މީޑިއާތަކަށް ދޭ މާލީ އެހީގެ އުސޫލު އާންމުކޮށްފި
ދައުލަތުގެ ބަޖެޓުން އަމިއްލަ މީޑިއާތަކަށް މާލީ އެހީ ދިނުމަށް ކަނޑައަޅާފައިވާ އުސޫލު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން މިއަދު އާންމުކޮށްފިއެވެ.

ދައުލަތުގެ ބަޖެޓުން އަމިއްލަ މީޑިއާތަކަށް މާލީ އެހީ ފޯރުކޮށްދިނުމަށް އެކުލަވާލި އުސޫލު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން މިއަދު ވަނީ އާންމުކޮށްފައެވެ.
މި މަސައްކަތް ކުރިން ޒުވާނުން ބާރުވެރިކުރުވުމާއި މައުލޫމާތާއި ފަންނާ ބެހޭ ވުޒާރާއިން ކުރިއަށް ގެންދިޔަ ނަމަވެސް، ހުރިހާ އިންތިޒާމެއް މިހާރު ވަނީ މިނިވަން މުއައްސަސާއެއް ކަމަށްވާ މީޑިއާ ކޮމިޝަނާ ހަވާލުކޮށްފައެވެ.
މި އުސޫލުގެ ދަށުން އެހީއަށް އެދި ހުށަހެޅޭނީ ރަޖިސްޓްރީކޮށްގެން ނުވަތަ ލައިސަންސް އޮވެގެން ހިންގާތާ އެއް އަހަރު ވެފައިވާ މީޑިއާތަކަށެވެ. އަދި ކުރިން މިފަދަ އެހީއެއް ލިބިފައިވާ މީޑިއާއެއް ނަމަ، އެ ފައިސާ ބޭނުންކުރި ގޮތުގެ މާލީ ބަޔާނެއް ހުށަހަޅަން ޖެހޭނެއެވެ. އަންނަ އަހަރުން ފެށިގެން މުވައްޒަފުންނަށް މުސާރަ ޖަމާކުރާކަން އަންގައިދޭ ބޭންކު ލިޔުމެއް ވެސް ހުށަހަޅަން ޖެހޭއިރު، އެއް ކުންފުންޏަކުން ގިނަ މީޑިއާތަކެއް ހިންގި ނަމަވެސް ފައިސާ ދޫކުރާނީ އެފަރާތަކުން އިހުތިޔާރުކުރާ އެންމެ މީޑިއާއަކަށެވެ.
މާލީ އެހީ ދިނުމުގައި މާކުސް ދޭނީ މީޑިއާ ހިންގި މުއްދަތާއި، މުވައްޒަފުންގެ އަދަދާއި ތައުލީމުގެ އިތުރުން ވިޔަފާރި ޕްލޭނާއި ކޮންޓެންޓުގެ ފެންވަރަށް ބަލައިގެންނެވެ. އެހީ ލިބޭނީ ޖުމުލަ 50 މާކުހަށް ވުރެ މަތިން ހޯދާ މީޑިއާތަކަށެވެ. މީގެ އިތުރުން، ވޭތުވެދިޔަ ދެ އަހަރު ތެރޭގައި އެ މީޑިއާއަކާ މެދު ކޮމިޝަނުން ފިޔަވަޅެއް އަޅައި އާންމުކޮށްފައިވާ ނަމަ، ކޮންމެ ފިޔަވަޅަކަށް ތިން މާކުސް އުނިކުރާނެއެވެ.
އެހީއަށް ކުރިމަތިލުމާއި ޝަކުވާ ހުށަހެޅުން ކުރިއަށްދާނީ ހާއްސަ ޕޯޓަލެއް މެދުވެރިކޮށެވެ. މީޑިއާތަކަށް ދައުލަތުގެ ބަޖެޓުގެ 0.1 އިންސައްތަ ކަނޑައެޅުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. ސަރުކާރުގެ މަގުސަދަކީ އަމިއްލަ މީޑިއާތަކަކީ ނުފޫޒެއް ނެތި މިނިވަންކަމާއެކު ހިންގޭ މާލީ ގޮތުން ފުދުންތެރި ބަޔަކަށް ހަދައި، ނޫސްވެރިކަމަކީ އިތުބާރު ހުރި ސިނާއަތަކަށް ހެދުމެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.