"ވިލާ އެއަރ" އަށް ކާޑެއްދޫ އެއާޕޯޓު ދޭން ކުރި ހުކުމް ސުޕްރީމް ކޯޓުގައި އިސްތިއުނާފު ކޮށްފި
ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމްގެ "ވިލާ އެއާރ" އަށް ގދ. ކާޑެއްދޫ އެއާޕޯޓު އަނބުރާ ދޭން ކުރި ހުކުމް ދައުލަތުގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފިި އެވެ.
މިމައްސަލައިގައި މިއަދު ސުޕްރީމް ކޯޓުގައި އަޑުއުހުމެއް ވެސް ތާވަލު ކުރިއެވެ. ނަމަވެސް ފަހުން އެއަޑުއެހުން ވަނީ ކެންސަލް ކޮށްފައެވެ.
ކާޑެއްދޫ އެއާޕޯޓު ތަރައްޤީ ކުރުމަށް ގާސިމްގެ ވިލާ އެއަރ އާއި ހަވާލު ކުރީ 50 އަހަރުގެ މުއްދަތަކަށް ހެދި އެއްބަސްވުމެއްގެ ދަށުންނެވެ. ނަމަވެސް އެއެއްބަސްވުން ބާތިލުކޮށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ސަތުކާރުން ވަނީ އެއެއާޕޯޓު އަތުލާފައެވެ.
ސަރުކާރުން އެ އެއްބަސްވުން ބާތިލުކުރީ ގާނޫނާ ހިލާފަށް ކަމަށާއި، އެހެންކަމުން އެތަން އަނބުރާ ވިލާ އެއާ އަށް ހަވާލުކުރުމަށް 2018 ވަނަ އަހަރު ސިވިލް ކޯޓުން ވަނީ ހުކުމްކޮށްފައެވެ.
ސިވިލް ކޯޓުގެ ހުކުމަށް ހައިކޯޓުން ވެސް ތާއީދު ކޮށްފައިވާއިރު، ދައުލަތުގެ ފަރާތުން ވަނީ އެހުކުމް ސުޕްރީމް ކޯޓުގައި އިސްތިއުނާފު ކޮށްފައެވެ.
