ބޮޑު ޗުއްޓީއަށް ”މަވެށި“ ވަރަށް އަގުހެޔޮ

ބޮޑު ޗުއްޓީއަކީ އާއިލީ ޗުއްޓީތަކަށް ހާއްސަ އީދެކެވެ. ކޮވިޑް-19 ގެ ސަބަބުން މިފަހަރު ބޮޑު ޗުއްޓީ ގޭތެރޭގައި ހޭދަކުރަންޖެހޭއިރު، މުނިފޫހި ފިލުވާލަން ބޭނުންތެރި ކޮންމެވެސް ކަމެއް ކުރުމަށް އަޒުމް ކަނޑައަޅަން ޖެހެއެވެ. އެގޮތުން ހުސައިން ޝަހުދީ އުފައްދާފައިވާ "މަވެށި" ސީރީޒްގެ މި ފަސް ފޮތަކީ މިފަހަރު ބޮޑު ޗުއްޓީގައި ކިޔާލަން ހަމަ އެންމެ ރަނގަޅު ފަސް ފޮތެވެ.

Ads by Hajj Corporation

ކުރިން 100 ރުފިޔާއަށް ވިއްކަމުން އައީ މި ސީރީޒްގެ ފޮތްތައް މިހާރު ވަނީ 85 ރުފިޔާއަށް އަގުހެޔޮ ކޮށްފައެވެ.

އަހަރުމެންގެ ވެށީގެ ވާހަކަތައް އުފެއްދުންތެރި ގޮތަކަށް ޝަހުދީ ގެނެސްދީފައި ވަނީ ފަސް ފޮތަށް ބިނާ ކޮށެވެ.

އެކުވެރި ތިން މިޔަރު

"އެކުވެރި ތިން މިޔަރު" ވާހަކަ އަމާޒުކޮށްފައި ވަނީ މިޔަރުގެ ބާވަތްތަކުގެ ތެރެއިން ތިން ބާވަތެއްގެ މިޔަރު ހިމަނައިގެން، ކިޔައިދޭ ވާހަކައަކުން ކަނޑުގެ ދިރުންތަކާ ގުޅޭ މައުލޫމާތުތަކެއް ގެނެސް ދިނުމަށެވެ. ރަށެއްގެ ފަޅުން ފެށިގެން ތިލައާއި، ކަނޑު ހިމަނައިގެން ކުރުވާހަކައެއްގައި ބުނެދެވޭ މިންވަރަށް ވީހާވެސް ގިނައިން ކަނޑު ދިރުންތަކުގެ ނަންތައް މިވާހަކައިގައި ކިޔައިދީފައިވެއެވެ. ދެމެސެޖެއް ވެސް މިވާހަކައިން ކުދިންނަށް ދެއެވެ. ފުރަތަމަ މެސެޖަކީ ހެޔޮނަސޭހަތެއް ދޭނަމަ އެކަމާ ފިކުރުކޮށް އެނަސޭހަތުގައި ހިފުމުގެ މުހިންމުކަމެވެ. ދެވަނަ މެސަޖަކީ ކަނޑު ފަޅުގައި ދާ އަޅައިގެން އިންސާނުން ވެށީގެ ދިރުންތަކަށް ގެއްލުންދޭ ކަމުގެ މެސެޖެވެ.

ބުއްދިވެރި ފިނދަނަ

ދެވަނަ ވާހަކަ "ބުއްދިވެރި ފިނދަނަ" ވާހަކައިން ގެނެސްދީފައި ވަނީ ރަށްފުށުގެ ގޮނޑުދޮށްތަކުގެ ދިރުމުގެ ވާހަކައެކެވެ. ގޮނޑުދޮށު ދޫނިތަކެއް ހިމަނައިގެން ކުރުވާހަކައެއްގައި ބުނެދެވޭ މިންވަރަށް ވީހާވެސް ގިނައިން ގޮނޑު ދޮށުގެ ދޫނިތަކާއި، އެނޫންވެސް ގޮނޑު ދޮށުގެ ދިރުންތަކުގެ ނަންތައް މިވާހަކައިގައި ކިޔައިދީފައިވެއެވެ. ފިދަނައިގެ ބުއްދިން ހައްލު ހޯދި މިވާހަކައިން ވެސް ދެ މެސެޖެއް ދެއެވެ. ފުރަތަމަ މެސެޖަކީ އިންސާނުންގެ ފުށުން ގޮނޑުދޮށު ދޫނިތަކަށް އޮތް ނުރައްކަލެއް ބުނެދިނުމެވެ. ދެވަނަ މެސެޖަކީ އެކުވެރި ކަމަކީ ގަދަފަދަ ބާރެއްކަން ބުނެ ދިނުމެވެ.

ނަސީބު ދެރަ ކޮވެލި

ތިންވަނަ ވާހަކަ "ނަސީބު ދެރަ ކޮވެލި" ވާހަކައިގައި ކިޔައިދެނީ ރަށެއްގެ ވަލުތެރޭގައި އުޅުނު ކޮވެއްޔެއްގެ ވާހަކައެވެ. އެ ކޮވެލީގެ މަކަރުވެރި ކަމާއެކު ކާޅު ހާއްޔަށް ބިސް އެޅި ގޮތާއި، ކޮވެލީގެ ބިސް ފީކޮށް ކާޅު، ކޮވެލީގެ ދަރިފުޅު ކޮވެލި ބަލާ ބޮޑުކުރުމުން ކާޅު އަތުން ޖަހައިގަތް ގޮތް މިވާހަކައިގައި ކިޔައިދެއެވެ. ނަމަވެސް ކޮވެލީގެ ދަރިފުޅު ކޮވެލި ލިބި ގިނަ ވަގުތުތަކެއް ނުވެ ކަން ހިނގި މަގުން ކޮވެލީގެ ނަސީބު ދެރަ ނިމުން ގެނެސްދީފައިވާއިރު، ރަށެއްގައި ހުންނަ ގިނަ ބާވަތް ތަކުގެ ގަސް ގަހާގެހީގެ ނަންތައް ކުރު ވާހަކައެއްގައި ބުނެދެވޭ މިންވަރަށް ވީހާ ވެސް ގިނައިން މިވާހަކައިގައި ހިމަނާފައިވެއެވެ. މަކަރުވެރިއެއްގެ ނިމުން ހިތިވެދާނެ ކަމުގެ މެސެޖުގެ އިތުރުން އިންސާނުންގެ އަތުން ގަސްތައް ކެނޑުމުން ދޫނި ސޫފާސޫފީގެ ދިރުމަށް ނޭދެވޭ އަސަރު ފޯރާކަމާއި، ރަށްގިރައި ގެއްލުންވާ ކަމުގެ މެސެޖު މިވާހަކައިން ދެއެވެ.

ކިބުރުވެރި ބުޅާ

ހަތަރުވަނަ ވާހަކަ "ކިބުރުވެރި ބުޅާ" ވާހަކަ އަމާޒުކޮށްފައި ވަނީ ރަށެއްގެ ވަލުތެރޭ އުޅޭ ބައެއް ޖަނަވާރު ހިމަނައިގެން ކުރު ވާހަކައެއްގައި ބުނެދެވޭ މިންވަރަށް ވީހާ ވެސް ގިނައިން އެފަދަ ޖަނަވާރުތަކާއި، އެވެށީގެ ގަސްގަހާގެހީގެ ނަން ގެނެސް ދިނުމަށެވެ. ފަޅު ރަށެއްގެ ވަލުތެރޭ އުޅުނު މުސަޅުތަކާއި، މީދާތަކާއި އަދި ކުކުޅު ހާލަށް އޮތް ނުރައްކާ ކަމުގައިވާ ކިބުރުވެރި ބުޅަލުގެ ކިބައިން ބާޒުގެ އެހީގައި ސަލާމަތްވި ގޮތް މިވާހަކައިގައި ކިޔައި ދެއެވެ. ކިބުރުވެރި ކަމުގެ ސިފަޔަކީ ނޭދެވޭ ނަތީޖާއެއް ނުކުމެދާނެ ސިފައެއްކަމުގެ މެސެޖާއި، އެކުވެރިކަމުގެ މުހިންމުކަން ބުނެދޭ މެސެޖު ވެސް މިވާހަކައިން ވެސް ގެނެސްދެއެވެ.

ކޮކާލުގެ ހުވަފެން

ފަސްވަނަ ވާހަކަ "ކޮކާލުގެ ހުވަފެން" ގައި ރާއްޖޭގެ ރަށެއްގެ ވަލުތެރޭ ހިމެނޭ ގަސްގަހާގެއްސާއި، މާމެލާމެލީގެ ނަންތައް ކުރުވާހަކައެއްގައި ބުނެދެވޭ މިންވަރަށް ވީހާވެސް ގިނައިން ގެނެސްދީފައިވެއެވެ. ކޮކާލަކަށް ފެނުނު ހުވަފެނެއް ކިޔައިދޭ މިވާހަކައިންވެސް ރަށެއްގެ ވެށީގެ ގިނަ ނަންތަކެއް ދަސްވާނެއެވެ. މިވާހަކައިން ވެސް އެކުވެރި ކަމުގެ ބާރުގަދަ ކަމުގެ މެސެޖު ދެއެވެ.

މި ފަސް ، ވާހަކަ ފޮތުން ވެސް ކިޔައިދޭނީ ވެށީގެ ވާހަކަ ތަކެކެވެ. އެވާހަކަ ތަކުން އަދުގެ ޖީލުގެ ކުޑަކުދިންނަށް ވެށީގެ އެތައް އައު ނަމެއް ދަސްވެ، ވެއްޓާމެދުބފިކުރު ހިންގުމަށް މަގު ފަހިވާނެއެވެ.

މި ވާހަކަތައް މާލޭގެ، އަސްރަފީ އާއި ރައުންޑްވަން އަދި ރާދަ ބުކްޝޮޕްއިން ލިބޭނެ އެވެ. އަދި އޫރީދޫ މޫލީ އިން މިހާރު ރާއްޖޭގެ ކޮންމެ ތާކަށް ޑެލިވަރީ ކޮށްދޭނެއެވެ. މާލޭގައި ދިރިއުޅުއްވާ ފަރާތްތަކުން ފިހާރައަށް ގޮސް ފޮތް ގަތުމުގެ ބަދަލުގައި ވާހަކަ.ކޮމް ގެ ޕޭޖާއި ވެބްސައިޓް އަށް މެސެޖު ކުރުމުން ގޭގެއަށް ގޮސް ޑެލިވާ ވެސް ކޮށްދެއެވެ.