ރީޖަނަލް އެއަރޕޯޓްސް ކޮމްޕެނީ ލިމިޓެޑްގެ ނަމުގައި ސަރުކާރު ކުންފުންޏެއް އުފައްދައިފި
ރީޖަނަލް އެއަރޕޯޓްސް ކޮމްޕެނީ ލިމިޓެޑްގެ ނަމުގައި ރައީސް އިބުރާހިމް މުޙައްމަދު ޞާލިޙު މިއަދު ކުންފުންޏެއް އުފައްދަވައިފިއެވެ.
މި ކުންފުންޏަކީ ސަރުކާރުން ރީޖަނަލް އެއާޕޯޓްސް މެދުވެރިކޮށް ހިންގާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްގީކޮށް ހިންގުމަށް އުފެއްދެވި ކުންފުންޏެއް ކަމަށް ރައީސް ވިދާޅުވެފައި ވެއެވެ.
ރާއްޖޭގެ އެކި ސަރަހައްދުތަކުގައި ވައިގެ ދަތުރު ފަތުރު ކުރާ އެތަކެއް އެއަރޕޯޓެއް ތަރައްގީ ކުރެވިފައިވާއިރު ވެލާނާ އިންޓަރނޭޝަނަލް އެއަރޕޯޓާއެކު ރާއްޖޭގައި މިހާރު ޖުމުލަ 16 އެއަރޕޯޓެއް ވަނީ ޤާއިމު ކުރެވިފައެވެ. އަދި އައިލޭންޑް އޭވިއޭޝަނާއި، ބައެއް ރީޖަނަލް އެއަރޕޯޓްސް ތަކުގެ އިތުރުން ސަރުކާރު ހިއްސާވާ ކުންފުނިތަކުން ވެސް އެއަރޕޯޓުތައް މެނޭޖު ކުރެއެވެ.
އެގޮތުން އަލަށް އުފެއްދެވި ކުންފުންޏަކީ މިފަދައިން ހިންގަމުން ގެންދާ އެއަރޕޯޓުތައް ދެމެހެއްޓެނިވި ގޮތެއްގައި ތަރައްގީކޮށް ހިންގަން ޖެހޭކަމަށް ދެކެވަޑައިގަންނަވާތީ އުފެއްދެދި ކުންފުންޏެއް ކަމަށް ވެސް ކުންފުނި އުފައްދަވާ ނެރުއްވި ގަރާރުގައި ރައީސް ވިދާޅުވެފައިވެއެވެ.
އެ ކުންފުންޏަކީ އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ހައްގު ލިބިގެންވާ ވަކި ސިއްކަ އެއް އޮންނަ ގާނޫނީ ޝަހުސެއް ކަމަށް ވަނީ ކަނޑައަޅައިފައެވެ.
ރާއްޖޭގައި އޮތް އެއާޕޯޓްތަކުގެ ތެރެއިން ރީޖަނަލް އެއާޕޯޓްސްއިން މެނޭޖު ކުރަމުން ދިޔައީ ހދ. ހަނިމާދޫ އަދި ކުޅުދުއްފުށި، ށ. ފުނަދޫ، ގދ. ކާޑެއްދޫ އަދި މާވާރުލުގެ އިތުރުން ފުވައްމުލަކު އެއާޕޯޓެވެ. ނ. މާފަރު، ރ. އިފުރު، ބ. ދަރަވަންދޫ އަދި ތ. ތިމަރަފުސި އެއާޕޯޓަކީ އައިލެންޑް އޭވިއޭޝާނުން ހިންގާ އެއަރޕޯޓުތަކެވެ.
ދ.ކުޑަހުވަދޫ އެއަރޕޯޓަކީ ދާލު އެއާޕޯޓް ހޯލްޑިންގްސް ކިޔާ އަމިއްލަ ކުންފުންޏަކުން ހިންގަަމުން އަންނަ އެއަރޕޯޓަކަށް ވާއިރު، އދ. މާމިގިލީ އެއާޕޯޓަކީ ވެސް އަމިއްލަ ކުންފުންޏެއް ކަމުގައިވާ ވިލާ އެއާއިން ހިންގާ އެއާޕޯޓެކެވެ. އަދި ގއ. ކޫއްޑޫ އެއާޕޯޓު ވެސް ހިންގަނީ ޕްރިސްޓީން އައިލެންޑް އިންވެސްޓްމެންޓް ކިޔާ އަމިއްލަ ކުންފުންޏަކުންނެވެ.
