މިއީ 21 ވަނަ ގަރުނުގެ ހަގީގަތް: އިއްފަތްތެރިކަން ގެއްލުމަށް ވުރެ މޯބައިލް ފޯން ގެއްލުމުން ވެސް މާދެރަވޭ!
21 ވަނަ ގަރުނަށް މަރުޙަބާއެވެ. މިއީ ކަންކަން މުޅިން ބަދަލު ވެފައިވާ ގަރުނެކެވެ. ހިތާމައާއެކު ދަންނަވަން ޖެހެނީ މިއީ އިންސނުންގެ ވިސްނުން ބަދަލު ކޮށްލެވިފައިވާ ގަރުނެއް ކަމެވެ. މިހެން ދެންނެވުމުން ބައެއް ބޭފުޅުންނަށް މިކަން ފަހުމު ނުވެދާނެއެވެ. އެހެން ނަމަވެސް 21 ވަނަ ގަރުނުގެ ހަގީގަތް މިއިީއެވެ.
21 ވަނަ ގަރުނަކީ ލޯބި އަގު ބޮޑު ޖަވާހިރަކަށް ބަދަލުވެފައިވާ އަދި ޒިނޭކުރުން ހިލޭ ކުރެވޭ އާންމު ކަމަކަށް ވެފައިވާ ގަރުނެކެވެ. ލޯބި އަގު ބޮޑޭ މިދެންނެވީ، ކައިވެނީގެ ގޮތުން ގުޅި އާ ޒަވާޖީ ޙަޔާތެއް ފެށުމަށް ކުއްޖެއް ހޯދުމުގެ ބަދަލުގައި މިޒަމާނަކީ ހަމައެކަނި، ޒިނޭ ކުރުމަށް ނޫނީ ކުޅޭކުޅޭ އެއްޗެއްގެ ގޮތުގައި އަންހެން ކުދިން ގެންގުޅޭ ޒަމާނެކެވެ. ކައިވެނިން ބޭރުން ނަހަލާލަށް ބަލިވެ އިނދެ ނަހަލާލު ދަރިން ލިބޭ އަންހެނުން ގިނަވާން ދިމާވާ މައިގަނޑު ސަބަބަކީ ވެސް މިއީއެވެ.
އަދި ދަންނަވަންތޯއެވެ. މި ޒަމާނަކީ އިއްފަތްތެރި އަންހެނެއްގެ ބިކުރު ގެއްލުމަށްވުރެ، ގެންގުޅޭ މޯބައިލް ފޯނު ގެއްލުމުން އެކަމާ ހިތާމަ ކުރާ ޒަމާނެކެވެ. ޒަމާނާއި އެއްގޮތަށް ބަދަލު ވުމަށްޓަކައި ލާއަންނައުނު ކުރުވެ، އެންމެ ފަހުން އޮރިޔާން ނިވާ ނުވާ ވަރަށް ވެސް ހެދުން އަޅާ ޒަމާނެވެ. އެއީ ޒަމާނަށް ފެތެން ކުރާ މަސައްކަތެއްގެ ގޮތުގައެވެ. ސިނގިރޭޓު ނުބޯ ފިރިހެނެއް ނަމަ އެއީ "ކަޓު" ފިރިހެނެކެވެ. މިޒަމާނުގައި މީހުން ވިސްނާ ގޮތަކީ މިއީއެވެ.
މަގުމަތިން ރީތި އަންހެން ކުއްޖެއް ދާނަމަ ފޮށުމަކީ ކުރަން ޖެހޭ ކަމެއް ކަމަށް މިއަދު މިވަނީ ވެފައެވެ. ނަމެއްގައި ކުއްޖަކާ ރައްޓެހިވެ. އެއްފަހަރާ އެތައް ކުދިންނަކާ އެކު ގުޅުން ހިންގަމުންދާ ޒަމާނެކެވެ. ދޯކާ ދިނުން އާންމު ޒަމާނެކެވެ. އެހެންމީހުންގެ ދިރިއުޅުމަށް ޒަހަރު އެޅުމުގައި އަނެކާއާ މެދު އެއްވެސް ވަރަކަށް ނުވިސްނާ ޒަމާނެކެވެ. އާދޭހެވެ. އަދި ނިމުނީއެއް ނޫނެވެ.
ހަގީގަތަކީ އިންސާފަކީ އަމުދުން މިޒަމާނުގައި ހޯދަން އުނދަގޫ އެއްޗެކެވެ. އެއީ މިޒަމާނުގައި ވާ އެއްޗެއް ނޫން ފަދައެވެ. މިޒަމާނުގައި އެންމެން ވެސް ހަގީގަތް ކަމުގައި ގަބޫލު ކުރަނީ ދޮގުތަކެވެ. ޖެހިދާނެ ބޮޑެތި ބަލިތަކުގެ ބިރަށް ވުރެ އަންހެނުން ވިހެއުމަށް ޖެހިލުންވުމާއި، އެކަމުގެ ސަބަބުން ހަށިގަނޑަށް އައިސްދާނެ ބަދަލުތަކާ ދޭތެރޭ ކަންބޮޑުވުން ވަނީ އާންމު ވެފައެވެ.
އޯޑާކޮށްލާ "ޕިއްޒާ" އެއްވެސް މިހާރު މާ އަވަހަށް އާދެއެވެ. އެެހެން ނަމަވެސް ދިމާވާ ކުއްލި ސިއްހީ ހާލަތަކަށް އަމަލު ކުރުން މިވަނީ މާބޮޑަށް ވެސް ލަސްވެފައެވެ. ފައިސާއާއި މުއްސަނދިކަން މިވަނީ ތިމާގެ އާއިލާއަށް ވުރެން މާބޮޑަށް ވެސް މުހިންމު ވެފައެވެ. އާއިލާގެ ދަރީން، އެމީހުންގެ ލޯބިވެރިންނަށް ޓަކައި އާއިލާ ދޫކޮށް ދިއުމަށް އެއްވެސް ވަރަކަށް ޖެހިލުން ވުމެއް ނުވާ ޒަމާނެކެވެ. ފިރިހެނުން ކައިވެނި ކުރުމަށް ޖެހިލުންވި ނަމަވެސް ޒިނޭ ފަދަ މުންކަރާތް ތަކަށް އަރައިގަތުމަށް އެއްވެސް ޖެހިލުމެއް ނުވާ ޒަމާނެވެ.
އަދި މިއީ "ލޯބި" ކުޅިވަރަކަށް ބަދަލު ވެފައިވާ ޒަމާނެކެވެ. އެ ކުޅޭ މީހާއަށް އުފާވެރިކަމާއި ހިތްހަމަޖެހުން ލިބި، އެ ކުޅިވަރުގައި ނޭނގި ކުޅެވޭ މީހާއަށް ދާއިމީ ހިތްދަތިކަމާއި ވޭނުގައި ތަހައްމަލު ކުރަން ޖެހިފައިވާ ނާއިންސާފީ ޒަމާނެކެވެ. ގަބޫލު ކުރަން ބޭނުން ނުވި ނަމަވެސް މިއީ ހަމަ ހަގީގަތެވެ. 21 ވަނަ ގަރުނުގެ ހަގީގަތަކީ މިއީ އެވެ.
