ލޯކަލް ކައުންސިލް އިންތިހާބުގައި ވާދަކުރަން ފޯމު ހުށަހެޅޭ ވަގުތު އިތުރުކޮށްފި
ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރަން ބޭނުންވާ ފަރާތްތަކުން އެކަމަށް އެދި ފޯމު ހުށަހެޅޭ ވަގުތު އިތުރުކޮށްފިއެވެ.
ހަމައެކަނި އީފާސް މެދުވެރިކޮށް އެ އިންތިހާބުގައި ޥާދަކުރުމަށް ފޯމު ހުށަހެޅުމުގެ ފުރުސަތު އިލެކްޝަންސް ކޮމިޝަން(އީސީ)އިން ހުޅުވާލީ މި މަހުގެ 17 ވަނަ ދުވަހުއެވެ. އެއީ އަންނަ މަހުގެ އެއްވަނަ ދުވަހާ ހަމައަށެވެ.
އިލެކްޝަންސް ކޮމިޝަންއިން މިއަދު ކުރި އިއުލާނެއްގައި ބުނީ އިންތިހާބުގައި ވާދަކުރަން ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު ދެގަޑިއިރަށް އިތުރުކޮށްފައިވާ ކަމަށެވެ.
އެގޮތުން މިއަދުން ފެށިގެން އަންނަ މަހުގެ އެއްވަނަ ދުވަހާ ހަމައަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 05:30 އަށް އަދި ހުކުރު ދުވަހު މެންދުރުފަހު 03:30 އިން ރޭގަނޑު 08:00 އަށް މިހާރު ފޯމު ހުށަހެޅޭނެ ކަމަށް ވެސް އީސީން ބުންޏެވެ.
ލޯކަލް ކައުންސިލްއާއި އަންހެނުން ކޮމިޓީތަކުގެ އިންތިހާބު ބާއްވަން އީސީއިން ނިންމައިފައި ވަނީ އަންނަ އޭޕްރީލް މަހުގެ ހަތަރުވަނަ ދުވަހުއެވެ. އަދި އިންތިހާއަށް ތައްޔާރުވުމަށް ދުރާލައި އީސީން ވަނީ މަސައްކަތް ވެސް ފަށައިފައެވެ.
އިންތިހާބުގައި ވާދަކުރަން މިހާރުވެސް 2000އަށް ވުރެ ގިނަ ފަރާތަކުން ވަނީ ފޯމު ހުށަހަޅައިފައެވެ.
