އިންޑިއާއިން އިބޯލާ ވެކްސިން އުފެއްދުމުގެ މަސައްކަތް ހަލުވިކޮށްފި
ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އަދި އެފްރިކާ ސީޑީސީގެ އެހީތެރިކަމާއެކު، އިންޑިއާއިން ވަނީ އިބޯލާ ވައިރަހާ ދެކޮޅަށް ވެކްސިން އުފެއްދުމުގެ މުހިންމު އަދި ބޮޑު މަސައްކަތަކާ ހަވާލުވެފައެވެ. 2026 ވަނަ އަހަރުގެ މެއި މަހުގެ މެދުތެރޭގައި ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) ގައި ފެތުރެން ފެށި މި ނުރައްކާތެރި ބައްޔާ ގުޅިގެން، ހާއްސަކޮށް މެދުތެރޭ އެފްރިކާގެ ސަރަހައްދުގައި ބަލި ފެތުރުމުގެ ނުރައްކާ ބޮޑުވުމުން، ގިނަ ގައުމުތަކަކުން ދަނީ ބަލި ފާރަވެރިވުމުގެ ފިޔަވަޅުތައް ވަރުގަދަކޮށް ބޯޑަރު ކޮންޓްރޯލް ކުރުން ހަރުކަށިކުރަމުންނެވެ.
މެއި މަހު ޑަބްލިޔުއެޗްއޯއިން ވަނީ މި ބަލިމަޑުކަމަކީ ބައިނަލްއަގުވާމީ ފެންވަރުގައި ކަންބޮޑުވާންޖެހޭ 'އާންމު ސިއްހަތުގެ ކުއްލި ނުރައްކަލުގެ ހާލަތެއް' ކަމުގައި ކަނޑައަޅާފައެވެ. އަދި ބޯޑަރު ހުރަސްކޮށް މީހުން ދަތުރުކުރުން މޮނިޓަރކޮށް، ބަލި ފެތުރުން ކޮންޓްރޯލް ކުރުމުގެ މުހިންމުކަން ވަނީ ފާހަގަކޮށްފައެވެ. ޝައްކުކުރެވޭ ކޭސްތައް ދެނެގަނެ، އެކަން ކޮންޓްރޯލް ކުރުމަށްޓަކައި ގިނަ ގައުމުތަކަކުން ވަނީ ސްކްރީން ކުރުމުގެ އުސޫލުތައް މުރާޖާކޮށް ހަރުދަނާކޮށްފައެވެ.
ސީރަމް އިންސްޓިޓިއުޓް އޮފް އިންޑިއާ (އެސްއައިއައި) އިން ދަނީ ޔުނިވަރސިޓީ އޮފް އޮކްސްފޯޑް އަދި ސީއީޕީއައި އާ ގުޅިގެން، އިބޯލާ ވައިރަހުގެ 'ބުންޑިބުގްޔޯ' ސްޓްރެއިންއަށް އަމާޒުކޮށްގެން އައު ވެކްސިނެއް ތައްޔާރުކުރުމުގެ މަސައްކަތް ކުރަމުންނެވެ. މި ސްޓްރެއިންއަށް ޚާއްސަކޮށްގެން މިހާތަނަށް ފާސްކޮށްފައިވާ އެއްވެސް ވެކްސިނެއް ނެތުމުން، ވައިރަލް ވެކްޓަރ ޕްލެޓްފޯމް ބޭނުންކޮށްގެން އެސްއައިއައި އިން ދަނީ ވެކްސިން އުފެއްދުމުގެ މަސައްކަތް ވަރަށް ބޮޑަށް އަވަސްކުރަމުންނެވެ.
ވެކްސިން ތައްޔާރުކުރުން އަވަސްކުރުން:
މިހާރު މެދުތެރޭ އެފްރިކާގައި ފެތުރެމުންދާ ނުރައްކާތެރި ބުންޑިބުގްޔޯ އިބޯލާ ވައިރަހުން ރައްކާތެރިވުމަށް އުފައްދާ ވެކްސިނަށް ދީފައިވާ ނަމަކީ 'ސީއެޗްއޭޑީއޯއެކްސް1 ބީޑީބީވީ' އެވެ. މިއީ އޮކްސްފޯޑް އަދި އެސްޓްރާޒެނެކާގެ ކޮވިޑް-19 ވެކްސިން އުފެއްދުމުގައިވެސް ބޭނުންކުރި ވައިރަލް ވެކްޓަރ ޕްލެޓްފޯމް ބޭނުންކޮށްގެން އުފައްދާ ވެކްސިނަކަށް ވުމާއެކު، ކްލިނިކަލް މަރުހަލާގެ ތަކެތި ތައްޔާރުވުމުން ވަރަށް އަވަހަށް ގިނަ އަދަދަކަށް ވެކްސިން އުފެއްދުމުގެ ފުރުސަތު ލިބިގެންދާނެއެވެ. މީގެ އިތުރުން، ޑަބްލިޔުއެޗްއޯއިން ވަނީ މީގެ އިވެލުއޭޝަން މަރުހަލާ އަވަސްކޮށްފައެވެ. އަދި ކްލިނިކަލް ޓްރަޔަލްތަކަށް ބޭނުންވާ ޑޯޒްތައް ވަރަށް އަވަހަށް ލިބެން ހުންނާނެކަމަށް ބެލެވެއެވެ.
އިންޑިއާގެ ރައްކާތެރިކަމުގެ ފިޔަވަޅުތައް:
އިންޑިއާގައި މިހާތަނަށް އިބޯލާ ވައިރަހުގެ އެއްވެސް އެކްޓިވް ކޭހެއް ރިޕޯޓުކޮށްފައެއް ނުވެއެވެ. ނަމަވެސް، އިންޑިއާގެ ސިއްހީ އިދާރާތަކުންނާއި އެއަރޕޯޓުތަކުން ވަނީ ހާއްސަ ފެސިލިޓީތަކާއެކު ސަމާލުކަން އިތުރުކޮށްފައެވެ. މީގެ ތެރޭގައި ޑީއާރުސީ އަދި ޔުގެންޑާ ފަދަ ބަލި ފެތުރިފައިވާ ގައުމުތަކުން އަންނަ ފަރާތްތަކާއި، ބައްޔަށް ޝައްކުކުރެވޭ ފަރާތްތައް ސްކްރީން ކުރުމާއި އެކަހެރި ކުރުމުގެ އުސޫލުތައް ހިމެނެއެވެ.
ބައިނަލްއަގުވާމީ މަސައްކަތްތައް:
ކުރިންވެސް އިބޯލާ ފެތުރުނު ގޮތަށް، މިފަހަރުގެ އައުޓްބްރޭކް އަހަރުތަކަކަށް ދެމިގެންދިޔަ ނުދިނުމަށްޓަކައި، ސައިންސްވެރިންނާއި ވެކްސިން އުފައްދާ ކުންފުނިތަކުން ދަނީ ވެކްސިން ފަރުމާކޮށް، ޓެސްޓުކޮށް އަދި އުފެއްދުމަށް އަވަސްވެގަނެފައެވެ. މުޅި ދުނިޔޭގެ ސިއްހީ ތަޖުރިބާކާރުންވެސް ގަބޫލުކުރައްވާ ގޮތުގައި އިބޯލާ އަކީ މުޅި ދުނިޔެއަށް އޮތް ބޮޑު ނުރައްކަލެކެވެ.
ޑަބްލިޔުއެޗްއޯގެ ޑިރެކްޓަރ-ޖެނެރަލް ޓެޑްރޯސް އަދަނޯމް ގެބްރިއޭސުސް ވަނީ ޑީއާރުސީއަށް ވަޑައިގެން އިޓޫރީ ޕްރޮވިންސަށް ޒިޔާރަތްކުރައްވާފައެވެ. އެއަށްފަހު އޭނާ ވިދާޅުވީ، "ބުންޑިބުގްޔޯ ވެކްސިނެއްގެ ސަބަބުން މި ބަލިމަޑުކަން ކޮންޓްރޯލް ކުރުމަށް އެހީތެރިވެދީ، ކުރިމަގުގައި އަތުވެދާނެ މިފަދަ ހާލަތްތަކަށް ތައްޔާރުވުން ހަރުދަނާވެގެންދާނެ" ކަމަށެވެ. ގޮންޖެހުންތަކެއް ހުރި ނަމަވެސް، މި ބަލިމަޑުކަން ހުއްޓުވޭނެކަމުގެ ޔަގީންކަމާއި އުންމީދު އޭނާ ފާޅުކުރެއްވިއެވެ. އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންގެ ޑިރެކްޓަރ ޖެނެރަލް ޖީން ކަސޭޔާ ފަހުން ވަނީ، މި ވެކްސިންތައް އުފައްދާނީ ސީރަމް އިންސްޓިޓިއުޓް އޮފް އިންޑިއާއިންކަން ކަށަވަރުކޮށްދެއްވާފައެވެ.
ތަފާތު ވައިރަހެއް، ތަފާތު ގޮންޖެހުމެއް:
މި ބަލި ފެތުރެން ފެށިފަހުން، ޑީއާރުސީ އަދި ޔުގެންޑާގައި ޝައްކުކުރެވޭ 1500 އަށްވުރެ ގިނަ ކޭސް އާއި 650 މަރު ވަނީ ރިޕޯޓުކޮށްފައެވެ. ސިއްހީ ރިޕޯޓުތައް ބުނާގޮތުން، އެންމެ ފަހުން ފެތުރެމުންދާ މި ބަލީގެ ސަބަބަކީ، އަލަށް ހޯދުނު ބާވަތެއް ކަމަށްވާ ބުންޑިބުގްޔޯ ވައިރަހެވެ. މިއީ ޒައިރޭ ސްޓްރެއިންއާ އަޅާބަލާއިރު ފުރާނައަށް ނުރައްކާ ކުޑަ ވައިރަހެއް ނަމަވެސް، މިއަށް ފާސްކޮށްފައިވާ ވެކްސިނެއް ނުވަތަ ފަރުވާއެއް އަދި ނެތެވެ. މިފަހަރުގެ ގިނަ ކޭސްތައް ޑީއާރުސީއިން ފެނިފައިވާއިރު، މިއީ 1976 ވަނަ އަހަރު އިބޯލާ ކޯރުން މި ވައިރަސް ފުރަތަމަ ފެނުނު ފަހުން އެގައުމުގައި މި ބަލި ފެތުރުނު 17 ވަނަ ފަހަރެވެ.
މަދު ނުވާވަރަށް ގުދުރަތީ ވަސީލަތްތައް ހުރި ނަމަވެސް، މެދުތެރޭ އެފްރިކާގައި އޮންނަ ޑިމޮކްރެޓިކް ރިޕަބްލިކް އޮފް ކޮންގޯއަކީ، ދުނިޔޭގެ އެންމެ ނުރައްކާތެރި އަދި އެންމެ އުނދަގޫ އިންސާނީ ކާރިސާތައް އެތައް ދިހަ އަހަރެއް ވަންދެން ތަހައްމަލުކުރަމުންދާ ގައުމެކެވެ.
