މި އަހަރު ވެސް ސަރުކާރުން ރޯދަ ހަދިޔާގެ ގޮތުގައި މަސްދަޅު ކޭހެއް
މި އަހަރު ވެސް ސަރުކާރުން ރޯދަ ހަދިޔާގެ ގޮތުގައި ކޮންމެ ގޭބިސީއަކަށް މަސްދަޅު ކޭހެއް ދިނުމަށް ނިންމާފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
ސަރުކާރުން ކަނޑައަޅާފައިވާ ގޮތުން ރޯދަ ހަދިޔާ ދިނުމަށް ގޭބިސީއެއްގެ ގޮތުގައި ބެލެވޭނީ، އެއް ގޭބިސީގައި ދިރިއުޅުނު ކަމުގައި ވީނަމަވެސް ވަކިން ކައްކާ ކައިބޮއެ ހަދާ ކޮންމެ ޢާއިލާއަކީ ވަކި ގޭބިސީއެއްގެ ގޮތުގަކަމަށް ވަޒީރު ވިދާޅުވިއެވެ. އަދި މިއިން ކޮންމެ ޢާއިލާއަކުން ވެސް ވަކި ގޭބިސީއެއްގެ ގޮތުގައި ފޯމު ހުށަހެޅުމަށް ވަޒީރު އާދަމް ޝަރީފް އިލްތިމާސްކުރައްވައެވެ.
މީގެއިތުރުން، އެ މަނިކުފާނު ވިދާޅުވީ، ރަށްރަށުގެ ކައުންސިލްތަކުން ވަކިވަކި ގޭބިސީތަކުގެ މަޢުލޫމާތުތައް ހޯދައި، ސިޓީތަކާއި ބެހޭ އިދާރާއަށް ހިއްޞާކުރުމަށާއި މިހާރު ވެސް ބައެއް ކައުންސިލްތަކުން ގޭބިސީތަކުގެ މަޢުލޫމާތުތައް ޙިއްޞާކުރަމުންދާކަން ވަޒީރު ފާހަގަ ކުރެއްވިއެވެ.
މިއީ ރައީސުލްޖުމްހޫރިއްޔާގެ ވަޢުދުފުޅުގެ ތެރެއިން ވަޢުދުފުޅެކެވެ. އެގޮތުން، ފާއިތުވި އަހަރު ސަރުކާރުން ރޯދަ ހަދިޔާގެ ގޮތުގައި 180 ގްރާމުގެ، 48 ދަޅު ހިމެނޭ މަސްދަޅު ކޭހެއް ކޮންމެ ގޭބިސީއަކަށް ވަނީ ދީފައެވެ. ޖުމްލަ 111،808 އަށް ވުރެ ގިނަ ގޭބިސީއަށް މަސްދަޅު ކޭސް ވަނީ ހަދިޔާކޮށްފައިވެއެވެ.
