އިންސާނީ ހައްގުތަކަށް ރާއްޖެއިން ކުރި މަސައްކަތަށް ގައުމުތަކުގެ ތައުރީފު
އިންސާނީ ހައްގުތައް ހިމާޔަތް ކުރުމަށް ރާއްޖެއިން ކޮށްފައިވާ މަސައްކަތްތަކަށް ބައެއް ގައުމުތަކުން ތައުރީފް ކޮށްފިއެވެ.
އިންސާނީ ހައްގުތައްް ހިމާޔަތް ކުރަން ރާއްޖެއިން ކޮށްފައިވާ މަސައްކަތްތައް މުރާޖައާ ކުރަން އދ. ގެ ޖެނީވާގެ އޮފީހުގައި ރޭ ވަނީ ޔުނިވާސަލް ޕީރިއަޑިކް ރިވިއު (ޔޫޕީއާރު) ސެޝަންއެއް ބާއްވާފައެވެ.
މި ސެޝަންގެ ތެރެއިން ގިނަ ގައުމުތަކުން ވަނީ އިންސާނީ ހައްގުތައް ހިމާޔަތް ކުރުމަށް ރާއްޖެއިން ކޮށްފައިވާ މަސައްކަތްތައް ފާހަގަކޮށް ތައުރީފު ކޮށްފައެވެ. އޭގެ ތެރޭގައި އިނގިރޭސިވިލާތް، ތައިލެންޑު، އޮސްޓްރިއާ، ބެލްޖިއަމް ތުރުކީ އަދި ޗައިނާ ފަދަ ބޮޑެތި ގައުމުތައް ހިމެނެއެވެ.
ރާއްޖޭގެ ގާނޫނީ ނިޒާމަށް ގެނައި އިސްލާހުތަކަށް އެ ގައުމުން ތައުރީފުކުރާ ކަމަށާއި އެއީ ޑިމޮކްރެޓިކް އުސޫލުތަކާ އެއްގޮތަށް ގެނެސްފައިވާ އިިސްލާހުތަކެއް ކަން ފާހަގަކޮށް އިނގިރޭސިވިލާތުގެ ފަރާތުން ވާޙަކަދެއްކެވި މަންދޫބު ވަނީ ޑިމޮކްރަސީ ހަރުދަނާ ކުރުމާއި އިންސާނީ ހައްގުތައް ހިމާޔަތް ކުރުމުގައި ރާއްޖެއިން ކޮށްފައިވާ މަސައްކަތްތަކަށް ތައުރީފް ކުރައްވާފައެވެ.
މީގެ އިތުރުން 2019 ވަނަ އަހަރު ބޭއްވުނު އިންތިހާބު ސުލްހަވެރިކަމާއެކު ކުރިއަށް ގެންދެވުނީތީ ވެސް އެގައުމުން ވަނީ އެކަމަށް ތައުރީފް ކޮށްފައެވެ.
މީހުން ޓްރެފިކް ކުރުން ކަމަށް ބެލެވޭނެ އެންމެހައި އަމަލުތަކަކީ ޖިނާއީ ކުށްތައް ކަމަށް ހެދުމަށާއި ހިއުމަން ޓްރެފިކިން އާއި ކުޑަކުދިން ލައްވައި ހަށި ވިއްކުން ހުއްޓުވުމަށް އިނގިރޭސިވިލާތުން ވަނީ ހުށަހެޅުމެއް ހުށަހަޅާފައެވެ.
ބައެއް ގައުމުތަކުން ރާއްޖެއަށް ތައުރީފް ކުރި ނަމަވެސް މަރުގެ އަދަބު ދިނުން ހުއްޓާލުމުގެ ރަސްމީ މޮރެޓޯރިއަމެއް ގާއިމު ނުކުރާތީ އާއި ދީނީ މިނިވަންކަން ނުދޭތީ ޔޫރަޕްގެ ބައެއް ގައުމުތަކުން ކަންބޮޑުވުން ފާޅުކޮށްފައިވެއެވެ.
