ފްރާންސްގެ ރައީސް އަނެއްކާ ވެސް މުސްލިމުންނަށް ފުރައްސާރަކޮށް ދޮގު ޚަބަރުތައް ފަތުރައިފި
ފްރާންސްގެ ރައީސް އެމަނުއެލް މެކްރޯން އަނެއްކާ ވެސް މުސްލިމުންނަށް ފުރައްސާރަކޮށް ދޮގު ވާހަކަތަކެއް ފަތުރައިފިއެވެ.
ކީރިތި ރަސޫލާ (ޞޢޥ) އަށް ފުރައްސާރަކޮށް، އެކަލޭގެފާނުގެ ކާޓޫނު ކުރެހި ޗާލީ ހެބްޑޯއަށް ވެސް އެކަމަށް ހިތްވަރުދީ ހެދިތާ މާގިނަ ދުވަސްތަކެއް ނުވެ، މެކްރޯން އިއްޔެ އަނެއްކާ ވެސް މިވަނީ މުސްލިމުންނަށް ފުރައްސާރަ ކޮށްފައެވެ.
އެގޮތުން ފައިނޭންޝަލް ޓައިމްސް އަށް މެކްރޯނު ލިޔުނު ސިޓީއެއްގައި ބުނެފައިވަނީ، މުސްލިމު އަންހެން ކުދިންގެ އުމުރުން ގާތްގަނޑަކަށް ތިން އަހަރާއި ހަތަރު އަހަރާއި ދެމެދުގައި ބުރުގާ އާއި މޫނު ބުރުގާ އަޅުވާ ކަމަށެވެ.
އޭގެ އިތުރުން މުސްލިމު އަންހެންކުދިން އުފަންވުމާއެކު ނާސަރީގައި ބާއްވާފައި އޮންނައިރު، އެހެން ތުއްތު ފިރިހެން ކުދިންނާއި ދުރުގައި ބާއްވާކަމުގެ ދޮގު ވާހަކަތަކެއް ވެސް ފަތުރާފައިވެއެވެ.
"އެކުދިން (މުސްލިމު އަންހެން ކުދިން) އެހާ ތުއްތު އިރުގައި ވެސް ގެންގުޅެނީ، އެހެން ކުޑަ ފިރިހެން ކުދިންނާއި ސޮސައިޓީ އާއި ވެސް ދުރުކޮށްގެން" މެކްރޯން ބުނެފައިވެއެވެ.
މެކްރޯންގެ އެސިޓީގައި މަސައްކަތް ކޮށްފައި ވަނީ މުސްލިމުންނަކީ ހަރުކަށި ވިސްނުން ގެންގުޅޭ ބައެއް ކަމަށާއި، އަންހެން ކުދިންނަށް އެއްވެސް މިނިވަންކަމެއް ނުދީ ގެންގުޅޭ ބައެއްކަން ދެއްކުމަށެވެ.
މީގެއިތުރުން މެކްރޯން ބުނެފައި ވަނީ އޭނާ އެވާހަކަތައް ދައްކަނީ މުސްލިމުންގެ އެފަދަ ހަރުކަށި ވިސްނުން ހުއްޓުވަން ކަމަށާއި އިސްލާމްދީނާ ދެކޮޅުވުމަށް ނޫން ކަމުގައެވެ.
މެކްރޯން ގެ މިވާހަކަތަކާއި ގުޅިގެން ފްރާންސްގެ މުސްލިމު ލިޔުންތެރިއެއް ކަމަށްވާ ނާދިއާ ހެނީ ބުނީ، އިނގިރޭސިވިލާތުގެ މީޑިއާއެއްގެ އެހީގައި މެކްރޯން އެގެންދަނީ މުސްލިމުންނާއި ބެހޭގޮތުން ހަގީގަތެއް ނެތް ވާހަކަ ފަތުރަމުން ކަމަަށެވެ.
މިއީ ޤައުމެއް ހިންގުމާއި ހަވާލުވެހުރި، ޤައުމެއްގެ އިސް ވެރިއަކު ކުރަން ވަރަށް ނާތަހުޒީބު ކަމެއް ކަމަށް ވެސް ނާދިއާ ބުނެފައިވެއެވެ. އަދި މުސްލިމު އަންހެން ކުދިންނާމެދު މިފަދައިން އިސްލާމްދީނުގައި ޢަމަލު ނުކުރާ ކަމަށް ވެސް ބުނެފައި ވެއެވެ.
