މީދޫ ކައިރި ކަނޑުމަތިން މަތިންދާ ބޯޓެއްގެ ފިޔަގަނޑެެއް ފެނިއްޖެ
ދ. މީދޫ ކައިރި ކަނޑުމަތިން މަތިންދާބޯޓެއްގެ ފިޔަގަނޑެެއް ފެނިއްޖެއެވެ.
އެނގިފައިވާ ގޮތުގައި އެފިޔަގަނޑު ފެނިފައި ވަނީ މިއަދު އަސްރު ނަމާދު ވަގުތު އެރަށު ތޮށިގަނޑާ ދިމާލު ބޭރު މޫދުންނެވެ.
އޮންލައިން ނޫސް "ވަގުތު" އިން ބުނެފައިވަނީ ކަނޑުމަތިން އެއްޗެއް ދާތަން ފެންނަ ކަަމަށް މީހަކު ދިން މައުލޫމާތަކަށް ބިނާކޮށް ޑިންގީގައި އެ ސަރަހައްދަށް ދިޔައިރު، އެއީ މަތިންދާ ބޯޓެއްގެ ފިޔަގަނޑެއްކަން އެނގުނު ކަަމަށް، އެވަގުތު އެކަމުގައި ހަރަކާތްތެރިވީ މީހަކު އެނޫހަށް މައުލޫމާތު ދީފައިވާ ކަމަށެވެ.
"އަޅުގަނޑުގެ ގޭގެ ކުއްޖަކު ގުޅާފައި ބުނީ، އެބަދެޔޭ އެއްޗެއް އާދެ ބަލާށޭ. އަޅުގަނޑުމެން ގޮސް އޭތި ނެގީއެއް ނޫން، އޭތީ ބޮޑުކަމުން ޑިންގީއަށް ނުލެވިދާނެ ކަން އެނގޭތީ ޑިންގީގެ އަރިމަތީގައި ދެކޮޅު ބަނދެގެން އޭތީ ގެނައީ ރަށާ ހަމައަށް" އެމީހާ ބުނެފައި ވެއެވެ.
އެމީހާ ބުނިގޮތުގައި އެފިޔަގަނޑުގެ ދިގުމިނުގައި ގާތްގަނޑަކަށް 22 ފޫޓު ހުންނާނެއެވެ.
އެމީހާ އިތުރަށް ބުނެފައިވަނީ އެފިޔަގަނޑު މީދޫއާއި ހަމައަށް ގެނެެވުނީ ގާތްގަނޑަކަށް 5:30 ހާއިރު ކަމަށާއި މިހާރު އޭތި އޮތީ ޖެޓީ ސަރަހައްދުގައި ބާއްވާފައި ކަމަށެވެ.
މިހާރު މިކަން ވަނީ ފުލުހުންނާއި ސިފައިންގެ ސަމާލުކަމަށް ގެނެސްފައި ކަމަށް އެރަށު ކައުންސިލް ރައީސް އިލްޔާސް ލަތީފް ކަށަވަރު ކޮށްދީފައިވެއެވެ.
