މިސްރާބުހުރީ އެކަކުވެސް ބާކީ ނުވާ މުޖުތަމުއެއް ބިނާކުރުމަށް: ސާޖިދާ
މިސްރާބުހުރީ އެކަކުވެސް ބާކީ ނުވާ މުޖުތަމުއެއް ބިނާ ކުރުމަށްކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.
ސާޖިދާ އެފަދައިން ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ލިޔުން ހަވާލުކުރުމަށް، އެޗްޑީސީގެ ފަރާތުން މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ޝާމިލު މުޖުތަމައުއެއް ބިނާކުރުން ފަދަ ކަންކަމުގައި ގައުމަށް ގެނެވޭ އިސްލާހީ ފިޔަވަޅުތަކުގެ މައްޗަށް އަލިއަޅުއްވާލައްވައި، އެންމެން އެކުގައި މަސައްކަތްކުރުމުގެ މުހިންމުކަން ސާޖިދާ ފާހަގަކުރެއްވި އެވެ. އަދި ދިވެހީންގެ ކިބައިގައި ވާ އެއްބައިވަންތަކަމާއި، އެއްބައެއްވަންތަކަމުގެ ސިފަތަކާއި ޝުއޫރުތައް ހިތްމައްޗަށް ގެނެސް، އެ ގޮތުގައި ގައުމާއިގެން ކުރިއަށްދިއުމަކީ، މުސްތަގުބަލަށްޓަކައި އެޅޭ މުހިންމު ފިޔަވަޅެއްކަމަށް އެކަމަނާ ވިދާޅުވިއެވެ.
އެކަމަކާ ވިދާޅުވީ އަމިއްލަ މަސައްކަތުން އަމިއްލަ އަސާސީ ކަންކަން ފުއްދުމުގެ ޝަރަފުވެރި ފުރުސަތަކީ، ނުކުޅެދުންތެރިކަން ހުންނަ ފަރާތްތަކުގެ މުޅި ދިރިއުޅުމަށް ހެޔޮ ބަދަލަކާއި ހިތްހަމަޖެހުމެއް ގެނެސްދޭނެކަމެއް ކަމަށެވެ.
އަދި މި ސަރުކާރުން އެފަދަ ފަރާތްތަކަށް ބައްލަވާ އިހުސާންތެރި ނަޒަރާއި، އެ ފަރާތްތަކަށް ދެއްވާ ހާއްސަ އިސްކަން ސާޖިދާ ފާހަގަކުރެއްވިއެވެ. އަދި އެއާއެކު މިއަދު ރާއްޖެ މިސްރާބުވެފައިވަނީ، އެންމެން ބައިވެރިވާ، އެކަކުވެސް ބާކީ ނުވާ މުޖުތަމައެއް ބިނާކޮށް، ހުރިހާ މާނައެއްގައި ދިވެހީންގެ ގައުމެއް ބިނާކުރުމާ ދިމާއަށްކަމަށް ވެސް ސާޖިދާ ވިދާޅުވި އެވެ.
މިއަދުގެ ރަސްމިއްޔާތުގައި ސާޖިދާ ވަނީ އެޗްޑީސީގެ ވަޒީފާއާ ގުޅިވަޑައިގެންނެވި، ނުކުޅެދުންތެރިކަން ހުންނަ 30 ފަރާތަށް ވަޒީފާގެ ލިޔުން ވެސް ހަވާލުކޮށްދެއްވާފަ އެވެ.
