ހިތާނީ ހަފްލާތަކުގައި، ޝޯވ ނުބާއްވަން އަންގައިފި
ދުނިޔެއަށް ކުރިމަތިވެފައިވާ މި ނުރައްކާތެރި ކޮވިޑު-19 ގެ ދަނޑިވަޅުގައި، ބާއްވާ ހިތާނީ ހަފްލާ ތަކުގައި ޕާޓީ ތަކާއި ޝޯވް ނުބާއްވަން ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އަންގައިފިއެވެ.
ކުރިއަށް އޮތީ ހިތާނު ކުރުމުގެ މޫސުންކަމުން، ކޮވިޑު-19 ގެ ދަނޑިވަޅުގައި ހިތާނު ކުރުމުގެ ހަރަކާތްތައް ބޭއްވުމުގައި އަމަލު ކުރާނެ ގޮތުގައި ހާއްސަ އުސޫލެއް އެޗްޕީއޭއިން މިއަދު ވަނީ އާންމު ކޮށްފައެވެ.
އެ އުސޫލުގައި ވާގޮތުން ހިތާނު ކުރެވޭ ކުދިން ވީހާ ވެސް ބޮޑެތި ހޯލުތަކުގައި ބޭއްވުމުގެ އިންތިޒާމާއި، އަމިއްލަ ގޭގައި ބޭއްވުމުގެ އިންތިޒާމު ހަމަޖެއްސުމަށް އަންގާފައި ވެއެވެ.
އެއް ކުއްޖަކަށް ވުރެ ގިނައިން ހިތާނު ކުރާ ކަމުގައިވާނަމަ، އެއްގޭގެ ކުދިން ކަމުގައި ވުމާއި، ހިތާނު ކޮށްފައި ބޭއްވޭ ތަނުގެ ސާފުތާހިރުކަމާއި، މަދުވެގެން ތިން ފޫޓުގެ ދުރުމިން ބެހެއްޓެން ވާނެ ކަމަށް ވެސް އެ އުސޫލުގައި ވެއެވެ. އަދި ހިތާނު ކުރުމުގެ ހަފްލާއާއި ގުޅިގެން ގިނަ ބައެއް އެއްފަހަރާ ގެއަށް ޖަމާ ނުވާނޭ ފަދަ ގޮތަކަށް އިންތިޒާމު ހަމަޖެއްސުމަށް ވެސް ބަޔާންކޮށްފައި ވެއެވެ.
އަދި ކޮވިޑް-19ގެ އަލާމާތްތައް ފެންނަ މީހުން ގެއަށް ޒިޔާރަތް ނުކުރުމަށާއި ގެއަށް ޒިޔާރަތް ކުރުމުގައި ބަލިން ރައްކާތެރިވުމުގެ ގޮތުން އަޅަން ޖެހޭ އާންމު ފިޔަވަޅުތައް އެޅުމާއި ޒިޔާރަތް ކުރާ މީހުން ގިނައިރު މަޑު ނުކުރުމަށް ވެސް ވަނީ އިލްތިމާސް ކޮށްފައެވެ.
މަދުވެގެން އެއް ފަހަރު ގެއާއި ފާހަނާ ސާފު ކުރުމަށާއި އަތްލާ ތަންތަން މަދުވެގެން ދުވާލަކު ދެ ފަހަރު ސައިބޯނި ފެން ފޮތިގަނޑަކުން ރަނގަޅަށް ސާފު ކުރުމަށްފަހު ފެން ފޮތިން ފޮހުލުމަށް ވެސް އުސޫލުގައި ބުނެފައި ވާއިރު ތަށި ސަމުސާ ފަދަ ތަކެތި ބޭނުން ކުރުމަށް ފަހުގައި ރަނގަޅަށް ދޮވުމަށާއި އެކުއްޖެއްގެ ތަށި ވަކިން ބެހެއްޓުމަށް ވެސް މިއަދު ނެރުނު އުސޫލުގައި އަންގާފައި ވެއެވެ.
ބޭނުން ކޮށްފައިވާ މާސްކު އަދި ޓިޝޫފަދަ ތަކެތި އެޅުމަށް މަތި ޖެހިފައި ހުންނަ ތަކެތި ކޮތަޅު ލައްވައިގެން ގެންގުޅުމަށް ވެސް އެޗްޕީއޭ އިން އިލްތިމާސް ކުރެއެވެ.
