ދިވެހި އަސްކަރިއްޔާގެ ފަޚުރުވެރި ސިފައިންގެ ދުވަސް ފާހަގަކުރުމުގެ ގޮތުން ދިދަ ނެގުމުގެ ޚާއްޞަ ރަސްމިއްޔާތެއް ބާއްވައިފި

ދިވެހި އަސްކަރިއްޔާގެ ފަޚުރުވެރި ސިފައިންގެ ދުވަސް ފާހަގަކުރުމުގެ ގޮތުން ދިދަ ނެގުމުގެ ޚާއްޞަ ރަސްމިއްޔާތެއް ބާއްވައިފިއެވެ.

މި ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަތަނީ ޚިދުމަތާ ބެހޭ ވަޒީރު އޮނަރަބަލް ޙަސަން ރަޝީދެވެ. މި އިޙްތިފާލުގެ ތެރެއިން، މިއަހަރަށް ޤައުމީ ދިފާޢީ ބާރުން ކަނޑައަޅާފައިވާ ރަސްމީ ޝިޢާރު ކަމަށްވާ "އަސްކަރީ އަޚުލާޤު – ސިފައިންގެ ކުރިއެރުން" ވަނީ ދިފާޢީ ވަޒީރު ރަސްމީކޮށް އިޢުލާންކޮށްދެއްވާފައެވެ.

https://twitter.com/MNDF_Official/status/2046455090576609618

މި މުހިންމު ޙަރަކާތުގައި ޤައުމީ ދިފާޢީ ބާރުގެ އެންމެ އިސްވެރިންގެ ގޮތުގައި ހިމެނިވަޑައިގަންނަވާ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީއާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާޘް ވަނީ ބައިވެރިވެވަޑައިގެންފައެވެ. މީގެ އިތުރުން ވެސް، ސިފައިންގެ ޖެނެރަލް އޮފިސަރުންނާއި، ސާޖަންޓް މޭޖަރ އޮފް އެމްއެންޑީއެފް އަދުނާން ޢަލީގެ އިތުރުން އެކިއެކި ރޭންކުތަކުގެ އޮފިސަރުންނާއި، ވޮރަންޓް އޮފިސަރުން އަދި އެންލިސްޓެޑް ސިފައިން މި ރަސްމިއްޔާތަށް ހާޒިރުވެ ތިއްބެވިއެވެ.

މާލޭގެ އިތުރުން، ރާއްޖޭގެ އެކި ކަންކޮޅުތަކުގައި ޤާއިމުކުރެވިފައިވާ ސިފައިންގެ އޭރިއާ ކޮމާންޑްތަކުގެ މަރުކަޒުތަކުގައި ވެސް މި ދުވަހާ ގުޅިގެން ދިދަ ނެގުމުގެ ޙަރަކާތްތައް ވަނީ ކުރިއަށް ގެންގޮސްފައެވެ.