ތިނަދޫގައި ހަށިވިއްކަން ތިބި ބަޔަކު ކުށުގެ ވެށިން ހައްޔަރުކޮށްފި
ގދ. ތިނަދޫގައި ފައިސާއަށް ހަށިވިއްކުމުގެ ޢަމަލު ހިންގަމުން ދަނިކޮށް ކުށުގެ ވެށިން ބަޔަކު ހައްރުކޮށްފިކަމަށް ފުލުހުންގެ ޚިދުމަތުން ބުނެފިއެވެ.
ފުލުހުންގެ ބުނީ، ތިނަދޫގައި ފައިސާއަށް ހަށިވިއްކަމުންދާ ކަމަށް ލިބުނު މަޢުލޫމާތަކާއި ގުޅިގެން 28 ނޮވެމްބަރު ވަނަ ދުވަހުގެ ރޭ 23:30 އެހާއިރު ހިންގި އޮޕަރޭޝަނެއްގައި، އެ ރަށުގެ ގެއެއް ބަލައި ފާސްކޮށް ދެމީހަކު ހައްޔަރުކޮށްފައިވާ ކަމަށެވެ. ފުލުހުންގެ ހައްޔަރަށް ގެނެވުނީ ދިވެހި ފިރިހެނެއް (52އ) އަދި ތައިލެންޑް އަންހެނެއް (39އ) ކަމަށާއި އެ ދެ މީހުން ވެސް ހައްޔަރުކުރީ ބަދުއަޚްލާޤީ ޢަމަލު ހިންގަން ތިއްބާކަމަށް ފުލުހުން މަޢުލޫމާތުދެއެވެ.
މި މައްސަލާގައި އެ ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ ދިވެހި ފިރިހެންމީހާ ކަފާލާތުގެ ދަށުން ދޫކޮށްލާފައިކަމަށާއި ތައިލެންޑް އަންހެންމީހާއަށް ވަނީ 4 ދުވަހަށް ބަންދު ކުރުމަށް އަމުރުކޮށްފައި ކަމަށް ފުލުހުން ބުނެއެވެ.
ފުލުހުންދަނީ މި މައްސަލަ އިތުރަށް ތަޙްޤީޤު ކުރަމުންނެވެ.
