އެންމެ ފުރަތަމަ ތިމާގެ އަމިއްލަ ނަފުސަށް އިތުބާރު ކުރާށެވެ.
ކޮންމެ ކަމެއް ކޮންމެ ގޮތަކަށް ކުރިކަމުގައިވީ ނަމަވެސް ތިމާގެ އަމިއްލަ ނަފުސަށް ކުރާ އިތުބާރު ގެއްލުވާ ނުލާށެވެ. ބައެއް ފަހަރު އަޅުގަނޑުމެންގެ މި މުޖުތަމަޢުން ފެނިގެންދާ ނޭދެވޭ އަމަލަކީ ކޮންމެ ކަމެއް ކުރަން އުޅުނު ކަމުގައިވީ ނަމަވެސް އަމިއްލަ ނަފުސަށް އިތުބާރު ނުކުރުމެވެ. އެކަން ތިމާ އަމިއްލަ ނަފުސަށް ނުވާނޭ ކަމުގައި ބުނުމެވެ.
މިފަދަ ކަންކަމުގެ ސަބަބުން އަޅުގަނޑުމެން ކުރަން ހުންނަ އެތަކެއް ކަމެއް ނުކުރެވި އެބަދެއެވެ. އަދި ކުރެވޭ އެތައް ކަމެއް ތިމާގެ އަމިއްލަ ނަފުސަށް ވިސްނައިދޭ ގޮތެއްގެ ސަބަބުން ނުކޮށް ދޫކޮށްލެވެއެވެ. އެހެންކަމުން އެންމެ ފުރަތަމަ ކަމަކަށް ތިމާގެ އަމިއްލަ ނަފުސަށް އިތުބާރު ކުރަން ދަސްކުރާށެވެ.
ކުރާ ކޮންމެ ކަމެއްގައި ނައްސިކޮށް ވިސްނުމަކީ ވެސް ތިމާގެ ހިތްވަރަށް ބުރޫ އަރާ ކަމެކެވެ. މީހަކު ކަމަކު ބުނެފިނަމަ “ނުވާނޭ، ނޫނެކޭ” މިފަދަ މޭރުމަކުން ވާހަކަ ދައްކާކަމުގައި ވަނީނަމަ ހުރިހާ ކަމެއް ވެސް ދާނީ ހަމަ އެފަދަ ގޮތަކަށެވެ. އެހެންކަމުން ދިރިއުޅުމުގައި ފައްސިކޮށް ވިސްނުމަކީ ދިރިއުޅުން ވެސް ފައްސި ވާ ކަމަކެވެ.
މިހުންނަނީ އަޅުގަނޑުމެންނަށް ކުރެވޭ ވަރަށް ނޭދެވޭ ކުޑަކުޑަ އަމަލުތަކެވެ. މިފަދަ ކަންކަމަކީ ދިރިއުޅުމާ އެތައް ގޮތަކުން ގުޅިލާމެހިފައިވާ ކަންކަމެވެ. ތިމާގެ ކާމިޔާބީގެ ތަޅުދަނޑީގެ ހިއްސާއެއްގެ ގޮތުގައެވެ. ވީއިރު މިކަންކަމާ ވިސްނާލުން ވަރަށް މުހިންމެވެ.
