ރެސިޑެންޓް ވިސާއާއެކު އިނާޔަތް ދޭ ކަމަށް ބުނާ ވާހަކަ މިނިސްޓްރީން ދޮގުކޮށްފި
ރެސިޑެންޓު ވިސާގައި ރާއްޖޭގައި ދިރިއުޅޭ ބިދޭސީންނަށް ޚާއްސަ އިނާޔަތްތަކެއް ދޭ ކަމަށް ދެކެވޭ ވާހަކަ އެކޮނޮމިކް މިނިސްޓްރީން ދޮގުކޮށްފިއެވެ.
މިކަމާ ގުޅިގެން އެކޮނޮމިކް މިނިސްޓްރީން ނެރުނު ނޫސްބަޔާނުގައި ވަނީ، އިމިގްރޭޝަނުގެ ޤާނޫނަށް އިޞްލާޙު ގެނައުމުގެ ބިލުގައި ކޯޕަރޭޓް ރެސިޑެންޓް ވީސާ ދޫކުރުމާބެހޭ ގޮތުން ހިމަނާފައިވާ މާއްދާގެ މާނަ އޮޅޭ ގޮތަށް ޢާންމުންގެ ތެރޭގައި ޙަޤީޤަތާ ޚިލާފު މަޢުލޫމާތުތަކެއް ހިއްސާކުރަމުން އަންނަ ކަމަށާއި އެކަން ކުށްވެރިކުރާ ކަމަށެވެ.
ދިވެހިރާއްޖޭގެ އިމިގްރޭޝަން ގަވައިދުގެ ދަށުން ކޯޕަރޭޓު ރެސިޑެންޓް ވީޒާ ދޫކުރުމާބެހޭ ގަވާއިދު އެކުލަވާލާ ގެޒެޓުކޮށްފައި ވަނީ، ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަންއިން 27 އެޕްރިލް 2015 ގައެވެ.
އެ ގަވާއިދު އެކުލަވާލެވުމާއެކު، ކޯޕަރޭޓް ރެސިޑެންޓް ވީސާއާއި ގުޅުވައިގެން ލިބޭ އިނާޔަތްތަކުގެ ތެރޭގައި، ޑިއުޓީ ފްރީ، ޓެކްސް ފްރީ، ފާސްޓް ޓްރެކް ސަރވިސް ފަދަ ޚިދުމަތްތައް ޕްރޮމޯޓު ކުރަމުން އެދުވަސްވަރު އައިސްފައިވީ ނަމަވެސް މި ފަދަ އިނާޔަތްތައް، ކޯޕަރޭޓް ރެސިޑެންޓް ވިސާ އާއި ގުޅުވައިގެން ދިނުމަކީ، މި ސަރުކާރުގެ ވިސްނުމެއް ނޫން ކަމަށް ވެސް މިނިސްޓްރީން ނެރުނު ބަޔާނުގައި ވަނީ ވިދާޅުވެފައެވެ.
