މިއަދު ހާލު ނުބެލޭނަމަ، މާދަމާ ކަމަކު ކިޔަން ގުޅުން ސަޅިއެއް ނޫން!
ޒަމާން ބަދަލު ވެއްޖެއެވެ. ދިރިއުޅުމުގައި އެތައް ކަމެއް ވެސް ބަދަލު ވެއްޖެއެވެ. އިއްޔެ އެންމެ ގާތުގައި އެކުގައި އުޅުނު ރައްޓެހިން މިއަދު ކޮބައ ކަމެއް ވެސް ނޭނގެއެވެ. އުޅޭތަނެއް، އުޅޭ ހާލެއް ވެސް ބަލާލަނީ އެއް ނޫނެވެ. އަހަންނާއި އެމީހުންނާ ދޭތެރޭ މިއަދު އޮތީ ކޮން ގުޅުމެއް ބާވައޭ ވެސް ހިތަށް އަރައެވެ.
ތެދެކެވެ. މަގުމަތިން ފެނުނިއްޔާ ގޮވާލާނެއެވެ. ކޮފީއަކަށް ދާން ގުޅާނަމޭ ބުނާނެއެވެ. އެކަމަކު ދުވަހަކު ވެސް ގުޅޭތަނެއް ނާންނާނެއެވެ. ފޭސްބުކުގައި "ފްރެންޑް ލިސްޓް" ގައި އިންނާނެއެވެ. ފޮޓޯއެއް ލައިފިނަމަ "ރިއެކްޓް" ކޮށްލާނެއެވެ. ބައެއް ފަހަރު ކޮމެންޓެއް ވެސް ކޮށްލަފާނެއެވެ. އެހެން ނަމަވެސް ދެމީހުން އެކަކު އަނެކަކާ ވާހަކަ ނުދައްކާތާ ވެސް އެތައް ދުވަހެކެވެ.
މުސްކުޅިން ބުނާ އަޑު އަހަރެން ވެސް އަހަމުއެވެ. ރަނގަޅު ރަހުމަތްތެރިންނަކީ ނުވަތަ ހަގީގީ ރަހުމަތްތެރިންނަކީ ދަތި އުނދަގޫ ހާލަތެއް ކުރިމަތިވުމުން ގެއްލޭ ބައެެއް ނޫނެވެ. ތިބާ އަނދަވަޅުގަނޑަކަށް ވެއްޓުމުން ތިބާއަށް މަލާމާތްކޮށް ހޭން ތިބޭ މީހުންނަކީ ތިބާގެ ރައްޓެހިންނެއް ނޫނެވެ. ތިބާގެ އަތްމަތި ދަތިވެ ތިބާ ފަގީރުވާ ދުވަހު ތިބާ ދަންނަ ކަމަށް ނުހެދުމަށްފަހު ތިބާއަށް ފައިސާ ލިބި ތިޔާގިކަން ލިބެން ފެށުމުން އަންނަ މީހުންނަކީ ވެސް ރައްޓެހިންނެއް ނޫނެވެ.
ހަގީގީ ރައްޓެހިން ތިބާ ވެއްޓުމުން ތިބާގެ އަތުގައި ހިފާ ނަގާނެއެވެ. އެހެން އެކަކަަށް ވެސް ތިބާ ވެއްޓިއްޖެ ކަން އެނގުމުގެ ކުރިންނެވެ. ތިބާއަށް މަލާމާތްކޮށް ހީ ހަދާ މީހަކަށް އޭނާ ނުވާނެއެވެ. ތިބާގެ އަތްމަތި ދަތިވެ ތިބާ އަތުން ފައިސާ ހުސްވެއްޖެ ނަމަ، އޭނާ ތިބާ ދޫކޮށް ދާނީއެއް ނޫނެވެ. ތިބާ އަށް އެހީތެރިވެ އެ ދަތި ހާލަތުން އަރައިގަތުމުގައި އެހީތެރިވެ ދޭނީއެވެ. އާނއެކެވެ. ހަގީގީ ރައްޓެހިން އަހަންނަށް ސިފަވަނީ މިހެންނެވެ.
މިއަދު އަހަރެން ހުރީ ހެޔޮ ހާލުގައިތޯ ބަލާލަނީ މަދު މީހެކެވެ. އެ މަދު ރައްޓެހިންނަށް އަހަރެން ޝުކުރުވެރި ވަމެވެ. އަހަރެންގެ ބައެއް ރައްޓެހިންނަށް އަހަރެން ފެންނަނީ ކަމަކު ޖެހުނީމައެވެ. ކަަމަކު ޖެހުނީމާ ގުޅާލާނެއެވެ. ގުޅާލާފައި ވަރަށް ބޮޑު ކަމެއް ކޮށްދޭން ވެއްޖެ ކަމުގައި ބުނެ އެކަމެއްގައި އެދޭނެއެވެ. ނުކޮށްދެވުނަސް ގޯސްވާނީ އަހަންނެވެ. އަހަރެންނަކީ ރައްޓެހިންނަށް "ނުބަލާ" މީހަކަށް އޭރުން ވެގެން ދާނެއެވެ.
މައްސަލަ އެއް ނެތެވެ. އެގޮތަށް ދެކޭނެ މީހަކު އެގޮތަށް ވެސް ދެކޭށެވެ. ނަމަވެސް އެތައް ދުވަހަކު ހާލު ބަލައިލާން ވެސް ނުވަތަ ކޮބައިތޯ ބަލައިލާން ވެސް ހަބަރެއް ނުވާ މީހަކު މިއަދު ކަމަކު ކިޔާން ވީމާ އެކަނި ގުޅުމަކީ ސަޅި ކަމެއް ނޫނެވެ.
