އިންޑިއާގެ ފޮރިން ސެކްރެޓަރީއާ ރައީސް ޞާލިޙު ބައްދަލު ކުރައްވައިފި
އިންޑިއާގެ ފޮރިން ސެކްރެޓަރީ ހަރްޝް ވަރްދަން ޝްރިންގްލާ، ރައީސް އިބްރާހިމް މުޙައްމަދު ޞާލިޙު ބައްދަލު ކުރައްވައިފިއެވެ.
ރައީސް އޮފީހުގައި މިއަދު ހެނދުނު އޮތް މިބައްދަލު ކުރެއްވުމުގައި ރައީސް ޞާލިހާއި އިންޑިއާގެ ފޮރިން ސެކްރެޓަރީ ވަނީ ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާ ކުރުމާގުޅޭ ގޮތުން މަޝްވަރާ ކުރައްވާފައެވެ.
މިއަހަރަކީ ދެ ޤައުމުގެ ޚާރިޖީ ގުޅުމަށް 55 އަހަރު ފުރޭ އަހަރުކަން ފާހަގަ ކުރައްވައި، ދެޤައުމުގެ ދެމެދު އޮތް ޚާރިޖީ ގުޅުމާއި ދެ ޤައުމުގެ ރައްޔިތުންގެ މެދުގައި އޮންނަ ގާތް ރަޙުމަތްތެރިކަމުގެ ގުޅުންތަކުގެ މައްޗަށް ރައީސް ޞާލިޙުގެ ވާހަކަފުޅުގައި އަލި އަޅުއްވާލައްވާފައި ވެއެވެ. އަދި ކޮވިޑް-19 އާ ގުޅިގެން އިންޑިއާއިން ރާއްޖެއަށް ވަމުންދާ އެހީތެރިކަން ވެސް ފާހަގަ ކުރެއްވިއެވެ.
މީގެއިތުރުން ސަރަޙައްދީ ވިޔަފާރި ކުރިއެރުވުމާއި، އިޤްތިޞާދީ ދާއިރާއިން ގުޅުން ބަދަހިކުރުމާއި، ފަތުރުވެރިކަމުގެ ދާއިރާއާއި ކޮވިޑް-19 އާއި ކުރިމަތިލުމުގައި އެއްބާރުލުން އިތުރު ކުރުމާ ގުޅޭގޮތުން ވެސް މިބައްދަލުވުމުގައި މަޝްވަރާ ކުރެއްވިއެވެ. އަދި ދެޤައުމުގެ ދެމެދުގައި ވައިގެ ދަތުރުފަތުރު ކުރުމަށް "އެއަރ ބަބްލް" އެއް ޤާއިމު ކޮށްދީފައި ވާތީ، އެކަން ޝުކުރުވެރިކަމާއެކު ރައީސް ޞާލިޙު ވަނީ ފާހަގަ ކުރައްވާފައެވެ. އެކަމުގެ ސަބަބުން ރާއްޖޭގެ ބޯޑަރު އަލުން ހުޅުވައިލުމާއެކު ރާއްޖެއަށް ޒިޔާރަތްކުރާ އިންޑިއާގެ ފަތުރުވެރިންގެ ޢަދަދު އިތުރުވެފައިވާކަން ވެސް ރައީސް ފާހަގަކުރެއްވިއެވެ.
