ނަސްރުގެ ދުވަހު ވެދިން އެހީތެރިކަމަށް ޝާހިދުގެ ޚާއްސަ ޝުކުރެއް އިންޑިއާއަށް

ނޮވެމްބަރު 3 ގައި ރާއްޖެއަށް ދިން އުދުވާނީ ހަމަލާގައި އިންޑިއާއިން ވެދިން މަދަދާއި އެހީތެރިކަން ދުވަހަކު ވެސް ހަނދާނުން ނުނެތޭނެ ކަމަށާއި އެކަމަށް ޝުކުރު އަދާކުރާ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

މިނިސްޓަރު ކުރެއްވި ޓުވީޓުގައި ވިދާޅުވެފައިވަނީ، ވިދާޅުވީ، މިއަދު ހަނދާން އާކުރަމުން ދަނީ ދިވެހި ގައުމަށްޓަކައި ޤުރުބާންވެ، ޝަހީދު ވެފައިވާ ދިވެހި ސިފައިންނާއި، ދިވެހި ދަރީންގެ ހަނދާންތައް ކަމަށާއި، މިނިވަންކަމާއި، ޤައުމުގެ އިސްތިގްލާލަށްޓަކައި ހަނގުރާމަ ކުރި ހިތްވަރުގަދަ ފަހުލަވާނުންގެ ޝަރަފުވެރި ޒިކުރާތައް ކަމަށެވެ.

އަދި މިއަދަކީ ހަގީގީ ރަހުމަތްތެރިކަމުގެ އަގު ވަޒަންކުރާ ދުވަސްކަމަށް ފާހަގަކުރަމުން ވިދާޅުވެފައިވަނީ، ނޮވެމްބަރު 03 ގެ އުދުވާނީ ހަމަލާގައި ދިވެހި ގައުމަށް، އިންޑިޔާއިން ވެދިން މަދަދާއި އެހީތެރިކަމުގެ ހަނދާންތައް ދިވެހިން އަބަދުވެސް އާކުރާނެ ކަމަށެވެ. އަދި މިއަދަކީ ކުދި ގައުމުތަކަށް ކުރިމަތިވެފައިވާ ނުރައްކާތަކާއި، ދަތިތައް މަތިން ހަނދާން ކުރަން ޖެހޭ ދުވަސްކަން ވެސް ޝާހިދުގެ ޓުވީޓުގައި ފާހަގަ ކުރައްވާފައި ވެއެވެ.