ޠާލިބާނުންގެ ވެރިކަމުން ސަލާމަތްވުމަށް ޕާކިސްތާނަށް ދިޔަ އަފްޣާނިސްތާނުގެ ރައްޔިތުން ފަސް އަހަރު ފަހުންވެސް އުޅެމުންދަނީ ފިލައިގެން

2021 ވަނަ އަހަރު ޠާލިބާނުން އަފްޣާނިސްތާނުގެ ވެރިކަމަށް އައުމާއެކު، ފުރާނައަށް ނުރައްކާވެދާނެކަމުގެ ބިރަށް، އެތައް ލައްކަ ބަޔަކު ވަނީ އަވަށްޓެރި ޕާކިސްތާނަށް ހިޖުރަކޮށްފައެވެ.

އޭގެ ފަސް އަހަރު ފަހުން މިއަދާ ހަމައަށްވެސް، ތިންވަނަ ޤައުމަކަށް ބަދަލުވުމުގެ އިންތިޒާރުގައި އެތައް ހާސް ބަޔަކު ޕާކިސްތާނުގައި އެބަތިއްބެވެ. އެމީހުން އަމިއްލަ ޤައުމަށް ޑީޕޯޓުކޮށްފާނެކަމުގެ ބިރަށް ގިނަ މީހުން ދިރިއުޅެމުންދަނީ ފިލައިގެންނެވެ.

މީގެ ތެރޭގައި ނޫސްވެރިންނާއި، އިންސާނީ ޙައްޤުތަކަށް ވަކާލާތުކުރާ މީހުންގެ އިތުރުން، އެމެރިކާގެ މަދަދު ލިބިގެން އުފައްދާފައިވާ އަފްޣާނިސްތާނުގެ ކުރީގެ ސަރުކާރާއި، ސަލާމަތީ އަދި ޖާސޫސީ އިދާރާތަކުގައި މަސައްކަތްކުރި މީހުން ހިމެނެއެވެ. މި މީހުންނަށް އޮތް އެންމެ ބޮޑު ބިރަކީ ޠާލިބާނުންގެ ފަރާތުން ކުރިމަތިވެދާނެ ބަދަލުހިފުމުގެ ޢަމަލުތަކެވެ. ކުރީގެ ޢަދާވާތްތެރިންނަށް އަނިޔާކޮށް، ޝަރީޢަތަކާ ނުލައި މެރުމުގެ ތުހުމަތު ޠާލިބާނުންގެ މައްޗަށް ވަނީ ކުރެވިފައެވެ.

ފަހުގެ އަހަރުތަކުގައި އިސްލާމްއާބާދުން ވަނީ ގަދަކަމުން އެތައް ލައްކަ އަފްޣާނިސްތާނު ރައްޔިތުން ޑީޕޯޓުކޮށްފައެވެ. އދ. އިން ހާމަކޮށްފައިވާ ގޮތުގައި، 2023 ވަނަ އަހަރު ޕާކިސްތާނުން ފެށި ބޮޑު ޑީޕޯޓޭޝަން ކެމްޕޭނަށްފަހު، މިހާތަނަށް 2.6 މިލިއަނަށްވުރެ ގިނަ މީހުން ވަނީ އަފްޣާނިސްތާނަށް އަނބުރާ ގޮސްފައެވެ. މިގޮތުން އަނބުރާ ފޮނުވާލެވޭ މީހުން އެމީހުންގެ މުދަލާއެކު އަފްޣާނިސްތާނުގެ ކަންދަހާރު ޕްރޮވިންސްގެ ތަޚްތާ ޕުލް ޑިސްޓްރިކްޓުގައި ހުންނަ ރަޖިސްޓްރޭޝަން ސެންޓަރުތަކަށް އަންނަމުންދާކަން ފާހަގަކުރެވެއެވެ.

ޕާކިސްތާނުގައި މިވަގުތު ތިބި ނުރައްކަލަށް ހުށަހެޅިފައިވާ މީހުންގެ ތެރޭގައި އަފްޣާނިސްތާނުގެ ޤައުމީ އަސްކަރިއްޔާގައި ކުރިން މަސައްކަތްކުރި އޮފިސަރަކު ހިމެނެއެވެ. ޢުމުރުން 30 އަހަރުގެ މި މީހާ ބުނި ގޮތުގައި، ފާއިތުވި ދެ އަހަރުގެ ތެރޭގައި ޕާކިސްތާނު ފުލުހުން ވަނީ އޭނާ ދެ ފަހަރެއްގެ މަތިން ހައްޔަރުކޮށް ޑީޕޯޓުކޮށްލާފައެވެ. ނަމަވެސް ކޮންމެ ފަހަރަކުވެސް ޕާކިސްތާނުގެ ބޯޑަރު ފުލުހުންނަށް ރިޝްވަތު ދީގެން އޭނާ ވަނީ އަނބުރާ އެ ޤައުމަށް އެތެރެވެފައެވެ.

ޕާކިސްތާނުގައި ތިބި ގިނަ އަފްޣާނިސްތާނު މީހުންގެ ވީޒާގެ މުއްދަތު ހަމަވެފައިވާއިރު، ލިޔެކިޔުންތައް އާކުރުމުގައި އެމީހުންނަށް ވަނީ ބޮޑެތި ހުރަސްތަކާ ކުރިމަތިވެފައެވެ. އެ ޤައުމުގައި އެމީހުންނަށް ލިބިދީފައިވަނީ ވަރަށް މަދު ޙައްޤުތަކެކެވެ. އެގޮތުން ވަޒީފާއަދާކުރުމާއި، ކިޔެވުމާއި، އަދި ކުއްޔަށް ތަންތަން ހިފުމުގެ ފުރުޞަތުވެސް އޮންނަނީ ބަންދުވެފައެވެ.

ސަލާމަތީ ސަބަބުތަކަށްޓަކައި ނަން ހާމަނުކުރުމަށް އެދި ވާހަކަދެއްކި އެ އޮފިސަރު ބުނީ، "ޠާލިބާނުންގެ ކިބައިން ސަލާމަތްވީ ހަމަ ކިރިޔާ" ކަމަށެވެ. އަދި އަނބުރާ ޤައުމަށްދާ މީހުންގެ ތެރޭގައި ކުރީގެ ހަނގުރާމަވެރިން ތިބިތޯ ބެލުމަށްޓަކައި ޠާލިބާނުން ބޯޑަރުމަތީގައި ގިނަގިނައިން މީހުން ފާސްކުރަމުންދާކަމަށްވެސް އޭނާ ބުންޏެވެ.