އިދިކޮޅުން އުޅެނީ "އިންޑިއާ އައުޓް" ނުވެގެނެއް ނޫން، އެމީހުން ޖަލަށް "އިން" ވެދާނެތީ: އަލީ އާޒިމް
އިދިކޮޅު ކޯލިޝަނުން "އިންޑިއާ އައުޓް" ކެމްޕޭނު ހިންގަނީ ކޮރަޕްޝަނުން ސަލާމަތްވާން ވެގެން ކަމަށް އެމްޑީޕީ ގެ ޕާލިމެންޓްރީ ގްރޫޕުގެ ލީޑަރު އަލީ އާޒިމް ވިދާޅުވެއްޖެ އެވެ.
އެޕާޓީން ނެރޭ "ޚަބަރު ސިޓީ" ގެ މިހަފްތާގެ އަދަދުގައި އަލީ އާޒިމް ލިޔުއްވާފައިވަނީ "އިންޑިއާ އައުޓް" ގެ ނަމުގައި ކުރާ މަސައްކަތަކީ ސަރުކާރު ބަދަލުކޮށް "ދައުވާ އައުޓް" ކުރުމުގެ މަސައްކަތް ކަމަށެވެ.
އެގޮތުން އަލީ އާޒިމް ވަނީ ކޮރަޕްޝަން ތުހުމަތުން ސަލާމަތްވާން މަސައްކަތް ކުރާ ލީޑަރުން ކަމަށް ބުނެ ބައެއް ބޭފުޅުން ގެ ނަންތައް ވެސް އާއްމުކޮށްފައެވެ. އެނަންތަކަކީ:
▪︎ ޕީއެންސީގެ ރައީސް އަބްދުއްރަހީމް އަބްދުﷲ
▪︎ ކުރީގެ އިކޮނޮމިކް މިނިސްޓަރު އަދި މާވަށު ދާއިރާގެ މެމްބަރު މުހައްމަދު ސައީދު
▪︎ ޕީޕީއެމްގެ ނައިބު ރައީސް ޣައްސާން މައުމޫން
▪︎ ސްރީ ލަންކާގެ ކުރީގެ ސަފީރު މުހައްމަދު ހުސެއިން ޝަރީފް
▪︎ ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހްމަދު ޝިޔާމް
▪︎ ކުރީގެ މެމްބަރު އަހްމަދު ނިހާން
▪︎ ކުރީގެ މެމްބަރު އަލީ އާރިފް
▪︎ކުރީގެ މެމްބަރު ރިޔާޒު ރަޝީދު، އެވެ.
"މިއުޅެނީ އިންޑިއާ އައުޓް ނުވެގެނެއް ނޫނެވެ. މިއުޅެނީ ކުށްސާބިތުވެ، ޖަލު ތޭރިތަކުގެ ތެރެއަށް އިން ވެދާނެތީ އެކަމާ ގަންނަ ބިރަކުންނެވެ،" އެބޭފުޅުންގެ ނަންތައް ވަކި ވަކިން ފާހަގަ ކުރައްވަމުން އާޒިމް ތުހުމަތު ކުރެއްވާފައިވެއެވެ.
މީގެ އިތުރުން އަލީ އާޒިމް ވިދާޅުވެފައިވަނީ އިންޑިއާއިން ރާއްޖެ ހިފާކަށް ނޫޅެއެވެ. އަދި އިންޑިއާއާއެކު އޮންނަ ގުޅުން ވަރުގަދަ ވެފައިވާއިރު، ރާއްޖޭގެ ސަލާމަތާ ރައްކާތެރިކަމަށް އިންޑިއާ އިން ކަށަވަރު ކުރާނެ ކަމަށް ވެސް އަލީ އާޒިމް ވިދާޅުވެފައި ވެއެވެ.
