މިއީ ކޮންތަނެއްކަން އެނގޭތަ؟
މެޑިކަލް ދާއިރާ ނޫނީ ޑޮކްޓޯރިއަލް ދާއިރާއިން ތައުލީމު ހާސިލު ކުރަމުން އަންނަ ކުދިންނަކަށް މިއީ ކޯއްޗެއްކަން އަދި ކީއްކުރާ އެއްޗެއްކަން ވެސް އެނގިގެން ދާނެއެވެ. މިއީ މަރާލެވޭ މީހުންނާއި ސަބަބު ނޭނގި މަރުވެފައިވާ މީހުގެ ހަށިގަނޑު ފަޅާލާ ތަހުގީގު ކުރުމަށް ތައްޔާރު ކުރެވިފައި ވާ ތަނެކެވެ. "އޮޓޯޕްސީ" ހެދުމަށް ބޭނުންކުރެވޭ ތަނަކީ މިއީއެވެ.
ނިކަން ވިސްނާލަބާލާށެވެ. އެތަކެއް ފުރާނަ ނެތް ހަށިތަކެއް މިތަނުގައި ފަޅާލެވިގެން ދާނެއެވެ. އެތެރެ ހަށީގެ ހުރިހާ ގުނަވަނެއް ނަގާ ރަނގަޅަށް ބަލާ ފާސް ކުރެވިގެން ދާނެއެވެ. އެހެންގޮތަކަށް ބުނާ ނަމަ މަރުވެފައިވާ މީހެއްގެ ހަށިގަނޑެއް ކަތިލެވެނީ އެވެ. ނަމަވެސް ތަހުގީގަށެވެ. މިތަނުގައި ތިބާއަށް އެންމެ ހިނދުކޮޅަކު ވެސް ކެތް ކުރެވޭނެ ހެއްޔެވެ؟
ތިބާ ނިކަން ވިސްނާލާށެވެ. ތިބާގެ ލޯބިވާ މީހަކު ނޫނީ އާއިލާ މީހަކު މަރުވެ "އޮޓޯޕްސީ" ހަދަން ޖެހުމުން އެ ފުރާނަ ނެތް ހަށިގަނޑަށް ހަދަން އެއުޅެނީ ކިހިނެއްކަން އެނގޭ ހެއްޔެވެ؟ ކުޑަ ކުދިން ކުޅެން ގެންގުޅޭ ރާވާ ސެޓު ރޭވުމަށް ފަހު ރޫޅާލާ ބީދައިން އިންސާނާގެ ހަށިގަނޑު ވެސް ފަޅާލާ އެތެރެ ހަށީގެ ގުނަވަންތައް ވަކި ކޮށްލަނީއެވެ. އަދި ނިމުމުން ފަޅާލެވުނު ތަންތައް އަނބުރާ ބައްދަނީއެވެ.
މިތަނުގައި ކިތައް އިންސާނުން މިހާރު "އޮޓޯޕްސީ" ހެދިފައި ވާނެކަން ނިކަން ވިސްނާލާށެވެ. ތިބާ ދިރި ދުނިޔޭގައި ކުޑަ އަނިޔާއެއް ލިބިގެން ވާ ތަދު އިހުސާސު ކުރެވޭ ނޫން ހެއްޔެވެ؟ އަދި އެހެންމީހަކަށް ތަދުވާ މަންޒަރު ފެނުމުން ވެސް ތިބާއަށް ގޮތް ވޭ ނޫންހެއްޔެވެ؟ ކަން މިހެން އޮތްއިރުގައި، މިތަނުގައި ވާ މިގޮތަށް "އޮޓޯޕްސީ" ހެދޭ މީހުންގެ ހަށިގަނޑު ފަޅާލެވޭ ހިނދު ކުރާ އަސަރު އެކަމުގައި އުޅޭ މީހުންނަށް ކޮންމެ ވެސް ވަރަކަށް ކުރެވޭނެކަން ގައިމެވެ.
ތިބާ ދުޢާކުރާށެވެ. ތިބާގެ ނިމުން މިފަދަ ގޮތަކަށް ނުލެއްވުމަށް އެދޭ ޙާލުއެވެ. ތިބާގެ އާއިލާ މީހެއްގެ ވެސް އަދި ތިބާގެ ލޯބިވާ މީހެއްގެ ވެސް ނިމުން މިފަދަ ގޮތަކަށް ނުލައްވާތޯއެވެ.
Ads by STO
