ކަރަންޓީނު ނުވެ ދަތުރު ކުރެވޭނީ ގުޅުން ނެތް ކޭސްތައް މަދުވުމުން: އެޗްއީއޯސީ
މާލެއިން ރަށްރަށް ކަރަންޓީނު ނުވެ ދަތުރުކުރެވޭ ފަދަ ގޮތަކަށް ލުއި ދެވެން އޮތީ, އަންލިންކްޑް ކޭސްތައް ނުވަތަ އެއް ކޭސް އާ އަނެއް ކޭސް އާ ގުޅުން ނެތް ކޭސްތައް މަދުކުރެވިގެން ކަމަށް ހެލްތް އެމަޖެންސީ އޮޕަރޭޝަންގެ ތަރުޖަމާނު ޑރ.ނަޒްލާ ރަފީގު ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މިހާރު ވެސް ކޮވިޑަށް ފައްސިވާ ކޭސްތަކުގެ 22 އިންސައްތަ އަކީ އެހެން ކޭސްތަކާ ގުޅުމެއް ނެތް، ކޮންތާކުން ކާކާ ކޮންޓެކްޓް ވެގެން ފައްސިވި ކޭސްތަކެއްކަން ނޭނގޭ ކަމަށެވެ.
ޑރ. ނަޒްލާ ވިދާޅުވީ ރަށްޜަށަަށް ކަރަންޓީނަށް ފޮނުވި މީހުންގެ ތެރެއިން 198 މީހުން ފައްސިވެފައިވާ ކަމަށާއި، ކަރަންޓީނު ނުކުރި ނަމަ މިއީ ވެސް އަތޮޅު ތެރެއަށް ފެތުރިގެންދާނެ 198 ކޭސް ކަން ފާހަގަކުރައްވާފައެވެ.
އަދި ލޯކަލް ޓޫރިޒަމަށް ރަށްރަށަށް ދާ ފަތުރުވެރިން ވެސް ބައްޔަށް ފައްސިވާ ކަން ފާހަގަކޮށް ނަޒްލާ ވިދާޅުވީ ފަތުރުވެރިންނާއި ދިވެހިންނާއި ވަރަށް ބޮޑަށް ވެސް ތަފާތު ކަމަށެވެ.
"ދިވެހިން ގޮސްފިއްޔާ އާއިލާއާ އެކު ވަގުތު ހޭދަކުރުން، ރައްޓެހިންގެ ގޭގެ އަށް ޒިޔާރާތް ކުރުން، މައިޒާންތަކަށާއި ފިހާރަތަކަށާއި ތަންތަނަށް ދިއުމާއި ސްކޫލްތަކާއި ބޯކޮށާ ތަންތަނާއި ހިދުމަތްދޭ ހުރިހާ ތަނަކަށް ރަށްރަށުގައި ދާނެ. މީހުންނާ ދިމާވާނެ،" ޑރ. ނަޒްލާ ވިދާޅުވި އެވެ.
އެއްވެސް ބަޔަކަށް އުނދަގޫވާ ފަދަ އުސޫލެއް ގެންގުޅެން ބޭނުން ނުވާކަން ފާހަގަކު ރައްވައި ނަޒްލާ ވިދާޅުވީ ނަމަވެސް މި ފަދަ ނިންމުމެއް ނިންމާއިރު ވަރަށް ގިނަ ކަންކަމަށް ބަލަން ޖެހޭ ކަމަށާއި ފައްސިވާ މީހުންގެ އަދަދުތަކަށް ބަލައި ވީ އެންމެ އަވަހަކަށް ލުއި ދޭނެ ކަމަށެވެ.
