މާގިނައިން އިސްތަށި ފައިބަނީތަ؟ މިއޮތީ ގޭގައި ހުރެގެން ކޮށްލެވިދާނެ ވަރަށް ސަޅި 3 ކަމެއް!

އިސްތަށި ފޭބުމަކީ ގިނަ ބަޔަކަށް ކުރިމަތިވާ މައްސަލައެކެވެ. ހައްލު ހޯދުމަށް އެތައް ބަޔަކު އެތައް ޝޭމްޕޫ ވެސް ބަދަލުކުރެއެވެ. ބައެއްމީހުންނަށް މިކަމުން ކާމިޔާބު ލިބުނު ނަމަވެސް އަނެއްބައި މީހުނަށް މިކަމަށް އަދިވެސް ހައްލެއް ވަނީ ނުލިބިފައެވެ. އެހެންނަމަވެސް ދެން ހައްލު ނެތިފައި ތިބޭނެ ކަމެއް ނެތެވެ. މިއޮތީ ގޭގައި ތިބެ، އިސްތަށި ފޭބުން މަދުކުރުމަށް ކުރެވިދާނެ ވަރަށް ސަޅި 5 ކަމެކެވެ.

އެލޮވެރާ

ގިނަ ބަޔަކަށް އެނގިފައިވާނޭ ފަދައިން އެލޮވެރާއަކީ ހަމަގައިމުވެސް ހަންގަނޑަށް ވަރަށް ފައިދާހުރި އެއްޗެކެވެ. އަދި ބައެއް މީހުން މީގެ ފަނި ގިރައިގެން ވެސް ބޮއެއެވެ. ހަމަ މިފަދައިން އެލޮވެރާއަކީ އިސްތަށިގަނޑު ރީތިކޮށް ބެހެއްޓުމަށާއި، އިސްތަށިގަނޑު ވަރުގަދަކޮށް ބެހެއްޓުމަށް ވަރަށް ބޮޑު އެހީއެއް ވެދޭ އެއްޗެކެވެ. އެއްވެސް ވަރަކަށް ކެމިކަލެއް އެކުނުލެވޭ އެލޮވެރާ ބޭނުން ކޮށްގެން މިކަން ކުރާނެ ގޮތަކީ، އެލޮވެރާގެ ހެޔޮވަރު ވަރަކަށް ބުރި ކޮށްލުމަށް ފަހު 15 މިނެޓު ވަންދެން ބޮލުގެ ތަލައިގައި ހާކާނީއެވެ. މިކަން ކުރުމުގެ ކުރިން ރަނގަޅަށް ބޯ ދޮންނަން ހަނދާން ކުރާށެވެ. މިގޮތަށް ހަފްތާއަކު 3 ފަހަރު ކުރިއަށް ގެންދިއުމުން ތަފާތު ފެންނާނެއެވެ.

ގްރީންޓީ

ގްރީންޓީގެ 2 ސައިފަތް ޕެކެޓު ހޫނުފެނަށް ލުމަށްފަހު ރަނގަޅަށް ފެންގަނޑަށް ކުލަ އަރަންދެން ބައިންދާލާށެވެ. އެއަށް ފަހު ޝޭމްޕޫ ލައިގެން ރަނގަޅަށް ބޯ ދޮވެލުމަށްފަހު ހިއްކާލާށެވެ. ދެން ސައިފަތުފެން ލައިގެން ރަނގަޅަށް އިސްތަށިގަނޑު ދޮވެލާށެވެ. ހަފްތާއަކު 2 ފަހަރު މިކަން ތަކުރާރު ކޮށްލުމުން ވަރަށް އަވަހަށް އިސްތަށި ފޭބުން ހުއްޓިދާނެއެވެ.

ފިޔާ ދިޔަ

ފިޔާދިޔަ އަކީ ނުބައިވަސް ދުވިނަމަވެސް އިސްތަށިގަނޑަށް ވަރަށް ފައިދާކުރާ އެއްޗެކެވެ. އިސްތަށިގަނޑު ވަރުގަދަކޮށް އިސްތަށި ފޭބުން ހުއްޓުވައިދިނުމަށް ފިޔާ ދިޔަ އެހީވެދެއެވެ. ފިޔާ ޗިސްކުރުމަށްފަހު އޭގެ ދިޔަ ފުރާނާލާށެވެ. އެއަށް ފަހު ބޮނޑިތާން ކުރާ ފަދައިން ފިޔައިގެ ދިޔަ ބޮލުގެ ތަލާގައި ބޮނޑިތާން ކޮށްލާށެވެ. މިކަމަކީ ވަސް ދުވި ނަމަވެސް އިސްތަށްޓަށް ވަރަށް ފައިދާ ހުރި ކަމެކެވެ. ބޮނޑިތާން ކުރުމަށްފަހު 30 މިނެޓު ވަންދެން ބަހައްޓާށެވެ. އަދި ރަނގަޅަށް ޝޭމްޕޫލައިގެން ރަނގަޅަށް ބޯދޮވެލާށެވެ.

އިސްވެ ދިޔަ ކަންތައްތަކަކީ ގޭގައި ތިބެ އަދި ގުދުރަތީ ތަކެތި ބޭނުންކޮށްގެން އިސްތަށި ފޭބުން ހުއްޓުވުމަށް ކުރެވިދާނެ ކަންތައްތަކެވެ. މިކަންކަން ކުރުމުގެ ސަބަބުން އަތުންދާ ޚަރަދުތައް ވެސް ވަރަށްބޮޑުތަން ކުޑަވެގެންދާނެއެވެ. އެހާމެ ފަސޭހަވާނެއެވެ.