ތަށި ދޮންނަންވީ އަތަށް އަންގި ލައްވައިގެން
ބަދިގޭގައި ބޭނުންކުރާ ތެލި،ތަށި ދޮވުމަކީ ގިނަ ބަޔަކަށް ވަރަށް ބުރަ ބޮޑު ކަމެކެވެ. އަވަސް އަރުވާލާފައި ޑިޓަޖެންޓް ބޭނުންކޮށްގެން އެތަކެތި ދޮންނަނީ އެންމެ ރަނގަޅު ގޮތަށް ހެއްޔެވެ؟
ގިނަ މީހުން ތަށި ދޮންނަނީ ހުސްއަތާ ސްޕޮންޖު ފާޑުގެ އެއްޗެއް ބޭނުންކޮށްގެންނެވެ. އެ ތަކެތި ދޮންނައިރު އެ ތަކެތިން ނުކުންނަ ހުރިހާ ހަޑިއެއްގެ އިތުރުން ޑިޓަޖެންޓް ވެސް އެންމެ ފަސޭހައިން ހޭކެނީ އަތުގައެވެ.
ހަމުގެ ޑޮކްޓަރުން ބުނާ ގޮތުގައި، ތެލި ތަށި ދޮންނައިރު އަތަށް އަންގިއެއް ލެއްވުމަކީ ވަރަށް މުހިންމު ކަމެކެވެ. ހާއްސަކޮށް އެއްފަހަރާ ވަރަށް ބައިވަރު ނުވަތަ ގިނައިން ފެނުގައި އަތް ގެންގުޅެން ޖެހޭ މީހުންނަށް އަންގިއަކީ ވަރަށް މުހިންމު އެއްޗެކެވެ.
ތަށި ދޮންނަ ޑިޓަޖެންޓަކީ އެކި ކަހަލަ ބާރުގަދަ ކެމިކަލްތައް އެކުލެވޭ އެއްޗިއްސެވެ. އޭގެ ސަބަބުން ހަންގަނޑު ހިކި، ކެހުން ފަދަ ކަންކަން ދިމާވެއެވެ. އޭގެ އިތުރުން ނިޔަފަތިތައް އަވަހަށް ހަލާކުވެއެވެ.
އަތަށް އަންގި އެރުވުމުގެ ސަބަބުން ހުރިހާ ގޮތަކުން ވެސް އަތް ރައްކާތެރިކޮށްދެއެވެ. ތަށި ދޮންނަން ބޭނުންކުރާ ސްޕޮންޖުގައި ވެސް އެތައް ޖަރާސީމެއް ހަރުލާފައި ހުންނައިރު، އެ ހުރިހާ ޖަރާސީމަކުން އަތް ރައްކާތެރިކޮށްދެއެވެ. ހާއްސަ ގޮތެއްގައި ހަމުގެ މައްސަލަތައް ހުންނަ މީހުންނަށް މިއަށް ވުރެ ރައްކާތެރި ގޮތެއް ނެތެވެ.
އޭގެ އިތުރުން ފާހާނާއާއި ސިންކު ސާފުކުރާއިރު ވެސް އަންގި ބޭނުން ކުރުމަކީ މުހިންމު ކަމެކެވެ.
ޑޮކްޓަރުން ލަފާދެނީ އެތެރެއަށް ފެން ނުވަންނަ ނުވަތް ވޯޓާ ޕްރޫޕް އަންގި ބޭނުން ކުރުމަށެވެ. ތަށި ދޮވެ ނިންމާލުމަށް ފަހު އަންގީގެ ބޭރު ރީއްޗަށް ދޮވެލުމަށް ފަހު ހިއްކަން ބާއްވާނީއެވެ. އަދި އޭގެ ފަހުގައި އަތް ރަނގަޅަށް މޮއިސްޗަރައިޒް ކޮށްލަންވާނެ ކަމަށް ވެސް ޑޮކްޓަރުން ބުނެއެވެ.
Ads by STO
