އޭޑީކޭގެ ބިލަށް އެރި 30،000 ރުފިޔާ ހެޔޮއެދޭ ދީލަތި ފަރާތްތަކެއްގެ އެހީއާއެކު ދައްކައިފި!
އޭޑީކޭ ހޮސްޕިޓަލުގައި މިދިޔަ މަހުގެ 22 ވަނަ ދުވަހު އެޑްމިޓުކޮށް އޮޕަރޭޝަން ކުރުމަށްފަހު، ޑިސްޗާޖް ކުރިއިރު ބިލަށް 30،000 ރުފިޔާ އެރުމުން، ބިލު ނުދެއްކިގެން ހާލުގައި ޖެހުނު އާއިލާއަށް މިއަދު އެބިލު ދެއްކިއްޖެއެވެ.
"ދެން" އަށް މައުލޫމާތު ދެމުން ބަލިމީހާގެ ދައްތަ އައިޝަތު ޝީޒާ ބުނީ، އެހީއަށް އެދިގެން އިއްޔެ ޚަބަރު ޖަހައިދިން ފަހުން މިރޭގެ ގާތްގަނޑަކަށް 9:00 ޖެހުމާ ހަމައަށް 9،900 ރުފިޔާ ލިބުނު ކަމަށެވެ.
"ބާކީ 20،100 ރުފިޔާ ދައްކައިދިނީ ހޮސްޕިޓަލަށް ދިޔަ ދީލަތި ދެމީހަކު. އެމީހުން ގޮސް ހޮސްޕިޓަލުގައި އެދުނު އެޑްމިޝަން ފޯމު ދައްކައިދޭން. އެއީ އަޅުގަނޑުމެން އެދުނީ ވޯޑުގައި އެޑްމިޓުކޮށް ދޭން ކަމަށް އަޅުގަނޑުމެން ބުނެފައިވާތީ ހަގީގަތް ހޯދާލަން. ނަމަވެސް ހޮސްޕިޓަލުން އެފޯމު އެމީހުންނަށް ވެސް ނުދެއްކި ބުނީ މެނޭޖްމަންޓުން މަނާ ކޮށްފައިވާ ވާހަކަ. ފޯމު ނުދެއްކެންޏާ އޭގެ ފޮޓޯއެއް ނަގާފައި ދައްކައި ދިނުމަށް ވެސް އެދުނު. އެކަމަށް ވެސް ހޮސްޕިޓަލުން ދެކޮޅު ހެދީ. އެހެންކަމުން އަަޅުގަނޑުމެން ހެދީ ތެދު ކަމަށް ބަލާފައި އެބޭފުޅުން އަޅުގަނޑުމެންނަށް ބިލުގެ ބާކީ ބައި ދައްކައިދިނީ" ޝީޒާ މައުލޫމާތު ދިނެވެ.
ޝީޒާ ބުނި ގޮތުގައި ބިލު ދައްކައިދޭން މިރޭ އޭޑީކޭ ހޮސްޕިޓަލަށް ދިޔައީ ދެ ފިރިހެނެކެވެ. އެމީހުންނަކީ ކޮންމެވެސް ޖަމިއްޔާއެއްގެ ބައެއްހެން ހީވާ ކަމަށާއި އެމީހުންގެ އެއްވެސް މައުލޫމާތެއް ނުދޭކަމަށް ވެސް ޝީޒާ ބުންޏެވެ.
"މިފުރުސަތުގައި އަޅުގަނޑު އެދެމީހުންނަށާއި، ފައިސާ ޖަމާކޮށްދިން އެހެން ހުރިހާ އާންމު ފަރުދުންނަށް ހިތުގެ އެންމެ ފުންމިނުން ޝުކުރު ދަންނަވަން" ޝީޒާ ބުންޏެވެ.
