: ރައީސް

މުޖުތަމައުން ފެންނަ ނޭދެވޭ އަމަލުތަކުގެ ޒިންމާ ނަގަން ޖެހޭނީ "ބިރަކާ ނުލާ މަޖާކުރަން" ހިތްވަރުދިން މީހުން: ރައީސް

ދިވެހި މުޖުތަމައުން މިއަދު ފެންނަމުންދާ ނޭދެވޭ އަމަލުތަކުގެ ޒިންމާ ނަގަން ޖެހޭނީ ބިރަކާ ނުލާ މަޖާކުރުމަކީ ކޮންމެހެން ކުރަން ޖެހޭ ކަމެއްގެ ގޮތުގައި ހިތްވަރުދިން މީހުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އެހެން ވިދާޅުވީ ވިދާޅުވީ ފުލުހުންގެ ހިދުމަތުގެ 92 ވަނަ އަހަރީ ދުވަހުގެ މުނާސަބަތުގައި ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މާލޭގެ ހެންވޭރުގައި ހުންނަ ގެއަކުން ގުދަނެއްގެ ފުރާޅު މައްޗަށް ޒުވާން އަންހެނަކު ވެއްޓުނު ހާދިސާއަށް އިޝާރާތްކުރައްވައި ރައީސް ވިދާޅުވީ އެއީ ވަރަށް ހިތާމަވެރި ހާދިސާއެއް ކަމަށެވެ.

Advertisement
Allied Insurance — Square (box)

".. ހިތާމަވެރި ހާދިސާއަށް ވިސްނާލާއިރު ވެސް، މި ކަމުގެ އެންމެ ބޮޑު ޒިންމާއެއް ނަގަން ޖެހޭނީ އަޅުގަނޑު ގަބޫލުކުރާ ގޮތުގައި އަދި އިންސާފަށް ލޯބިކުރާ ކޮންމެ މީހަކު ވެސް ގަބޫލު ކުރާނެ ގޮތުގައި ބިރަކާ ނުލައި މަޖާކުރުމަކީ ކޮންމެހެން ކުރަން ޖެހޭނެ ކަމެއްގެ ގޮތުގައި ޕްރޮމޯޓްކުރި މީހުން މީގެ އަހަރުތަކެއް ކުރިން،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އިސްލާމްދީނުގައި ކަނޑައެޅިފައި ހުރި އުސޫލުތަކާއި ހަމަތަކަކީ މުހިންމު ނޫން ކަންކަމުގައި ވިސްނައިދީ ޒުވާން ކަމުގައި ބޭނުން ގޮތަކަށް އުޅުމަށް ހިތްވަރުދިން މީހުން މިއަދު ވެސް ސިޔާސީ ބޭނުމެއްގައި އެ ކުދިންގެ ބޭނުން ހިފުމަށް މަސައްކަތް ކުރަމުންދާ ކަމުގަ އެވެ.

"އަޅުގަނޑުމެންގެ މާތްވެގެންވާ އިސްލާމްދީނުގައި ކަނޑައެޅިފައި ހުރި އިންތަކާއި މިންތަކާއި އުސޫލުތަކާއި ހަމަތަކަކީ އެއީ މާ މުހިންމު ކަމެއް ނޫނޭ. މަޖާކުރާށޭ. ޒުވާން ކަމުގައި ތި ކުދިން ބޭނުން ގޮތަކަށް އުޅޭށޭ ކިޔާފައި އެ ހިތްވަރުދިން މީހުން މިއަދު ސިޔާސީ ބޭނުމެއްގައި ނުކުމެ، އެ ކުދިން މިސްޔޫސް ކުރަމުންދާ ދިއުން، ލޯ ހުޅުވައި ބަލަން އެބަ ޖެހޭ،" ރައީސް ވިދާޅުވި އެވެ.

ރައީސް ވިދާޅުވީ އެ މަގުން ކުދިން ދިޔައީ ސިޔާސީ އޮއިވަރެއްގައި ޖައްސައިގެން އިސްލާމްދީނުގެ ހަމަތަކާއި އުސޫލުތަކާއި ގައުމުގައި އޮތް ރީތި އާދަތަކުން ނެރެ އެހެން މަގަކުން ގެންދިއުމަށް ކުރި މަސައްކަތްތަކުގެ ނަތީޖާއެއްގެ ގޮތުން ކަމަށެވެ.

"އެ ކުދިން އެ މަގުން ދިޔައީ ސިޔާސީ އޮއިވަރެއްގައި ޖައްސައިގެން. މި ގައުމުގައި އޮތް މާތްވެގެންވާ އިސްލާމްދީނުގެ ހަމަތަކާއި އުސޫލުތަކާއި އަޅުގަނޑުމެންގެ ތެރޭގައި އޮތް ރީތި އާދަތަކުން ބޭރަށް މި ގައުމު ނެރެ، އެހެން މަގަކުން ގެންދަން ކުރި މަސައްކަތުގެ ނަތީޖާއެއްގެ ސަބަބުން އޭގެ ވިކްޓިމައިޒް ވެފައި ތިބި ޒުވާނުންތަކެއްގެ ބޭނުން ކޮށްގެން ސިޔާސީ ފައިދާ ނަގަން އުޅޭ އުޅުމުގެ ތެރެއަށް ދިވެހި ލޮބުވެތި ރައްޔިތުން ވަނުމަކީ ކޮށްގެން ވާނެ ކަމެއް ނޫން،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އެކަމަށް ލޯ ހުޅުވޭ ބަޔަކަށް ރައްޔިތުން ވާން ޖެހޭނެ ކަމަށާ އަދި ތެދާއި ދޮގު ވަކިކުރަން އެނގެން ޖެހޭ ކަމުގަ އެވެ. ޖަޒުބާތުގައި ޖެހި ބަޔަކު ދައްކާހާ ވާހަކައަކަށް ސިކުނޑި ދޫކޮށްލައިގެން ނުވާނެ ކަމަށާއި އަމިއްލަ ސިކުނޑިން ވިސްނައިގެން ތެދު ދޮގު ބެލޭ ބަޔަކަށް ވާން ޖެހޭ ކަމުގައި ފާހަގަކުރެއްވި އެވެ.

"ކާކުކަން ނޭނގޭ މީހުން އެކި ކަހަލަ ފަތުރާ ދޮގު ވާހަކަތަކުގައި ޖެހި، އެ ދޮގުތަކުގެ އަޅުންގެ ގޮތުގައި އަޅުގަނޑުމެން ވެގެން ނުވާނެ،" ރައީސް ވިދާޅުވި އެވެ.

ރައީސް އިތުރަށް ވިދާޅުވީ މާތް ﷲ ދެއްވި ބުއްދީގެ ބޭނުން ހިފުމަކީ އޮޕްޝަނެއް ނޫން ކަމަށެވެ. އެއީ ޒިންމާއަކާއި ވާޖިބެއް ކަމުގައި ފާހަގަކުރެއްވި އެވެ. ރާއްޖެއަކީ ސައްތައިންސައްތަ އިސްލާމީ ގައުމެއް ކަމަށާ އަދި ކޮންމެ މީހަކަށް ވެސް ސުވާލު ކުރެވި ޖަވާބުދާރީވާން ޖެހޭ ދުވަސް އަންނައިރު، ބުއްދީގެ ބޭނުން ހެޔޮ ގޮތުގައި ނުހިފައިފި ނަމަ އެ ދުވަހު ދޭނެ ޖަވާބެއް ނޯންނާނެ ކަމަށެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.