ކޫދު ތިޔެން ލިހަކުން: ހުވަދޫ ބަހުން މުޖުތަމަޢަށް އިބުރަތްތެރި މެސެޖުތަކެއް
މީސްމީޑިއާގައި މީގެ އެއް މަސް ދުވަސް ކުރިން މަޝްހޫރު ވެގެން ދިޔައީ ހުވަދޫ ބަހުން ނެރިފައިވާ ލަވައެއް ކަމަށްވާ "މެންސާ މަދުއްރާ" އެވެ. އޭގެ އެއް މަސް ފަހުން އަނެއްކާވެސް މީސްމީޑިއާގައި މިވަނީ ހުވަދޫ ބަހުން ހިތްގައިމު ރީތި ލަވައެއް ވައިގައި ހިފައިފައެވެ. މި ލަވައިގެ ނަަމަކީ "ކޫދު ތިޔެން ލިހަކުން" އެވެ.
މި ލަވަ އަކީވެސް "މެންސާ މަދުއްރާ" ނެެރުނު ދެ ސްޓޫޑިއޯއިން ނެރެފައިވާ ދެ ލަވައެވެ. މި ލަވަ ތައްޔާރު ކޮށްފައިވާ ބުންނަރު ސްޓޫޑިއޯ އަކީ މިވަގުތު ތިނަދޫގައި ހުރި ހަމަ އެކަނި މިއުޒިމް ކޮމްޕޯޒް ކުރާ ސްޓޯޑިއޯއެވެ. އަދި ޗައްޕަލާ ސުޓޫޑިއޯ އަކީ ތިނަދޫގައި ވަރަށް ފަހުން ހުޅުވި ސްޓޫޑިއޯ އެކެވެ. މި ސްޓޫޑިއޯގެ ފަރާތުން އިބުރަތްތެރި މެސެޖު މުޖުތަމައުއަށް ދިނުމަށް މަޖާ ކޮންސެޕްޓުތަކަށް ވީޑިއޯތައް އަބަދުވެސް ހަދަމުން ގެންދެއެވެ. މި ލަވައިގައި މީގެ އިތުރުން ފޮޓޯ މޯލްޑިވްސް އިން ވެސް ވަނީ ބައިވެރި ވެފައެވެ. ފޮޓޯ މޯލްޑިވްސް އަކީ ތިނަދޫގެ ފޮޓޯ ނަގާ ސްޓޫޑިއޯއެކެވެ.
މި ލަވައާ ބެހޭގޮތުން "ދެން"އަށް މައުލޫމާތު ދެއްވަމުން ބުންނަރު ސްޓޫޑިއޯގެ ވެރިޔާ ބާތިން ބުނީ މި ލަވައަކީވެސް އިޖުތިމާއީ މައްސަލަތަކަށް އަލިއަޅުވާލާ އެ މައްސަލަތަކަށް ގިނަ ބައެއްގެ މެދުގައި ހޭލުންތެރިކަން އިތުރު ކުރުމުގެ މަގުސަދުގައި ނެރުނު ލަވައެއް ކަމަށެވެ. އަދި މި ލަވައިގެ ސަބަބުން އެދެވޭ އަސަރު ތަކެއް ކުރާނެ ކަމަށް ލަފާ ކުރެވޭ ކަމަށް ބާތިން ބުންޏެވެ.
ޗައްޕަލާ ސްޓޫޑިއޯގެ ވެރިޔާ މާޖިދު "ދެން"އާ ވާހަކަ ދައްކަމުން ބުނީ މިލަވަ އަކީ މަސްތުވާތަކެތީގެ އަަވައިގައި ޖެހި މަގު ގެއްލިފައި ތިބި ޒުވާނުންނަށް ރަނގަޅު މެސެޖެއް ދިނުމުގެ މަގުސަދުގައި ތައްޔާރު ކޮށްފައިވާ ލަވައެއް ކަމަށެވެ. މި ލަވައިގެ ކެމެރާ ކޮށްދިން ފަރާތްތަކާއި ވީޑިއޯ ޕްރޮޑަކްޝަންގައި އެހީތެރިވި ފަރާތްތަކަށް މާޖިދު ވަނީ ޝުކުރު އަދާ ކޮށްފައެވެ.
މި ލަވައިގައި މައިގަނޑަކާއި ޖުމުލަ 5 ކަޑި ހިމެނެއެވެ. މި ލަވައިގެ ޅެން ހައްދަވާފައި ވަނީ މަޝްހޫރު ޅެންވެރިޔާ އަބްދުﷲ އަފީފް (އަފިއްބެ) އެވެ. އަދި މި ލަވައިގެ މިއުޒިކް ކޮމްޕޯޒް ކޮށްފައިވަނީ އަބްދުލް ބާތިން އެވެެ. އޭނާ އަކީ ބުންނާރު ސްޓޫޑިއޯގެ ވެރިޔާއެވެ.އަދި މި ލަވަ ކިޔާފައިވަނީ ޝަފީގް އާއި މޯލްޑިވިއަން އައިޑަލް އިން ގިނަ ބައެއްގެ މަޤުބޫލުކަން ހޯދި ތިނަދޫގެ ތަރި މުހައްމަދު ޒަލީފެވެ.
ލަވައިގެ ވީޑީިއޯ ޑައިރެކްޓް ކޮށްފައިވަނީ މެންސާ މަދުއްރާ ލަވަ ޑައިރެކްޓް ކޮށްދީފައިވާ މަޝްހޫރު ޓިކްޓޮކް ސްޓާރ ހާޒިފް މުހައްމަދެވެ. އަދި ކެމެރާ ކޮށްދީފައި ވަނީ ތިނަދޫގައި ފޮޓޯ ނެގުމަށް މަޝްހޫރު ފޮޓޯ މޯލްޑިވްސް މުހައްމަދު ފަލާހެވެ.
ބުންނަރު ސްޓޫޑިއޯގެ ވެރިޔާ ބާތިން ބުނީ މި ލަވަ ތައްޔާރު ކުރުމުގައި މޯލްޑިވްސް ޕޮލިސް ސާރވިސްގެ އަދި ތިނަދޫ ރިހެބިލިޓޭޝަން ސެންޓަރުގެ އެހީތެރިކަން ވަރަށް ބޮޑަށް ލިބިގެން ދިޔަ ކަމަށާއި އެކަމަށްޓަކައި އެ ދެފަރާތަށް ޝުކުރު އަދާ ކުރަން ބޭނުންވާ ކަމަށެވެ. އަދި މި ލަވައިގެ މަސައްކަތުގައި ހަރަކާތްތެރިވީ ތިނަދޫއަށް އުފަން ތިނަދޫގެ ޒުވާން ކުދިން ކަމަށާއި އެކުދިންނަށް ބުންނަރު ސްޓޫޑިއޯގެ ފަރާތުން އައްސަރި ބަހާއި ސާބަސް ރައްދު ކުރާ ކަމަށްވެސް ބާތިން ބުންޏެވެ. އަދި ބުންނަރު ސްޓޫޑިއޯއާ އެކު މަސައްކަތް ކުރަން ބޭނުންވާ ހުރިހާ ފަރާތްތަކަކާ ގުޅިގެން ވެސް ބުންނަރު ސްޓޫޑިއޯ އިން މަސައްކަތް ކުރާނެ ކަމަށް އޭނާ ފާޙަގަ ކުރިއެވެ.
މި ލަވައަކީ ވެސް މަޖާ ކޮންސެޕްޓަކަށް ހަދާފައިވާ ލަވައެކެވެ. އެހެން ނަމަވެސް މި ލަވައިގައި ވެސް ވަނީ ނުހަނު މުހިއްމު އަދި އަގުހުރި ނަސޭހަތް ތަކެއް ދީފައެވެ. އަދި މުޖުތަމައުގައި މިއަދު ކަންތައްތައް ހިނގަމުންދާ ގޮތް ވަނީ ވަރަށް ރީއްޗަށް ބަޔާން ކޮށްދީފައެވެ.
މި ލަވައިގެ މައިގަނޑުގައި ބުނާ ވާހަކަ އަކީ މިއަދުގެ މި ޖީލުގައި ކުދިން އުޅޭ ގޮތުން ބިރުން މަރުވެދާނެ ވާހަކައެވެ. އަދި އެކުދިން ތަރުބިއްޔަތު ކޮށްފައި ތިބީ ވަރަށް ވެސް ދެރަކޮށް ކަމަށް މި ލަވައިގެ މައިގަނޑުގައި ފާހަގަ ކޮށްފައިވެއެވެ.
ލަވައިގެ ފުރަތަަމަ ކަޑީގައި ބުނެފައިވަނީ އެކުދިން މަގުމަތީގައި ތިބޭއިރު ވެސް ތިބެނީ މޮޔަވެފައި ތިބޭ ބައެެއް ގޮތަށް ކަމަށެވެ. އަދި އެގޮތަށް ތިބެ މީހުންނަށް ކުރަނީ ޖެއްސުން ކަމުގައިވެސް ބުނެފައިވެއެވެ. ދެވަނަ ކަޑީގައި ފާހަގަ ކޮށްފައިވަނީ އެކުދިން ލަދެއް ހަޔާތެއް ނެތި އެއްޗެހި ފޭރޭއިރު ވެސް އެއްޗެއް ހިތަށް ނާރާ ކަމެވެ. އެ ފޭރޭ ތަކެއްޗަކީ އޭނާގެ މަންމަ ނުވަތަ ދައްތައެއްގެ އެއްޗެއް ވިޔަސް ފަރުވާލެއް ނެތެވެ.
ލަވަައިގެ ތިން ވަނަ ކަޑީގައި ފާހަގަ ކޮށްފައި ވަނީ ހެދިފައިވާ ގަވައިދުތަކަށާއި ދީނީ ކަންކަމަށް އެކުދިން އަޅާ ނުލާ ވާހަކައެވެ. އަދި ބޭނުން ގޮތަކަށް ބޭއަދަބީ އަމަލުތައް ވެސް ކުރަމުން ގެންދާ ކަން ފާހަގަ ކޮށްފައިވެއެވެ. ހަތަރުވަނަ ކަޑީގައި ބުނެފައި ވަނީ އެކުދިން އެކަންތައްތައް ކުރަނީ ފަހުން ވާނެ ގޮތަކަށް ވިސްނާ ނުލާ ފެންވެރުމެއް ވެސް ނެތި ކަމަށެވެ. އަދި މަސައްކަތެއް ނުކޮށް އަބަދު އެގޮތަށް އުޅެ އުޅެ އެމީހުންގެ ސޫރަ ވެސް ހުންނަނީ ގެއްލިފަައި ކަން ހަތަރުވަނަ ކަޑީގައި ފާހަގަ ކޮށްފައިވެއެވެ.
ލަވައިގެ އެންމެ ފަހު ކަޑީގައި މަސްތުވާ ތަކެތީގެ އަވައިގައި ޖެހިފައިވާ ޒުވާނުންނަށް ދީފައި ވަނީ ވަރުގަދަ ނަސޭހަތެކެވެ. އެގޮތުން، މަސްތުވާ ތަކެތި ބޭނުން ކުރުމާ ދުރުހެލިވެ އުޅުމާމެދު ރަނގަޅަށް ފިކުރު ކުރުމަށް ނަސޭހަތްތެރިވެފައި ވެއެވެ. އަދި މީހުންގެ އިހްތިރާމާއި ލޯބި ލިބޭ ގޮތަށް އުޅެން ދަސް ކުރުމަށް ވެސް ނަސޭހަތް ތެރިވެފައިވެއެވެެ.
މި ލަވަ އަޕްލޯޑް ކުރިތާ މާގިނައިރުތަކެއް ނުވެ ގިނަ ބަޔަކު ވަނީ މި ލަވަ މީސްމީޑިއާގައި ހިއްސާ ކޮށްފައެވެ. އެގޮތުން މިހާރުވެސް ތޭރަ ހާހާއި ގާތް ކުރާ އަދަދަކަށް މީހުން މި ލަވަ ބަލައިފައިވާކަން ފާހަގަ ކުރެވެއެވެ.
