ސައިފަށް ހަމަލާ ދިނުމުގައި ބައިވަރު މީހުން ބައިވެރިވާކަމުގެ ތުހުމަތު
ބޮލީވުޑްގެ މަޝްހޫރު ތަރި، ސައިފް އަލީ ހާންގެ ގެއަށް ވަދެ، އޭނާއަށް މީގެ އަހަރެއް ކުރިން ވަޅިން ހަމަލާދިން މައްސަލައިގައި ގިނަ ބައެއްގެ ބައިވެރިވުން އޮތް ކަމަށް ތަހުގީގަށް ފާހަގަވެފައިވާ ކަމަށް ރިޕޯޓުތައް ބުނެފިއެވެ.
މިދިޔަ އަހަރުގެ ޖެނުވަރީ މަހު ސައިފްގެ ގެއަށް ވައްކަން ކުރަން ވަތް މީހަކު ވަނީ އޭނާއަށް ވަޅިން ހަމަލާދިނުމަށްފަހު އެތަނުން ފިލައިފައެވެ. އެމީހާ އެގެއަށް ވަދެފައިވަނީ ވަލު ދޮރާށިންނެވެ.
އެގެއަށް ވަތް މީހާ ދެނެގަނެ، ހަމަލާދިންތާ 70 ގަޑިއިރުގެ ތެރޭގައި އެމީހާ ވަނީ ހައްޔަރުކޮށްފައެވެ. އެއީ ބަންގްލަދޭޝްއަށް ނިސްބަތްވާ އުމުރުން 30 އަހަރިގެ ޝަރިފުލް މުހައްމަދު އަމީން ފާކިރް ކިޔާ މީހެކެވެ.
އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ސައިފަށް އެމީހާ ފެނުނުއިރު ހުރީ އޭނާގެ ހަގު ދަރިފުޅު ޖަހަންގިރްގެ ކޮޓަރީގައެވެ. އެހެންކަމުން މިއީ ކިޑްނޭޕިންގެ މައްސަލައަކަށް ވެދާނެ ކަމަށް ވެސް ރިޕޯޓުތައް ބުނެއެވެ.
ޝައިފުލްގެ ބަންދު އިތުރުކުރުމަށް އިއްޔެ ބޭއްވި ކޯޓުގެ އަޑުއެހުމުގައި، މި މައްސަލައިގައި ގިނަ ބައެއްގެ ބައިވެރިވުން އޮވެދާނެ ކަމުގެ ތުހުމަތު ކުރެވޭތީ އޭނާ ބަންދުން ދޫނުކޮށްލަން ފުލުހުން އެދިފައިވާ ކަމަށް ރިޕޯޓުތައް ބުނެއެވެ.
އެހެންކަމުން ކޯޓުން ވަނީ ޝަރިފުލްގެ ބަންދުގެ މުއްދަތު އިތުރުކޮށްފައެވެ. މައްސަލައިގެ ތަހުގީގު އަދިވެސް ކުރަމުންދާތީ، މިހާތަނަށް ފުލުހުން އިތުރު ތަފްސީލު ހާމަކޮށްފައެއް ނުވެއެވެ.
މި ހާދިސާގައި ސައިފްގެ ފުރާނައަށް ނުރައްކާވާފަދަ ހަމަލާއެއް ނުލިބެއެވެ. ނަމަވެސް ލިބުނު އަނިޔާތަކުގެ ސަބަބުން ބައެއް ސާޖަރީތައްވަނީ ކޮށްފައެވެ. މި ހާދިސާއާ ގުޅިގެން ސައިފްގެ އާއިލާ ދިރިއުޅޭ ގޭގެ ސެކިއުރިޓީ ވަނީ ވަރަށް ބޮޑަށް ވަރުގަދަކޮށްފައެވެ.
Ads by STO
