އީޔޫ އާއެކު ފަސްވަނަ ޕޮލިސީ ޑަޔަލޮގް ބާއްވައިފި
ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު ބާއްވާ ޕޮލިސީ ޑައިލޮގްގެ ފަސްވަނަ ބުރު މިއަދު ބާއްވައިފިއެވެ.
މޯލްޑިވްސް-އީޔޫ ޕޮލިސީ ޑައިލޮގަކީ ތަފާތު އެކި ދާއިރާތަކުން ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު ގުޅުން ބަދަހިކުރުމުގެ ގޮތުން އަހަރަކު އެއް ފަހަރު ބާއްވާ މަޝްވަރާ ބައްދަލުވުމެކެވެ.
ކޮވިޑް-19ގެ ބަލިމަޑުކަމުގެ ސަބަބުން މިއަހަރުގެ ޑައިލޮގް ބާއްވާފައި ވަނީ ވަރޗުއަލްކޮށް ކަމަށް ފޮރިން މިނިސްޓްރީން މައުލޫމާތު ދެއެވެ.
ފާއިތުވި ދެ އަހަރު ދުވަހުގެ ތެރޭގައި ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު އޮންނަ ގުޅުން ބަދަހިވެ، ދެ ފަރާތުން އިސްވެރިންގެ ދަތުރުތަކެއް ކުރެވި، ގުޅިގެން ގިނަ މަސައްކަތްތަކެއް ކުރެވިފައިވާ ކަމަށް ވެސް އެމިނިސްޓްރީން މައުލޫމާތު ދެއެވެ.
މީގެ ތެރޭގައި މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު 2019 ވަނަ އަހަރު ޖޫން މަހު ބްރަސަލްސްއަށް ކުރެއްވި ދަތުރުފުޅާއި، ޔޫރަޕިއަން ކޮމިޝަންގެ ނައިބު ރައީސް އަދި ޔޫރަޕިއަން ޔޫނިއަންގެ ޚާރިޖީ އަދި ސަލާމަތީ ސިޔާސަތާ ބެހޭ ހައި ރެޕްރެޒެންޓޭޓިވްގެ މަޤާމުގައި ކުރިން ހުންނެވި ފެޑެރިކާ މޮގެރިނީ 2019 ވަނަ އަހަރު އޮގަސްޓް މަހު ދިވެހިރާއްޖެއަށް ކުރެއްވި ދަތުރުފުޅު ފާހަގަ ކޮށްލެވެއެވެ.
މޮގެރިނީގެ އެ ދަތުރުފުޅަކީ ޔޫރަޕިއަން ޔޫނިއަންގެ އެންމެ އިސް ވެރިޔަކު ރާއްޖެއަށް ކުރެއްވި ދަތުރުފުޅެވެ. ހަމައެއާއެކު ޔޫރަޕިއަން ޔޫނިއަންގެ ޚާރިޖީ އަދި ސަލާމަތީ ސިޔާސަތާ ބެހޭ ހައި ރެޕްރެޒެންޓޭޓިވްގެ މަޤާމާ އަލަށް ހަވާލުވެވަޑައިގެންނެވި ޖޮސެޕް ބޮރެލްއާއެކު މިއަހަރު ދެ ފަހަރެއްގެ މަތިން ފޮރިން މިނިސްޓަރ އަބްދުﷲ ޝާހިދު މަޝްވަރާތައް ބާއްވަވާފައިވެއެވެ.
މީގެ އިތުރުން ދިވެހިރާއްޖެއާ ޔޫރަޕިއަން ޔޫނިއަންއާ ދެމެދު އޮންނަ ގުޅުން އިތުރަށް ބަދަހިކުރުމުގެ ގޮތުން އަހަރަކު އެއް ފަހަރު ސީނިއަރ އޮފިޝަލުންގެ މަޝްވަރާ ބައްދަލުވުން ބާއްވަން ނިންމައި، ފުރަތަމަ ބައްދަލުވުން މިއަހަރު ފެބްރުއަރީ މަހުގެ 9 ވަނަ ދުވަހު މާލޭގައި ބާއްވާފައިވެއެވެ.
މިއަދުގެ ބައްދަލުވުމުގައި ތަފާތު އެކި ދާއިރާތަކުން ބިނާކުރަނިވި މަޝްވަރާތަކެއް ކުރެވުނެވެ. އެގޮތުން މަޝްވަރާކުރެވުނު ދާއިރާތަކުގެ ތެރޭގައި ޑިމޮކްރަސީ، ހިންގުމުގެ ދާއިރާ، ޝަރުޢީ ދާއިރާ އިތުރަށް ހަރުދަނާކުރުން، އިންސާނީ ހައްޤުތައް ހިމާޔަތްކުރުމާ ކުރިއެރުވުން، ނުރައްކަލަށް ހުށަހެޅޭ ފަރާތްތަކަށް ރައްކާތެރިކަން ދިނުން، ސަލާމަތީ ދާއިރާއިން ގުޅުން ބަދަހިކުރުން، މަސްވެރިކަމުގެ ދާއިރާގައި ގުޅިގެން މަސައްކަތްކުރުން، އިޤްތިޞާދު، ވިޔަފާރިއާއި އިންވެސްޓްމަންޓް، މާލީ ދާއިރާ އަދި ތިމާވެއްޓާއި މޫސުމީ ބަދަލުތައް ހިމެނެއެވެ.
ކޮވިޑް-19 ގެ ސަބަބުން ލިބުނު ގެއްލުންތަކުން އަރައިގަތުމަށް، ދެމެހެއްޓެނިވި އަދި އިޤްތިޞާދީ އިޖްތިމާޢީ ތަރައްޤީ ކަށަވަރުކުރެވޭ ގޮތަށް ހެދިފައިވާ ޕްލޭންތަކާ ބެހޭ ގޮތުން މިއަދުގެ މަޝްވަރާތަކުގައި އީޔޫ ސަފީރުންނަށް މައުލޫމާތު އެރުވުނެވެ. އަދި ދިވެހިރާއްޖެއަށް، ޚާއްސަކޮށް ކޮވިޑް-19 އާ ގުޅިގެން ޔޫރަޕިއަން ޔޫނިއަންއިން ފޯރު ކޮށްދީފައިވާ އެހީތެރިކަމަށް ދިވެހި ސަރުކާރުން ވަނީ ޝުކުރު އަދާކޮށްފައެވެ.
