ހުޅުމާލޭގައި އަލިފާނުގެ ޙާދިޞާއެއް ހިނގައި، 5 މީހަކަށް ބޯހިޔާވަހިކަން ފޯރުކޮށްދީފި
ރޭ ހުޅުމާލެ ފުރަތަމަ ފިޔަވަހީގައި އަލިފާނުގެ ޙާދިޞާއެއް ހިނގައި، ޙާލުގައި ޖެހުނު ޢާއިލާއެއްގެ 5މީހަކަށް ވަގުތީ ބޯހިޔާވަހިކަން ފޯރުކޮށްދީފިއެވެ.
ޤައުމީ ދިފާއީ ބާރުން ބުނީ، ރޭ 23:00ހާއިރު ހުޅުމާލެ ފުރަތަމަ ފިޔަވަހީގައި ހުންނަ ވަން އެވެނިއު އިމާރާތުގެ ހަތްވަނަ ފަންގިފިލާގެ އެޕާޓްމަންޓެއްގައި އަލިފާނުގެ ހާދިސާއެއް ހިނގާފައިވާކަމަށެވެ. އަދި މި ޙާދިޞާގައި އެ އެޕާޓްމަންޓުގެ ބަދިގެ ބޭނުން ނުކުރޭވަރަށް އަނދާފައިވާ ކަމަށް ވެސް ދިފާއީ ބާރުން މަޢުލޫމާތުދެއެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން (އެމްޑީއެމްއޭ)އިން ބުނީ، މި ޙާދިޞާގައި ޙާލުގައި ޖެހުނު ޢާއިލާއަށް ބޭނުންވާ ކެއިން ބުއިމާއި ވަގުތީ ބޯހިޔާވަހިކަމުގެ އެހީތެރިކަން ފޯރުކޮށްދީފައިވާ ކަމަށާއި މި ޢާއިލާގައި އުމުރުންދުވަސްވީ މީހަކާއި ނޭވާލުމުގެ ނިޒާމުގެ މައްސަލަ ހުންނަ ކުޑަކުއްޖަކު ވެސް ހިމެނޭ ކަމަށެވެ. މި ޙާދިޞާގައި އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.
