އަންނަ އަހަރު މަސްވެރިކަމަށް 460 މިލިއަނަށްވުރެ އަގުބޮޑު މަޝްރޫޢުތަކެއް
ކޮވިޑް-19އާ ގުޅިގެން މަސްވެރިންނަށް ކުރިމަތިވެފައިވާ ދަތިތަކުން އަރައި ގަތުމަށް 460 މިލިއަން ރުފިޔާއަށްވުރެ އަގުބޮޑު މަޝްރޫތަކެއް އަންނަ އަހަރުތެރޭގައި ހިންގުމަށް ތައްޔާރުވަމުންދާ ކަމަށް ރައީސް އިބްރާހިމް މުޙައްމަދު ޞާލިޙު މިއަދު ވިދާޅުވެއްޖެއެވެ.
މިއަދަކީ ރާއްޖޭގެ 40 ވަނަ މަސްވެރިންގެ ދުވަސް ކަމަށްވުމާއެކު، މިއަދުގެ މުނާސަބަތުގައި ރައީސް ޞާލިޙު ދެއްވި ޙިޠާބުގައި ވިދާޅުވެފައި ވަނީ މަސްވެރިކަމަކީ ރާއްޖޭގެ އެންމެ ފުޅާ އިޤްތިޞާދީ ވަސީލަތައް ހެދުމުގެ ވަގުތު ޖެހިއްޖެކަމަށެވެ.
މަސްވެރިންގެ ދުވަހުގެ ތަހުނިޔާއާ ހެޔޮއެދުންތައް ރާއްޖޭގެ ހުރިހާ މަސްވެރިންނަށާއި، ކެޔޮޅުންނަށާއި، ފަޅުވެރިންނަށާއި، އޮޑިވެރިންނަށް، އަދި، މަސްވެރިންގެ ޢާއިލާތަކަށާއި، މަސްވެރިކަމުގެ ޞިނާޢަތުގައި ޙަރަކާތްތެރިވާ އެންމެހައި ކުންފުނިތަކާއި ވިޔަފާރިވެރިންނަށް ފޮނުއްވަމުން ރައީސް ޞާލިޙު ވިދާޅުވީ ކޮވިޑް-19 ގެ ސަބަބުން އިޤްތިޞާދީ ގޮތުން ކުރިމަތިވި ދަތިތަކާއެކު، ރާއްޖޭގެ އިޤްތިޞާދު ސިންދަފާތުކުރުމުގެ މުހިންމުކަން ހާމަވެފައިވާ ކަމަށެވެ. އަދި، ކޮވިޑްގެ ފުރަބަންދުގެ ތެރޭގައި މުޅިން ހުއްޓުމަކަށް ނައިސް އޮތީ، މަސްވެރިކަމުގެ ޞިނާޢަތްކަން ފާހަގަކުރައްވައި، ކޮވިޑްގެ އިޤްތިޞާދީ ގެއްލުންތަކުން އަރައިގަތުމަށް ޤައުމީ ފެންވަރުގައި ފަށާފައިވާ މަސައްކަތްތަކުގެ ތެރޭގައި މި ޞިނާޢަތް އިތުރަށް ފުޅާކޮށް މަސްވެރިކަމުގެ އުފެއްދުންތައް އިތުރު ކުރަން ޖެހޭ ކަމުގައި އެމަނިކުފާނު ވިދާޅުވިއެވެ.
އަންނަ އަހަރު މަސްވެރިކަން އިތުރަށް ތަރައްޤީކުރުމަށް ސަރުކާރުން ކުރައްވާނެ ބައެއް މުހިންމު މަސައްކަތްތަކުގެ މައްޗަށް ރައީސް ޞާލިޙު ވަނީ އަލި އަޅުއްވާލައްވާފައެވެ.
އެގޮތުން، މަސް ގަންނަ އިތުރު ފެސިލިޓީތައް ޤާޢިމުކުރުމާއި، އައިސް ލިބުމުގެ ދަތިކަން ޙައްލުކޮށްދިނުމަށް މުޅިން އައު، ހަތް އައިސް ޕްލާންޓް އެޅުމުގެ މަސައްކަތް ފެށުމާއި، ދޯނިފަހަރުގެ ވަތުގައި ފެން ފިނިކުރާ ނިޒާމުތައް ޤާއިމުކުރުމުގެ މަސައްކަތްތައް އިތުރުކުރުމަށް ނިންމަވާފައިވާ ކަމުގައި ރައީސް ވިދާޅުވިއެވެ. ހަމަ އެހެންމެ މެރިކަލްޗަރގެ ޒަރީޢާއިން މަސްވެރިކަމުގެ ޞިނާޢަތް ސިންދަފާތުކުރުމުގެ މަސައްކަތް އިތުރަށް ހަރުދަނާ ކުރުމަކީ ވެސް އަންނަ އަހަރަށް ސަރުކާރުން ކަނޑައަޅުއްވާފައިވާ މުހިންމު އަމާޒެއްކަން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވަނީ ހާމަކުރައްވާފައެވެ.
Ads by STO
