ހަގީގީ ހާދިސާ: ހެދި ސިހުރެއްގެ ސަބަބުން އަންހެނަކަށް 100 އަށްވުރެ ގިނަ ޖިންނިން ގޯނާކުރި..!
މިއީ ރާއްޖޭގެ އުތުރުގެ ރަށެއްގެ ދެމަފިރިއަކަށް ދިމާވި ހަގީގީ ހާދިސާއެކެވެ. މިވާހަކަ "ދެން" އަށް ހިއްސާ ކުރީ އަންހެންމީހާގެ ކޮއްކޮ އެކެވެ.
"އަހަރެންގެ ދައްތައާއި ޅިޔަންބެ ކައިވެނި ކުރީ ދެ އާއިލާގެ ވެސް ނުރުހުމުގައެވެ. އެއީ ދެމީހުންނަކީ ދެ ރަށެއްގެ ދެމީހުންނަށް ވާތީއެވެ. ނަމަވެސް ދައްތަގެ އުފަލަށްޓަކައި މަންމަމެން ފަހުން އެކައިވެންޏަށް ޤަބޫލުވިއެވެ.
ކައިވެނިކުރީ ޅިޔަންބެގެ ރަށުގައެވެ. ހަ އަހަރު ވަންދެން އެރަށުގައި އުޅުމަށްފަހު ޖެހުނު މައްސަލައެއްގައި ދައްތަ އެނބުރި އަހަރުމެންގެ ރަށަށް ބަދަލުވިއެވެ. ދައްތަދެކެ ޅިޔަންބެގެ އާއިލާ މީހުން ވަރަށް ރުޅި އާދެއެވެ. ދޮގު ވާހަކަތައް ދައްކައިގެން އެދެމީހުން ދުރު ކުރުވޭތޯ ވެސް ބެލިއެވެ.
މިހާދިސާ ހިނގީ ދައްތަމެންގެ ކައިވެންޏަށް ހަތް އަހަރުވީ ފަހުންނެވެ. އެމީހުންގެ އަންހެން ދަރިއަކު ވެސް ހުއްޓެވެ. ރަށަށް ބަދަލުވި ފަހުން އެއް ފަހަރު ޗުއްޓީއަކަށް ޅިޔަންބެގެ ރަށަށް ދިޔައެވެ. ބަދަލުތައް އަންނަން ފެށީ އެދަތުރަށްފަހު އަނބުރާ ރަށަށް ދިޔަ ފަހުންނެވެ. ދައްތަގެ ގައިގައި ފިއްގަނޑުތަކެއް ނަގާ، ބޮލަށް އެނބުރުން ވެސް އަރަން ފެށީއެވެ. ޑޮކްޓަރަށް ވެސް ދެއްކިއެވެ. ނަމަވެސް ވަމުން އަންނަ ގޮތެއް ނޭނގުނެވެ. ޅިޔަންބެ އެއިރު މަސައްކަތްކުރީ ރިސޯޓެއްގައެވެ. ރަށަށް އާދެވެނީ ވަރަށް މަދު ފަހަރަކުއެވެ.
ދައްތަ ބަލިވާން ފެށި ވާހަކަ ބުނުމުން އެދުވަސްކޮޅު ޅިޔަންބެ ރަށަށް އައެވެ. ނަމަވެސް އެދުވަހު މަޣްރިބް ނަމާދަށް ބަންގި ގޮވިތަނާހެން ދައްތަ ޚަަބަރު ހުސްވެގެން ވެއްޓުނެވެ. ބަންގީގެ އަޑު ކެނޑުމާއެކު ހޭއެރިއިރު ދައްތައަށް ވާން ފެށީ ކުރިއަށްވުރެ އާދަޔާ ޚިލާފު ގޮތްތަކެކެވެ. ނުވެސް އެނގޭ ބަސްތަކަކުން އެއްޗެހިތަކެއް ވެސް ގޮވަމުން، ޅިޔަންބެ ދެކެ ރުޅި އައިސްގެން އައުގުރާނަ ވެސް ގޮވިއިރު، ދައްތަގެ މޫނު މަތީގައިވެސް ހުރީ ބޮޑެތި ފިއްގަނޑުގަނޑު ނަގާފައެވެ. އަތާއި ފައިގައި ދޮން ދަގަނޑު ގަނޑެއް ޖެއްސުމުން ފިހިފައި ހުންނަހެން ވެސް ހުއްޓެވެ. އެ ތަންތަނުގައި އަތްލާފައި ދައްތަ ރޮއެ، ތަދުވާ ކަމަށް އެއްފަހަރު ރުއިއްޔާ، އެތަނުގައި ބޭސް ހާކައިދޭން އުޅޭއިރަށް ރުޅި އައިސްގެން އިތުރަށް ހަޅޭލަވަން ފަށައެވެ. ވަކިން ޚާއްސަކޮށް، ޅިޔަންބެ ކައިރިވަނީ ނަމަ އިތުރަށް ރުޅި އާދެއެވެ. ޅިޔަންބެ ރަށަށް އައިފަހުން ދުވާލުގަޑިގައި ދައްތަ އޮންނަނީ ނިދާފައެވެ. ކާންދޭން ހޭލައްވަން ޖެހެނީ ގަދަ ކަމުންނެވެ. ދެ ދުވަސް ވަންދެން ދެނަމާދު ގަޑީގައި ދައްތައަށް ކުރިން މިބުނިހެން ކަންތައްވީއިރު، ދަންވަރު ގަޑީގައި ވެސް ގޮތްތަކެއް ވިއެވެ. ދައްތަގެ އަމިއްލައަތުން ލައިގެން ހުންނަ އަންނައުނު ބޭލިތަން ފެންނަކަމަށާއި ނަމަވެސް އެއީ ދައްތަ ކުރާ ކަމެން ނޫންކަން އެނގޭކަމަށް ޅިޔަންބެ ކިިޔައިދީފައިވެއެވެ. އަދި ތިމަންނާ ރޭޕް ކުރަނީއޭ ސަލާމަތް ކުރާށޭ ބުނެ އާދޭސް ކުރަން ފެށުމުން ޅިޔަންބެ ދައްތައާއި ކައިރިވާން އުޅޭއިރަށް ފޮޅާލާ، ރުޅި އައިސްގެން ދުރަށް ގޮސް އެއްޗެހި ކިޔާ ކަމަށް ވެސް ބުންޏެވެ. ޅިޔަންބެ ބުނީ ދައްތައަށް ރޫހާނީ ގޮތުން އެއްޗެއް ގޯނާ ކުރާހެން ވަރަށް ބޮޑަށް ހީވާ ކަމަށެވެ. އެހެންކަމުން އެކަމުގައި އަހަރުމެން އެހީތެރިވުމަށް އެދުނެވެ.
އެފަދައިން ޅިޔަންބެ އެދުމުން އެދުވަހުގެ އިރުއޮއްސެން ވާއިރަށް، ރަށުގައި ހުރި ރުޤްޔާ ކުރާ މީހަކު ގެނައެވެ. އެމީހަކީ އަހަރުމެންގެ ތިމާގެ ވެސް މީހެކެވެ. އޭނާ ގޭގެ ދޮރުމައްޗަށް އެރުމާއެކު ވެސް ދައްތަ ހަޅޭލަވާ ގޭގައި ހުރި އެއްޗެހިތައް ވެސް ހަލާކުކޮށް މީހުންނަށް އަނިޔާކުރަން އުޅުނެވެ. ޅިޔަންބެއާއި، ބައްޕައާއި އަހަރެންގެ ތިން ބޭބެ ދައްތަ ހިފަހައްޓާފައި އެނދުގައި ބަނެވެ. އަދި ރުޤްޔާ ކުރާ ބޭބެ ކޮޓަރިއަށް ވެއްދިއެވެ.
އެބޭބެ އެއްޗެހިތަކެއް ފެނަށް ވެސް ކިޔަވާފައި، ދައްތަގެ ހަށިގަނޑުގައި އުޅުނު އެއްޗަކާމެދު ސުވާލު ކުރިއެވެ. ރުޤްޔާ ކުރަން ފެށުމުން އެނގުނީ ދައްތަގެ ހަށިގަނޑުގައި އުޅުނީ އެންމެ ޖިންނިއެއް ނޫން ކަމަށާއި މުޅިއަކު 120 ޖިންނިއެއްގެ ގޯނާ ދައްތައަށް ލިބެމުންދިޔަ ކަމަށެވެ. ރުޤްޔާ ކުރާ ބޭބެ ބުނީ އެޖިންނީންގެ ތެރޭގައި ފިރިހެން ޖިންނިތަކަކާއި އަންހެން ޖިންނީންތަކެއް ވެސް ވާ ކަމަށެވެ. ދައްތައަށް ސިހުރު ހަދާފައި ހުރުމުން، ސިހުރުގެ ބާރުން ފިރިހެން ޖިންނިންތަކެއް ދައްތަ ކައިރިއަށް އައުމުން، އެ އެއްޗެއްސަށް ދައްތަ ރީތިވެގެން އަވަލާ، ދައްތަ ރޭޕްކުރަނީ ކަމަށެވެ. ދައްތަގެ ގުނަވަންތަކަށް އަނިޔާކޮށް ޒަޚަމްކުރަނީ އަންހެން ޖިންނީންތަކެއް ކަމަށް ވެސް ބުންޏެވެ. ފިރިހެން ޖިންނީން ދައްތައާ ހެދި އުޅޭތީ އެއަންހެން ޖިންނީން އެކަމާއި ރުޅި އައިސްގެން ހަސަދަވެރި ވެގެން އަނިޔާ ކުރަނީ ކަމަށް ބުންޏެވެ.
ދައްތައަށް ސިހުރު ހަދާފައި ހުރީ ކޮން ބައެއްކަން އެނގުނީ، ޖައްސަ ޖައްސައިގެން ތިން ރޭ ކިޔެވެލި ކިޔަވާ ފެން ޖެހުމަށްފަހު، އެންމެފަހު ރޭގައެވެ. އެރޭ އެޖިންނީން ހުރިހާ ވާހަކައެއް ކިޔައިދިނެވެ. ބުނީ ސިހުރު ހެދީ ޅިޔަންބެގެ އާއިލާއިން ކަމަށާއި އެމީހުން ހުރީ ދައްތައަށް ސިހުރު ކާންދީ، ހެދި ސިހުރު ފެން އެއްޗަކުން ފެންވެސް ވަރުވާފައި ކަމަށެވެ. މިހެން ބުނުމުން ޅިޔަންބެ ވެސް އެރަށަށް ގޮސް ހުރިއިރު ވީކަމެއް ހަނދާން ވެގެން ހިއްސާ ކުރިއެވެ. ބުނީ ޅިޔަންބެގެ ބޮޑުދައިތައެއް އެއްދުވަހު ދައްތަ މޫދަށް ގޮސްފަ އައުމުން، ހިތިފަތް އަޅާފަ ކައްކާފައިހުރި ފެން ބާލިދީއެއް ދިންކަމަށެވެ. އެއީ ފަހަރެއްގައި ރޯގާ ޖެހިދާނެތީ ރައްކާތެރިކަމުގެ ގޮތުންކަމަށް ބުނި ކަމަށް ވެސް ބުންޏެވެ. އަހަރެންގެ ދައްތައަކީ މޫދަށް ގޮސްފިއްޔާ ވަރަށް ފަސޭހައިން ރޯގާ ޖެހޭ މީހެކެވެ.
ޖިންނީން ބުނީ އެމީހުން އައީ ހަމައެކަނި ޅިޔަންބެ ދެކެ ރުޅި އަންނަކަމަށް ހަދާ ދުރު ކުރުވަން ކަމަށެވެ. ނަމަވެސް ދައްތަގެ ހަށިގަނޑު ފެނިފައި އޭގެ ތެރެއިން ބައެއް އެއްޗެހި ނިޔަތް ބަދަލު ވެގެން ވަހުޝީވެ، އިތުރު ޖިންނީން ވެސް ގެނެސް، ގޯނާ ކުރަން ފެށީއެވެ. އަންހެން ޖިންނީން އެކަމާ ރުޅި އައިސްގެން ދައްތަގެ ފުރާނަ ދުއްވާލެވޭތޯ މަސައްކަތް ކުރީ ކަމަށް ވެސް ބުންޏެވެ.
ރުޤްޔާ ކުރާ ބޭބެގެ މަސައްކަތުން އޭގެ ތެރެއިން ގިނަ ޖިންނީންނާ ވާހަކަ ދައްކާ އެއެއްޗެހި އިސްލާމް ކުރުވިއެވެ. އަނެއްބައި ޖިންނިން އެކަމަށް ދެކޮޅު ހެދުމުން، އެއެއްޗެހީގެ ރަސްގެފާނާ ހަވާލުކޮށް ބަންދު ކުރިއެވެ.
އެފަހަރު ދައްތަގެ ފުރާނަ ސަލާމަތް ކުރެވުނީ ހަމަ ކިރިޔާއެވެ. ރޫފަ ރަނގަޅުކޮށް ހުރި ދައްތަ، މިކަންތަކުގެ ސަބަބުން ފަހުން ހުރީ ވަރަށް ބޮޑަށް ހިކި އަނަރޫފަ ވެފައެވެ. ދައްތައާމެދު ކަންތައްވީ ގޮތުގެ ހަގީގަތް އަހަރުމެން ކިޔައިދިނީ އެހާދިސާއަށް އަހަރެއް ވެސް ވީ ފަހުންނެވެ. ޅިޔަންބެ ވެސް މިހާދިސާއަށް ފަހު ރިސޯޓުން ކެނޑިގެން، ދެން ހުރީ ރަށުގައި ދައްތަ ގާތުގައެވެ. އާމްދަނީ ހޯދަން ވަޑާން ކުރުމުގެ އިތުރުން ރަށުގެ އެހެން މަސައްކަތްތައް ކުރަމުން ދިޔައެވެ. ޅިޔަންބެ އޭނަގެ އާއިލާއާ އެއްކޮށް ގުޅުން ކަނޑާލިއެވެ."
Ads by STO
