ރަމަޟާން މަހުގެ 15 ދުވަސް ނިމިއްޖެ ، ޙާޞިލް ކުރެވުނީ ކިހާ މިންވަރެއް؟
ކޮވިޑް19ގެ ދަތި ޙާލުގައި އަހަރެމެން މިހޭދަ ކުރާ ރަމަޟާންމަހުގެ ފުރަތަމަ ފަނަރަ ދުވަސް ނިމުނީއެވެ. ޖަމާޢަތުގެ ނަމާދާއި ދަރުސްތަކުގެ ބޮޑެތި ޖަމާޢަތްތަކުން މަޙްރޫމްވެ ހުރިހާ ވަގުތެއްމެ ހޭދަ ކުރަމުން މިދަނީ ގޭގައެވެ. އަވަދި ނެތި އުޅެން ޖެހުމުގެ ސަބަބުން ޢާއިލާއާއެކު ވަގުތު ހޭދަ ކުރަން ނުލިބުނު އެންމެންނަށް މިވަނީ ޢާއިލާއާއެކު އަގުހުރި ވަގުތުތަކެއް ހޭދަ ކުރުމުގެ ފުރުސަތު ލިބިފައެވެ.
މިފުރުސަތުގެ ބޭނުން ހިފުނީ ކިހާ މިންވަރަކަށްތޯއެވެ. ތަރާވީޙާއި ރޭއަޅުކަމާއި ޤުރުއާން ކިޔެވުމުގެ އިތުރުން އަނބިދަރީންނަށް އެހީތެރިވެ ދިނުމަށް ވަގުތު ހޭދަ ކުރެވުނީ ކިހާ މިންވަރަކަށްތޯއެވެ. ނަފްސު ހިސާބު ކުރުމަކީ ދިރިދުނިޔޭގައި ހުރި ކޮންމެ ހިނދެއްގައި ނިމުމެއް ނެތްކަމަކަށް ވީހިނދު ވޭތުވެދިޔަ 15 ދުވަހާއި މެދު ވިސްނާ ފިކުރުކޮށްލަން މިއީ ރަނގަޅު ދަނޑިވަޅެކެވެ.
ދެން އަހަރެމެންނާއި ބައްދަލުކުރަން މިއޮތީ ފަހު ދިހައިގެ ދުވަސްތަކެވެ. ލައިލަތުލްޤަދުރި ވިލޭރޭއެވެ. ވީމާ ފަހު ދިހައިގެ އޮނަހިރި ރޭތަކުގެ ތެރެއިން ރެއެއްކަމުގައިވާ ލައިލަތުލްޤަދުރި ވިލޭރޭގެ މަތިވެރި ސަވާބާއި ދަރުމަ ހޯދުމަށް ކޮންމެ މީހަކު ގަދައަޅާ މަސައްކަތް ކުރަންޖެހޭނެއެވެ. 1000 މައްސަރުގެ ހެޔޮކަން އެކުލެވިގެންވާ އެރޭ މަޙުރޫމް ވުމަކީ ހާދަ ބޮޑު މަޙްރޫމްވުމެކެވެ.
ކޮންމެ ސަބަބަކާއި ހުރެ ނަމަވެސް އަޅުކަންތަކަށް ދޭންވާ ސަމާލުކަން އެންމެ ފުރިހަމަ ގޮތުގައި ނުދެވުނު މީސްތަކުން ދަންނާށެވެ. މާޔޫސް ނުވާށެވެ. ވަގުތު އަދި ފާއިތެއް ނުވެއެވެ. ކުރިއަށް މިއޮތް ދުވަސްތަކުގެ ތާވަލް އަލުން އެކުލަވާލާށެވެ. އަނބިދަރީންނާއެކު ގޭގައި ޖަމާޢަތް ހައްދަވާ ފަރުޟު ނަމާދުތަކާއި ތަރާވީޙް ނަމާދު ކުރައްވާށެވެ. ޤުރުއާން ކިޔެވުމުގެ މަހްފިލްތަކުން ގޭ ތެރެއަށް ދިރުން ގެނުވާށެވެ. ގޭގެ މަސައްކަތުގައި އަނބީންނަށް އެހީތެރިކަން ފޯރުކޮށްދޭށެވެ. ވީވަރަކުން ޞަދަޤާތެއް ކޮށްލަން އިސްކަން ދޭށެވެ. ތިބާގެ ދުޢާގައި އިސްލާމީ އުއްމަތާއި ބަލިމަޑުކަން ތަހައްމަލު ކުރަމުންދާ މީހުން ހިމަނާށެވެ. ކޮވިޑް19ގެ ނުރައްކަލުން ސަލާމަތްވޭތޯ ގިނަގިނައިން ދުޢާ ކުރައްވާށެވެ.
ކީރިތި ރަސޫލާ ޞައްލަަﷲ ޢަލައިހި ވަސައްލަމްގެ ޙަދީޘް ބަސްފުޅެއްގައި އައިސްފައިވެއެވެ.
عَنْ أَبِي هُرَيْرَةَ رضي الله عنه قَالَ: قَالَ رَسُولُ اللَّهِ صلى الله عليه وسلم: " ...... رَغِمَ أَنْفُ رَجُلٍ دَخَلَ عَلَيْهِ رَمَضَانُ ثُمَّ انْسَلَخَ قَبْلَ أَنْ يُغْفَرَ لَهُ ....... " (جامع الترمذي، كتاب الدعوات عن رسول الله صلى الله عليه وسلم)
އަބޫހުރައިރާ ގެ އަރިހުން އައްތިރްމިޛީ ރިވާކުރައްވާފައި ވެއެވެ. ރަސޫލުﷲ ޙަދީޘުކުރެއްވިއެވެ. ރަމަޟާން މަސް އެމީހަކާ ދިމާވެ، އޭނާގެ ފާފަ ފުއްސެވުމުގެ ކުރިން އެ މަސް ނިމިއްޖެ މީހާ ނިކަމެތި ވެއްޖެއެވެ. (ޖާމިޢުއް ތިރްމިޛީ، ޙަދީޘު: 3545)
މިއީ އަބާއްޖަވެރިން ނުވަތަ ނިކަމެތިވާ ތިން ބައެއްގެ ވާހަކަ އައިސްފައިވާ ދިގު ޙަދީޘެއްގެ ބައެކެވެ. މި ބަސްފުޅު ޙަދީޘްކުރެއްވި ޙާދިޘާއާއި ގުޅޭ ގޮތުން އައިސްފައިވެއެވެ.
ރަސޫލުﷲ صلى الله عليه وسلم އެއް ދުވަހަކު މިންބަރަށް އަރާވަޑައިގަތް އިރު، ކޮންމެ ހަރުފަތަކަށް އަރާވަޑައިގަތުމަށް ފަހު އާމީން ވިދާޅުވިއެވެ. ދެން އެކަލޭގެފާނު އާމީން ވިދާޅުވީ ކޮންކަމަކަށްތޯ އަޞްޙާބުބޭކަލުން ސުވާލު ކުރެއްވުމުން އެކަލޭގެފާނު ޙަދީޘް ކުރެއްވިއެވެ. ކޮންމެ ހަރުފަތަކަށް އަރައި ވަޑައިގަންނަވާހިނދު ޖިބްރީލު عليه السلام ދުޢާއެއް ވިދާޅުވާ ކަމަށާއި އެ ދުޢާއަށް އެކަލޭގެފާނު އާމީން ވިދާޅުވި ކަމަށެވެ.
ވީއިރު، ރަމަޟާން މަސް އެމީހަކާއި ބައްދަލުވެ އެމީހެއްގެ ފާފަ ނުފުއްސެވުނު މީހާ ހިމެނިގެން ގޮސްފައިވަނީ އެބައެއްގެ މައްޗަށް ނިކަމެތިކަން ހުރިކަމަށް ޖިބްރީލު ދުޢާ ކުރެއްވި މީހުންގެ ތެރެއިންނެވެ. ހަމަކަށަވަރުންވެސް ޖިބްރީލު عليه السلام އެމީހެއްގެ މައްޗަށް ދުޢާކުރައްވައި، ރަސޫލުﷲ صلى الله عليه وسلم އެ ދުޢާއަށް އާމީން ވިދާޅުވެއްޖެ މީހާއަށް ވުރެ އަބާއްޖަވެރިންއަކީ ކާކު ހެއްޔެވެ. ވީމާ ، އެފަދަ މީހުންގެ ތެރޭގައި ނުހިމެނި ، މި މައްސަރުގެ ފުއްސެވުމާއި ރުއްސެވުން ހޯދުމަށް އަދިވެސް އިތުރު ހިތްވަރެއް ކޮށްލަމާ ހެއްޔެވެ؟
