އިބްތިހާލްގެ މައްސަލައާއި ގުޅިގެން ވަކިކުރި މުވައްޒަފަކަށް އަލުން ވަޒީފާ ދޭން އަންގައިފި
މީގެ ފަސް އަހަރު ކުރިން، އަމިއްލަ މަންމަގެ އަނިޔާތަކުގެ ސަބަބުން ނިޔާވި އުމުރުން ތިން އަހަރުގެ މުޙައްމަދު އިބްތިހާލުގެ މައްސަލައިގައި އިހުމާލުވި ކަމަށް ބުނެ ޖެންޑާ މިނިސްޓްރީގެ މުވައްޒަފަކު ވަޒީފާއިން ވަކިކުރީ ގާނޫނާ ހިލާފަށް ކަމަށް ބުނެ، އޭނާއަށް ވަޒީފާ އަނބުރާ ދޭން ސުޕްރީމް ކޯޓުން ހުކުމް ކޮށްފިއެވެ.
އިބްތިހާލަށް ރައްކާތެރިކަން ދިނުމަށް ފިޔަވަޅު އެޅުމުގައި އިހުމާލުވެފައިވާ ކަމަށް ބުނެ އެމައްސަލައިގައި ވަޒީފާއިން ވަކިކޮށްފައި ވަނީ ޖެންޑާ މިނިސްޓްރީގެ ދަށުން ހިންގާ ވ. އަތޮޅު ފެމިލީ އެންޑް ޗައިލްޑް ޕްރޮޓެކްޝަން ސެންޓަރުގެ މުވައްޒަފެކެވެ.
މީގެކުރިން އެމްޕްލޮއިމަންޓް ޓްރައިބިއުނަލް އަދި ހައި ކޯޓުން ވެސް ނިންމާ ހުކުމް ކުރީ އޭނާ ވަޒީފާއިން ވަކިކުރީ ގާނޫނާ ހިލާފަށް ކަމަށާއި ވަޒީފާ އަނބުރާ ދިނުމަށެވެ. ނަމަވެސް ސިވިލް ސާވިސް ކޮމިޝަން (ސީއެސްސީ) އިން ވަނީ ސުޕްރީމް ކޯޓުގައި އެހުކުމް އިސްތިއުނާފު ކޮށްފައެވެ.
މިމައްސަލައިގެ ހުކުމް އިއްވުން މިއަދު އޮތްއިރު، ސުޕްރީމް ކޯޓުން ބުނެފައިވަނީ އިބްތިހާލުގެ މައްސަލައިގައި ވަކި ގޮތަކަށް އަމުރު ކުރަން އެމުވައްޒަފަށް އިރުޝާދު ދީފައިނުވާ ކަމަށެވެ. އަދި އަލަށް ވަޒީފާ އަދާ ކުރަން ފެށި މީހަކަށް އޭނާ ވާއިރު އެފަދަ މައްސަލައެއްގައި އަމަލު ކުރަންވީ ގޮތުގެ ތަމްރީނު ވެސް އޭނާއަށް ދީފައި ނުވާކަން ވެސް ސުޕްރީމް ކޯޓުގެ ހުކުމުގައި ފާހަގަ ކޮށްފައިވެއެވެ.
Ads by STO
