ޕީއެންސީގެ ރިޔާސީ ޓިކެޓް ރަސްމީކޮށް ރައީސް ޑރ. މުޢިއްޒަށް އަރުވައިފި

ޕީޕަލްސް ނޭޝަނަލް ކޮންގްރެސް (ޕީއެންސީ)ގެ 2028ވަނަ އަހަރުގެ ރިޔާސީ ޓިކެޓު، އެ ޕާޓީގެ މަތީ މަޖިލީހުގެ ނިންމުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ރަސްމީކޮށް ހަވާލުކުރައްވައިފިއެވެ.

ވެރިކަން ކުރާ މައި ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ، ރައީސް މުޢިއްޒަށް މި ޓިކެޓު އެރުވީ މިދިޔަ ބުރާސްފަތި ދުވަހު އެ ޕާޓީގެ މަތީ މަޖިލީހުގެ 1119 މެންބަރުންގެ ފުރިހަމަ އިއްތިފާގުން ފާސްކުރި ޚާއްޞަ ޤަރާރަކަށް ބިނާކޮށެވެ.

މި ޤަރާރަށް ތާޢީދުކުރައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވަނީ، ރާއްޖޭގެ އަމަންއަމާންކަމާއި، ޢުމްރާނީ ކުރިއެރުމުގެ އިތުރުން މާތްވެގެންވާ އިސްލާމްދީން ޙިމާޔަތްކުރުމަށް ރައީސް ކުރައްވަމުން ގެންދަވާ ބުރަ މަސައްކަތްޕުޅުތައް ފާހަގަކުރައްވައި، އެމަނިކުފާނަށް އިތުރު ދައުރެއް ދިނުމުގެ މުހިންމުކަން ފާހަގަކުރައްވާފައެވެ. ހަމައެހެންމެ، މަޖިލީހުގެ ރައީސް ޢަބްދުއްރަޙީމް ވިދާޅުވި ގޮތުގައި މިއީ ޕީއެންސީގެ ސެނެޓުން ނިންމި އެންމެ އުފާވެރި އަދި އެންމެ މުހިންމު ނިންމުމެވެ. އަދި ދިވެހި އުންމަތަށް އޮތް އެންމެ ފަހި ގޮތަކީ ރައީސް ޑރ. މުޢިއްޒުގެ ތަސައްވުރާ އެއްގޮތަށް ޤައުމު ހިންގުންކަމަށް ވެސް އެމަނިކުފާނު ވިދާޅުވިއެވެ.

ޕީއެންސީގެ އާންމު މެންބަރަކު ހުށަހެޅުއްވި މި ޤަރާރު ފާސްވުމާ އެކު، ކުރިއަށް އޮތް ރިޔާސީ ރޭހުގައި އެ ޕާޓީގެ ނަމުގައި ވާދަކުރައްވާނެ ކެންޑިޑޭޓަކީ ރައީސް ޑރ. މުޢިއްޒުކަން މިވަނީ ކަށަވަރުވެފައެވެ. އަދި މީގެ އިތުރުން، އަންނަ ރިޔާސީ އިންތިޚާބު އެމަނިކުފާނަށް ކާމިޔާބުކޮށްދިނުމަށްޓަކައި ގުޅިގެން މަސައްކަތްކުރުމަށް ޕާޓީގެ މަތީ މަޖިލީހުގެ މެންބަރުން ވަނީ އަހުދުވެ ވަޢުދުވެވަޑައިގެންފައެވެ.