ސާފުކޮށްދިނީ މަރުގެ އަދަބު ކަނޑައެޅުން ހުއްޓާ ނުލެވޭނެކަން: އޭޖީ އޮފީސް
ޔުނިވާސަލް ޕީރިއޮޑިކް ރިވިއު (ޔޫޕީއާރު)ގެ ތިންވަނަ ސައިކަލްގައި އިއްޔެ ބޭއްވުނު ރާއްޖޭގެ ރިވިއު ސެޝަންގައި މަރުގެ އަދަބާ ގުޅޭގޮތުން އެޓާނީ ޖެނެރަލް އިބްރާހިމް ރިފްއަތު ވާހަކަ ދެއްކެވީ، ރާއްޖޭގައި މަރުގެ އަދަބު ކަނޑައެޅުން ހުއްޓާ ލެވެން ނޯންނާނެކަން ބައިނަލްއަގުވާމީ ދުނިޔެއަށް ސާފުކޮށްދިނުމަށް ކަމަށް އެޓާނީ ޖެނެރަލްގެ އޮފީހުން ބުނެފިއެވެ.
އިއްޔެގެ އެސެޝަނުގައި ވާހަކަ ދައްކަވަމުން އޭޖީ ރިފްއަތު ވިދާޅުވީ ރާއްޖޭގައި މަރުގެ އަދަބު ދިނުން މަޑުޖައްސާފައި އޮތް އޮތުން ދަމަހައްޓާނެ ކަމަށާއި ނަމަވެސް ގާނޫނުލްއުގޫބާތުން މަރުގެ އަދަބު އުވާލެވޭނީ ދިވެހި ރައްޔިތުންގެ މަޝްވަރާ ހޯދައި، ރައްޔިތުން އެގޮތަށް ބޭނުންވާނަމަ ކަމަށެވެ.
އޭޖީގެ މިވާހަކަތަކާއި ގުޅިގެން ބައެއް ރައްޔިތުންނާއި ޢިލްމުވެރިންގެ ފާޑުކިޔުންތައް ވަނީ ވަރަށް ބޮޑަށް އެމަނިކުފާނަށް އަމާޒުވެފައެވެ.
އެހެންކަމުން މަރުގެ އަދަބު ދިނުމަ ގުޅޭގޮތުން އޭޖީ ދެއްކެވި ވާހަކަ "ސާފުކޮށްދީ" އޭޖީ އޮފީހުން މިއަދު ނެރުނު ބަޔާނެއްފައި ބުނެފައި ވަނީ ޔޫޕީއާރުގެ ދެވަނަ ސައިކަލްގައި ރާއްޖޭގައި މަރުގެ އަދަބު ދިނުން ހުއްޓާލައި، ރާއްޖޭގެ ގާނޫނުތަކުން މަރުގެ އަދަބު އުވާލުމަށް 25 ގައުމަކުން ހުށަހެޅުންތައް ލިބިފައިވާ ކަމަށެވެ.
އިއްޔެ ކުރިއަށްދިޔަ ސެޝަންގައި ވެސް، ރާއްޖޭގައި މަރުގެ އަދަބު ދިނުން ހުއްޓާލުމަށާއި، ރާއްޖޭގެ ގާނޫނުތަކުން މަރުގެ އަދަބު އުވާލުމާ ގުޅޭގޮތުން ގިނަ ހުށަހެޅުންތަކެއް ލިބޭނެކަމަށް ލަފާ ކުރެވުނު ކަމަށް ވެސް އެ ބަޔާނުގައި ވެއެވެ.
